SAMAÍN 2020

    Cada ano, cando chega o   Samaín ou Halloween  propoñémoslle ao noso alumnado diferentes actividades. 

    Nesta ocasión, a pesar do coronavirus, tamén quixemos conmemorar esta data aunque de forma un pouco diferente polo que a exposición de cabazas e outros obxectos terroríficos cambiámola por un vídeo terrorífico con imaxes dos nenos e nenas que quixeron participar e dalgunhas das súas cabazas... Mirade atentos!!

VER  VÍDEO

  Outra das actividades foi unha nova edición do  Certame de creación literaria terrorífica  para alumnado de 3º a 6º de Primaria no que lle damos ao alumnado o principio dun libro que debe continuar. Este ano os libros foron  Pápote a bicos  de Carmen Gil para 3º e 4º de Primaria e  Mortiña e o amigo pantasma  de Barbara Cantini para 5º e 6º de Primaria:  

  A participación no certame deste ano foi moi numerosa polo que iremos subindo os relatos pouco a pouco. Hoxe comezamos coas historias de Darío (4º de Primaria) e Lucía (5º de Primaria).

 

 

  DESEXÁMOSVOS  UN  TERRORÍFICO  SAMAÍN!!! 

PROTOCOLO DA BIBLIOTECA PARA O CURSO 2020/21

 

DÍA DA BIBLIOTECA 2020

  Como a maioría das cousas este curso, a inauguración da biblioteca que facemos sempre por este día tamén tivo que ser diferente.

  Comezamos coñecendo o novo protocolo de acceso á biblioteca co vídeo elaborado polos biblioaxudantes de 4º de Primaria que cursan a materia de Investigación e Tratamento da Información de 4º de Primaria.

VER  VÍDEO

    Un resumo deste protocolo permanece exposto na porta da biblioteca para que a ninguén se lle esquezan as novas normas que temos que cumprir.

  Respectando os grupos burbulla e as medidas de seguirade establecidas, tamén levamos a cabo unha formación de usuarios inicial na que recordamos aspectos básicos da organización da biblioteca como a CDU e os máis cativos do cole puideron achegarse a ela e coñecer materiais da biblioteca creativa como as tablillas KAPPA coas que fixeron un montón de torres e mesmo as iniciais do seus nomes.

 

 

 

 

 

   Despois da formación de usuarios, cada grupo puido escoller varios libros para encher a caixa da súa biblioteca de aula xa que este ano a Hora de Ler non se poderá facer na biblioteca e cada grupo farao na correspondente titoría. 

   Esta caixa xa contaba con varios libros escollidos polos mestres pero que eles poidan engadir parte das lecturas é unha motivación extra.

 

 

   Polo Día da Biblioteca tamén facíamos todos os anos unha visita á Bibliteca Pública Municipal. Nesta ocasión íamos a presentar o libro infantil Troitiña ilustrado por varios nenos e nenas do colexio na actividade Merendas con Contos da BPM xa que en xuño non se puido facer unha presentación á que asistiran xs ilustradorxs; pero debido ás novas restriccións esta presentación tivo que ser virtual a través dun vídeo.

  Neste vídeo interveñen Ada de Agrasar Editores; o autor, Antón Valcárcel, e os alumnos/as de 3º de Primaria que fan unha lectura das primeiras páxinas do libro. Ademais ao final podemos ver un resumo en imaxes do proceso de ilustración.

VER  VÍDEO

     Para rematar fixémoslle entrega aos biblioaxudantes do ano pasado dunha mochila - agasallo que envían desde o programa de Voluntariado e do correspondente diploma oficial. Como esta entrega non se puido facer a final do curso pasado queda pendente a entrega aos biblioaxudantes que o ano pasado estaban en 6º de Primaria e este ano xa están no instituto. Esperemos que a situación sanitaria mellore e poidamos facerllos chegar.

 

LIBROS QUE VEÑEN E VAN

  Hoxe poñemos en marchas as mochilas viaxeiras de Educación Infantil dedicadas este ano aos animais!

