CLUB DE LECTURA (13 - 2025/2026)

     Esta é a última sesión dedicada ao libro Os fíos de Begoña. Pequena biografía de Begoña Caamaño escrito por Eva Mejuto.

   Nesta ocasión o alumnado tiña que investigar sobre A Odisea para entender mellor a obra "Circe ou o pracer do azul" na que se reinterpreta o mito de Penélope e Ulises dende un punto de vista feminino.

  Unha vez coñecido o argumento desta obra clásica puidemos tamén entender a versión Begoña que non contrapón a Circe (amante) a Penélope (muller fiel que agarda polo marido tecendo e destecendo) senón que a obra é un conxunto de cartas entre elas dúas. Dúas mulleres que se comprenden e se apoian en vez de enfrontarse por un home.

   Ademais puxeron en común o investigado sobre o Rei Arturo, o Santo Grial e Morgana; aínda que aquí tivemos que explicar tamén a Última Cea de Xesús para entender que era o Santo Grial o que nos levou a falar de Xudas desembocando nun debate sobre a importancia da amizade verdadeira.

   Despois achegámonos á figura de Morgana e Viviana (personaxes secundarios na historia do Rei Arturo) para entender a obra "Morgana en Esmelle" na que elas contan a súa propia versión do mito desde un punto de vista feminino e reivindicativo.

 Para finalizar, os membros do club de lectura comezaron a facer unha presentación dixital sobre Begoña Caamaño e todo o aprendido sobre ela e as súas obras nestas sesións.

I ROMARÍA DAS LETRAS GALEGAS

    Hoxe celebramos en Sober a I Romaría das Letras organizada polo Colectivo LEMOSLE, que como sabedes, está formado por bibliotecas escolares da Comarca, BPM, librarías e persoas vencelladas ao ámbito da lectura da comarca de Lemos. 

 

    Nesta xornada de convivencia participamos 8 centros educativos de Primaria (CEIP Pobra de Brollón, CEIP A Gándara, CEIP Plurilingüe de Monforte, CEIP de Oural, CEIP de Sober, CEIP Rosalía de Castro de Bóveda e CEIP Monte Baliño de Pantón) o IES Daviña Rey de Monforte de Lemos e usuarias da Biblioteca Pública Municipal do noso Concello xuntándonos así máis de 300 personas no colexio xa que o mal tempo decidiu ser partícipe tamén desta xornada e no nos deixou celebrala na carballeira como estaba previsto.

 

   Durante o acto principal os diferentes colexios fixeron propostas moi diversas para conmemorar a nosa lingua e a Begoña Caamaño: regueifas, maios, cancións tradicionais, poesía, obradoiros, murais... e todo isto amenizado por un grupo de música tradicional formado por alumnado do IES Daviña Rey que terminou de darlle o toque festeiro a esta xuntanza.

   Desde o noso colexio participamos propuxemos recoller a relación de Begoña Caamaño coa mitoloxía e compartir dúas lendas do noso concello; a primeira explica que a creación dos Canóns do Sil se debe aos deuses Xúpiter e Xuño e a segunda é unha lenda de mouras e encantamentos.

   

     Ao rematar o IES Daviña Rey repartiu chapas conmemorativas para todos os asistentes e fixemos unhas fotos cun fotocall dedicado á obra de Begoña Caamaño.

   

 
 

    A xornada finalizou cun xantar de confraternidade no pavillón do colexio durante o que o alumnado do CEIP Monforte de Lemos, organizou o obradoiro sementando palabras no que os nenos e as nenas podían escribir a súa palabra favorita en galego.

   Se queredes escoitar toda a información desta xornada, podedes facelo no seguinte podcast no que tamén escoitaredes as interesantes lendas de Sober contadas por alumnado de 5º e 6º de Primaria.

 

 

OXALÁ  ESTA  SEXA  A  PRIMEIRA  DE  MOITAS  EDICIÓNS  PORQUE  A  LINGUA  GALEGA  MEDRA  CANDO  A  COMPARTIMOS,  CANDO  A  CELEBRAMOS  E  CANDO  A  VIVIMOS  XUNTOS!!

 

FELIZ  DÍA  DAS  LETRAS  GALEGAS!! 

 

GALERÍA  DE  IMAXES

 

 

 

 

CLUB DE LECTURA (12 - 2025/2026)

   Como xa se está achegando o Día das Letras Galegas dedicado este ano á escritora Begoña Caamaño quixemos coñecer máis datos sobre ela co libro Os fíos de Begoña. Pequena biografía de Begoña Caamaño escrito por Eva Mejuto.

    Coa lectura destas páxinas puidemos achegarnos á súa biografía desde a infancia ata converterse nunha das voces máis importantes da radio, do activismo e da literatura galega. Tamén soubemos da súa loita contras as inxustizas e da súa defensa do galego e da igualdade fundando xunto a outras compañeiras MUGACOM (Mulleres Galegas da Comunicación).

