PROXECTO "OS PINGÜÍNS" (IV)

     Co fin do inverno e a chegada da primavera era o momento de poñerlle fin a este proxecto sobre os pingüíns.

 

    Isto tamén supuxo a volta de Marcelino á Antártida, cousa que os fixo sentir un pouquiño tristes, pero eles comprenderon que o calor non era bo para el e que tiña que volver coa súa familia. 

 

    Ademáis, para ter un recordo para sempre, fixeron unhas fotos de despedida con él.

Como actividade final as crianzas fixeron neve! 

 

Mesturaron bicarbonato con auga e como por cousa de maxia formouse neve.

Unha vez que tiveron a neve feita chegou a mellor parte, a de xogar! 

Disfrutaron moitísimo!

 

SOBERICIAS. O XORNAL QUE CONTA AS MELLORES NOTICIAS (ou non...)

     Por segundo ano, durante o mes de marzo (especialmente na semana da prensa), no centro desenvolvemos unha situación de aprendizaxe baseada nos medios de comunicación que ten como resultado o segundo número de Sobericias, o xornal que conta as mellores noticias (ou non...) no que poderedes ler noticiais reais pero tamén outras que non o son tanto (as chamadas fake news).

     Quixemos editar un novo número deste xornal porque seguimos pensando que a desinformación (noticias falsas, información sesgada, manipulación de titulares...) é un problema ao que o noso alumnado se deberá enfrontar pois, por desgraza, non todas as noticias que se publican son fiables.

     Deste xeito as crianzas poden entender a problemática actual das diferentes informacións falsas que se poden atopar en medios impresos, televisión, radio ou publicacións en rede (onde ademais poden acabar viralizándose) e comprobar de primeira man o doado que é xerar este tipo de noticias.

    Por todo isto, parécenos fundamental seguir compartindo co alumnado experiencias que inclúan a análise dos medios de comunicación que forman ou formarán parte da súa vida cotiá.

    Esperamos que saibades apreciar todo o traballo desenvolvido polo alumnado. Nós como docentes, estamos moi orgullosas deles.

XORNAL MARZO 2024 de biblioteca.virxedocarme

AGASALLO ANPA

   Este trimestre recibimos para Ed. Infantil tres bandexas Tuff Tray, un  agasallo doado pola ANPA.

   Estas bandexas son un fantástico marco de xogo e experimentación para as crianzas, que ofrecen multitude de posibilidades.

   Xa as empregamos en diferentes actividades e  encantáronnos!

 

Seguro que as imos desfrutar moito!

 

 

MOITAS GRAZAS A ANPA POR ESTE AGASALLO!!!

 

DÍA DA POESÍA

  Coa finalidade de promover a ensinanza da poesía, crear unha imaxe atractiva dela e fomentar a expresión e tradición oral; o 21 de marzo conmemórase o Día Mundial da Poesía.

 

  Este ano foron os nenos e nenas de Ed. Infantil os que recitaron un par de poemas na biblioteca que despois gravaron en Radiuvín para que todos poidades escoitalos.

   Os nenos e as nenas de Infantil A recitaron o poema do pingüín xa que eles están investigando sobre estes animais no seu proxecto:

 

 

   Despois foi o turno do alumnado de Infantil B recitou o poema La maestra de las flores de Gloria Fuertes:

DÍA DA NARRACIÓN ORAL

    O Día Internacional da Narración Oral é unha celebración mundial que se celebra o 20 de marzo. Un dos obxectivos deste día é poñer en valor a acción de contar historias e por iso, algúns nenos e nenas de 1º e 2º contáronlle aos seus compañeiros tres lendas diferentes.

   

   Comezaron Teo e Aroa, contándonos a lenda de A Torre de Hércules.

    A continuación Brais e Lucas contáronnos a lenda de O monstro do lago Ness

   Despois Estrela e Alicia remataron contándonos A lenda da Lúa e do Sol:

AS FAMILIAS CONTAN: Familia de Alassane

     Rematamos este trimestre cunha nova sesión da actividade As familias contan con Natalia, a nai de Alassane que veu a lernos o conto A toupiña que quería saber quen lle fixera aquilo na cabeza de Werner Holzwarth e Wolf Erlbruch.

     Nesta historia a toupiña quere averiguar quen lle fixo na cabeza unha caca gorda e marrón que parece un chourizo.

   Para tratar de averigualo, a toupiña comezou as súas pesquisas falando cunha pomba, cunha lebre, cun cabalo, cunha cabra... e ata cunha vaca! Menos mal que non fora a vaca quen lle fixera iso na cabeza!!

  Pero ao final, quen conseguiu axudar á toupiña foron unhas moscas que uliscaron aquilo que tiña na cabeza e lle deron a resposta correcta: Xan Pedro! O can do carniceiro!!

  Se queredes saber que fixo a toupiña cando se enterou da identidade do culpable, podedes facelo escoitando o podcast que Natalia e Alassane gravaron nos estudos de Radiuvín.

  Ademais de compartir este libro co alumnado do colexio, Natalia e Alassane trouxeron moitos xogos relacionados con diferentes animais para que todos os nenos e as nenas do colexio puideran pasar un rato divertido xogando con eles.

MOITAS  GRAZAS  POR  VIR  A  COMPARTIR  CON  NÓS  ESTE  LIBRO  E  ESTES  XOGOS  TAN  DIVERTIDOS!!

GALERÍA  DE  IMAXES

PROGRAMA ESPECIAL FEIRA DO VIÑO - ONDA CERO

  

    O alumnado de 5º e 6º de Primaria participou hoxe no programa especial sobre a Feira do Viño que Onda Cero realizou en directo desde a Casa da Cultura do Concello de Sober. 

   Antes do programa puideron conversar coa locutora Manola Porto e co técnico Luis González sobre como se fai un programa en directo. Luis explicoulles como se emitía e que canles utilizaban para evitar que o programa se deixase de escoitar no medio da emisión.

   Despois os nenos e as nenas compartiron entrevista con Luis Fernández Guitián (alcalde de Sober) e puideron dar o seu punto de vista sobre a elaboración de viño nas súas casas, a propia Feira do Viño ou  que visitar en Sober.

 MOITAS  GRAZAS  A  MANOLA  PORTO, A  LUIS  GONZÁLEZ   E  A  ONDA  CERO  MONFORTE  POLA  INVITACIÓN E  POR  DÁRLLE  VOZ  AO  NOSO  ALUMNADO!!

DÍA DO CÓMIC

   No ano 2022, o Goberno declarou a celebración cada 17 de marzo, do Día do Cómic e do Tebeo como forma de recoñecer o seu valor, a súa importancia no contexto actual, a súa diversidade, creatividade e calidade.

    Na biblioteca do centro quixemos conmemoralo xa que é un tipo de lectura moi demandado polo noso alumnado; e para isto utilizamos o material elaborado e compartido pola biblioteca do CEIP de Seixalbo no que se resumen as principais características do cómic.

     

 

 

 

     Ademais o alumnado tamén elaborou o seu propio cómic utilizando os diferentes modelos compartidos por esta biblioteca e despois fixemos unha exposición cos cómics rematados para que todos os puideran ler.

 

 

 

 MOITAS  GRAZAS  Á  BIBLIOTECA  DE  SEIXALBO  POR  COMPARTIR  ESTE  MATERIAL!