  Nelas encontraredes moitos libros sobre animais para coñecer ás súas familias e os seus hábitos ou escoitar os seus sons e un ANIMALARIO en branco para que vos completedes coa descrición dos vosos animais preferidos!!

BOA  VIAXE!!

DÍA DAS ESCRITORAS 2020: Yolanda Castaño

    Hoxe 19 de outubro, conmemoramos no colexio o Día das Escritoras que é unha iniciativa promovida pola Biblioteca Nacional de España, a Federación Española de Mujeres Directivas, Ejecutivas, Profesionales y Empresarias (FEDEPE) e a Asociación Clásicas y Modernas coa intención de reivindicar o labor e o legado das escritoras a través da historia.

    Co lema "O esforzo cotián das mulleres" desde a biblioteca do colexio en colaboración coa Biblioteca Pública Municipal quixemos dedicarlle este día á escritora galega  YOLANDA  CASTAÑO  ilustrando e recitando algúns poemas do seu libro Verdedades (Ed. Biblos).

   No seguinte vídeo podedes ver un pequeno resumo da súa biografía, o traballo que realizaron os nosos alumnos e alumnas cos seus poemas e tamén unha sorpresa final...

VER  VÍDEO

 

   Outro dos libros que traballamos foi Punver (Ed. Galaxia), un libro no que a autora conta as aventuras dun pequeno punki vermiño que non ten mal corazón pero é un desastriño. (Música: Frogs Legs Rag by Kevin MacLeod - licencia Creative commons- Efectos sonoros: recursostic.educacion.es/bancoimagenes/web/) 

   Para coñecer a historia de Punver podedes escoitar o seguinte podcast no que Dunia e Julia narran as  aventuras do vermiño nunha emisión de Lecturradio, o programa para escoitar lecturas na nosa radio.

 

 

       Para completar esta conmemoración tamén queremos compartir con vós unha escolma de textos de escritoras galegas feita pola Asesoría de Bibliotecas Escolares de Galicia, na que poderedes encontrar textos das autoras nomeadas no vídeo: RECOMPLILACIÓN  DE  TEXTOS  DE  ESCRITORAS  GALEGAS.

     E antes de rematar esta data, queremos darlle MOITÍSIMAS  GRAZAS  A  YOLANDA  CASTAÑO   POLO  CARIÑO  CO  QUE  RECIBIU  A NOSA PROPOSTA  E  POLO  SEU  VÍDEO  QUE  TANTA  ILUSIÓN  LLE  FIXO  AO  NOSO  ALUMNADO: 

UNHA  APERTA  MOI  GRANDE  DESDE  SOBER!

 

VISITA DOS BOLECHAS

   O alumnado de 3º e 4º de Primaria asistiu a unha charla didáctica ofertada pola Xunta de Galicia, en colaboración con Axega (Axencia Galega de Emerxencias) sobre o 112. 

Visitóunos un dos irmáns bolechas, Braulio e o seu axudante Docento para explicarnos a importancia do 112, o número europeo de asistencia a cidadanía ante calquera tipo de emerxencia (sanitaria, extinción de lumes e salvamento ou seguridade cidadana).

Primeiro, ilustrounos cun vídeo no que o propio Braulio visitaba as instalacións do 112 en Galicia, no que puidemos ver a importancia de non realizar nunca chamadas falsas xa que podemos por en perigro a vida doutras persoas.

Pasámolo xenial e ata bailamos co rap do 112 que comeza tal que así:

   "Estou nunha emerxencia e teño que chamar, pero antes que nada inténtome calmar..."

Para rematar Braulio e Docento, regálaronnos a cada un de nós un conto e un cadernillo de actividades para aprender máis cousas sobre o 112.

Recorda sempre, SÓ CHAMAR ANTE UNHA EMERXENCIA!

VISITA AO PASADO: PROENTIA

   O alumnado de 3º, 4º, 5º e 6º de Primaria asistiu onte a unha visita didáctica ás escavacións arqueolóxicas que se están facendo na parroquia de Proendos, a antiga Proentia.