    Pero ademais puidemos conversar sobre outros datos da súa biografía que tamén lles chamaron a atención aos membros do club como a mención aos "xogos reunidos", un conxunto de xogos que existía antes da era dixital para divertirse sen pantallas, ou que no verán preparaba os materias do curso seguinte.

   Tamén debatemos sobre a diferencia que se fai no libro entre "termos" amigos ou "sermos" e o que a autora chama o perigo da morte dos idiomas en relación co galego na nos comunidade educativa.

      En canto á súa obra, para a próxima sesión investigaremos sobre A Odisea para achegarnos máis á súa obra "Circe ou o pracer do azul" e sobre o Rei Artur e Morgana para comprender mellor a súa obra "Morgana en Esmelle". 

   Tamén prepararemos unha investigación sobre  lendas e mitoloxía do noso concello para a nosa participación na I Romaría das Letras Galegas. 

 

LETRAS GALEGAS: CERTAME DE DIVULGACIÓN

      Para rematar a Semana das Letras Galegas dedicada á poesía popular e ás cantareiras, fixemos entrega dos premios do Certame de Investigación Letras Galegas 2025 no que tiñan que resolver os cuestionarios que elaboramos utilizando o material publicado polo Seminario Galán sobre as homenaxeadas deste ano.

    Comezamos entregando un agasallo a todos os nenos e as nenas que decidiron participar neste certame de investigación  e despois entregamos os premios ao alumnado que fixo unha investigación perfecta sen ningún erro.

 

 

MOITAS  GRAZAS  POR  PARTICIPAR  E  FELIZ  DÍA  DAS  LETRAS  GALEGAS!!

 

LETRAS GALEGAS: Concerto Didáctico

 

     O Día das Letras Galegas deste ano está dedicado á poesía popular oral. Unha homenaxe que recoñece a importancia da poesía tradicional que acompañou á nosa sociedade desde sempre; pero o certo é que a poesía popular oral, tamén estivo sempre unida á música polo que o Día das Letras Galegas se personifica nas cantareiras Adolfina Casás, Rosa Casás, Eva Castiñeira e as Pandeireteiras de Mens (Malpica).

    Elas eran mulleres que axudaron á transmisión da nosa lingua mentres cantaban, escoitaban, traballaban ou se divertían. E todo iso a maioría facíano sen estudar música, só de oído!

   Nós quixemos sumarnos a esta conmemoración invitando ao cole a Alfonso Campos e Suso Verao, dous músicos do noso Concello que saben moito de música, de galego e de tradición oral.

   Con eles cantamos diferentes cantigas tradicionais galegas como "A saia da Carolina" e coñecemos a diferenza entre tradidional (que se transmite de xeración en xeración de forma anónima) ou popular (moi coñecido) como "O carro" que aínda que é unha obra de uator, é coñecida en toda Galicia.

 

   Tamén nos ensinaron que ademais dos instrumentos tradicionais, calquera obxecto se podía utilizar para acompañar as cantigas: tixolas, culleres, latas de pimentón ou un simple tubo que resoe a modo de baixo continuo.

   Despois continuaron interpretando outras cantigas tradicionais galegas como "Danza do Agrazón" ou "Miña naiciña, meu corazón"

 

     E cantigas propias do noso Concello, como unha regueifa de desamor ou  "San Adrián é Barqueiro" recollida na parroquia de Proendos que combina un alalá e unha muiñeira.

  Na tradición oral tamén xogan un papel importante as cancións infantís e por iso cantaron "Mursummus est Cristo que reine diné" recollida en Proendos e "Pedra, pedriña" coa colaboración de Estrela.

  E como se aprendían todas estas cantigas se as cantareiras non eran compositoras que escribrían partituras? Pois aprendíanse escoitando e para que non se perdan hai que facer un traballo de investigación e recollida gravando ás persoas que cantaban e pasando esas melodías a notas musicais que permitan que permanezan como legado musical.

      Por iso quixemos agradecerlle este concerto didáctico cun agasallo que lles axude a seguir recollendo a tradición musical da nosa zona.

 

  Se queredes saber máis sobre cantigas e música tradicional, podedes escoitar a entrevista que Candela, Martín e Antía lles fixeron en Radiuvín.

 

    MOITAS  GRAZAS  AOS  DOUS  POR  ESTE  RATIÑO ENTRE PASODOBRES, ALALÁS, MUIÑEIRAS, FOLIADAS, DANZAS, REGUEIFAS, VALSES...   

FELIZ  DÍA  DAS  LETRAS  GALEGAS!!

GALERÍA  DE  IMAXES