  Alí xs alumnxs coñeceron da man de Fran Alonso, arqueólogo director do proxecto, os achados que realizaron nas 5 sondaxes abertas nos puntos establecidos nos estudos previos realizados cun xeorradar.

 

   Entre os vestixios descubertos puidemos ver a ábsida dunha gran construción, 

un hipocausto que é un sistema de calefacción que quizais sexa o precursor da calefacción radiante xa que contaba cunha cámara de aire por debaixo da estancia con canalizacións polas que circulaba aire quente, 

unha estancia que puidera ser máis tarde utilizada para o traballo con metais xa que se encontraron moitas escouras, que son como pequenas pedras que se forma cos restos e as impurezas que resultan de traballar o metal,

a estrutura dun hórreo formado por varios muros paralelos cun oco entre eles sobre os que se colocarían táboas de madeira para poder utilizalo como celeiro ou depósito de cereais

e uns muros que parecen peches de fincas xa que xunto a eles apareceu un tramo de pavimento dun posible camiño.

 

   Ademais de todo isto puidemos ver varias das accións que realizan os arqueólogos durante o desenvolvemento do proxecto: escavación, identificación, rexistro e conservación dos restos atopados. Precisamente por isto ultimo, as sondaxes serán tapadas hoxe ou mañá para evitar que as estruturas achadas se deterioren.

 Unha saída moi interesante e didáctica que se completou hoxe coa visita do director do proxecto ás instalacións de Radiuvín para gravar o primeiro programa deste curso. Nesta emisión Brais e Zaira puideron falar con el sobre todo o achado ata agora e as posibilidades de descubrimentos futuros.

   Moitas grazas ao concello por facilitar esta visita e a Fran Alonso polo tempo que nos adicou e polas súas verbas.

"Un pracer reinaugurar o ciclo de Radiuvín nestes tempos de pandemia que quedarán para a posteridade como os vestixios de Proendos"

ESPERAMOS  COMPARTIR  PRONTO  NOVOS  DESCUBRIMENTOS!!! 

RADIO BULE BULE

 Hoxe os nenos e nenas de Primaria puideron gozar do espectáculo RADIO BULEBULE baseado no libro-disco do mesmo nome de Paco Nogueiras (Ed. Kalandraka).

     Neste espectáculo de animación á lectura, simúlase a emisión dun programa de radio en directo combinado con cancións moi divertidas mentres imos pasando polas diferentes seccións: deportes, servizos informativos, moda, o tempo meteorolóxico...

  E, para rematar, despois de tanto bailar e cantar o autor deixounos "Apertas brincadeiras para todos os lectores e lectoras do CEIP Virxe do Carme de Sober"

MOITAS  GRAZAS  AO  CONCELLO  DE  SOBER 

POR  OFRECERNOS  ESTA  ACTIVIDADE  TAN  DINÁMICA  E  DIVERTIDA

A  TRAVÉS  DO  PROGRAMA  CULTURA  NO  CAMIÑO!!

XEOGRAFÍAS LECTORAS NA BIBLIOTECA ESCOLAR (Txt: Asesoría de Bibliotecas Escolares)

  Xa coñecemos o lema escollido pola Consellería de Educación, Universidade e Formación Profesional para as bibliotecas do PLAMBE durante o curso 2020/2021: 

  XEOGRAFÍAS  LECTORAS  NA  BIBLIOTECA  ESCOLAR  

 

    «XEOGRAFÍAS LECTORAS NA BIBLIOTECA ESCOLAR convida a explorar todas as posibilidades da lectura: en calquera soporte, en calquera formato, con calquera finalidade; lecturas textuais e icónicas; imaxes fixas e en movemento; lectura de gráficos, planos, mapas ou infografías; lecturas individuais e lecturas compartidas, en silencio ou en voz alta; lectura de ficción e de información; lectura libre e guiada; lectura que nos axude a comprender mellor o noso mundo e lectura que nos axude a entender o mundo dos outros... »

Texto completo: Asesoría de Bibliotecas Escolares