jueves, 31 de octubre de 2019

SAMAÍN 2019

   Cada ano, cando chega o Samaín ou Halloween propoñémoslle ao noso alumnado diferentes actividades:

- Lecturas de medo relacionadas con esta época do ano pero seleccionadas porque non queremos que os nosos nenos e nenas teñan pesadelos.

- Exposición de cabazas e outros obxectos terroríficos que poden traer das súas casas voluntariamente.

- Certame de creación literaria terrorífica para alumnado de 3º a 6º de Primaria. Neste certame, dámoslle ao alumnado o principio dun libro que eles deben continuar. Este ano os libros foron:
  Pola tarde, os autores dos relatos seleccionados foron os protagonistas das Lecturas de medo lendo as súas historias ao resto do alumnado.
 
  Se vós tamén queredes escoitar os relatos gañadores podedes facelo na emisión terrorífica de Radiuvín para a que utilizamos a seguinte música: "Ghost Story", "Come Play with Me", "Day of Chaos", "Awkward Meeting" e "Oppressive Gloom"  by Kevin MacLeod (https://incompetech.com)



     Ademais os nenos e nenas de 1º e 2º de Primaria bailaron e cantaron a canción "El murciélago" do libro Animales enCantadores de Susa Herrera

 

   Podedes velos bailar e cantar xunto cun resumo de todas as actividades no seguinte vídeo:



viernes, 25 de octubre de 2019

XORNADA BIBLIOTECA CREATIVA

   Temos a sorte de que o noso colexio este ano siga formando parte dos proxectos Radio na biblio e Biblioteca Creativa.

   Este venres, celebrouse en Santiago a Xornada Biblioteca Creativa na que participamos todos os centros galegos que forman parte deste proxecto.
   A xornada foi inaugurada por José Manuel Pinal Rodríguez (Director Xeral de Centros e Recursos Humanos) e tamén contou coa presenza de Carmen Pomar Tojo (Conselleira de Educación, Universidade e Formación Profesional).
 
   Para esta xornada, a Asesoría de Bibliotecas Escolares seleccionou o proxecto radiofónico colaborativo que levamos a cabo entre o CEIP A Pobra do Brollón e o noso como unha experiencia para expor aos outros centros escolares:  Coñecendo os nosos concellos.



    Nesta exposición Dora, directora e responsable de Biblioteca do CEIP de A Pobra, e Flora, responsable de biblioteca do noso centro; compartiron cos outros centros a orixe deste programa,  como se está desenvolvendo e a súa valoración. Ademais do marco curricular no que se encadra: obxectivos, contidos, estándares de aprendizaxe e competencias clave que se traballan con el.



   Para coñecer toda a información e escoitar as emisións destes programas, podedes seguir a etiqueta do noso blogue Coñecendo os nosos concellos ou acceder á presentación que realizamos.

     

   Desde o Equipo de Biblioteca, queremos dar as grazas a todos os compañeiros do cole que están e que xa non están porque eran provisionais pero que traballaron para sacar adiante estes proxectos, ao Concello de Sober pola saída didáctica organizada para coñecer de primeira man os nosos tesouros; á Asesoría de Bibliotecas por contar con esta experiencia e a Dora, unha magnífica compañeira para este proxecto.  

FORMACIÓN DE USUARIOS (I): VÍDEOS

    Sempre comezamos o curso escolar da biblioteca facendo unhas sesións de formación de usuarios nas que lle recordamos ao alumnado as normas da biblioteca, a clasificación dos fondos, o significado das etiquetas dos libros... todo o necesario para que poidan desenvovlerse nela.

  Este ano, esta formación fíxose co alumnado de 4º e 6º de Primaria que na materia Investigación e Tratamento da Información gravaron e produciron varios vídeos nos que recordaban todos estes aspectos. 

   OLLADE  ATENTOS!!
NORMAS  DA  BIBLIOTECA

QUE  PODEMOS  FACER  NA  BIBLIOTECA?

E  QUE  PODEMOS  FACER  NOS  ORDENADORES  E  NAS  TABLETS??
 

 RECORDAMOS  A  CDU
 

 A  CDU  NA  NOSA  BIBLIOTECA
 

QUE  INDICAN  AS  ETIQUETAS  DOS  LIBROS?

FONDOS  DE  LITERATURA  PARA  EDUCACIÓN  INFANTIL

jueves, 24 de octubre de 2019

DÍA DA BIBLIOTECA 2019: VISITA BPM

   Unha das actividades que nos gusta facer sempre polo Día da Biblioteca é visitar a Biblioteca Pública Municipal do noso concello. Unha visita na que a bibliotecaria, Julia Fernández Garza, nos lembra todas as posibilidades que a BPM nos ofrece.

   Ademais este ano puidemos disfrutar da exposición fotográfica Esgrafiados na Ribeira Sacra da man da súa autora Mar López Sotelo.
 

   Durante a exposición descubrimos que é un esgrafiado e a súa presenza na Ribeira Sacra, incluso en casas cercanas a algúns dos nosos nenos/as.
 
   Desde o centro queremos agradecer a Julia a organización desta visita e a Mar López que fose a nosa guía porque foi unha maneira estupenda de comezar este curso bibliotecario xa que coñecer o noso patrimonio  para respectalo e coidalo tamén é comezar a traballar no viveiro de cidadanía.

  E non queriamos rematar a visita sen felicitar á BPM polo seu aniversario, xa que este ano cumpre 25 anos; por iso, fixémoslle entrega dun agasallo que agora estará a disposición de todos os seus usuarios.

    Se vós tamén queredes saber que é un esgrafiado e coñecer moitas cousas sobre eles, podedes escoitar a entrevista que Mar López Sotelo nos concedeu en Radiuvín ou acceder ás súas redes sociais.

DÍA DA BIBLIOTECA 2019

    O 24 de outubro conmemórase desde 1997 o Día das Bibliotecas por iniciativa da Asociación Española de amigos do Libro Infantil e Xuvenil en recordo da destrución da biblioteca de Sarajevo durante a guerre dos Balcáns "co obxectivo de concienciar á sociedade da importancia da lectura e como homenaxe  e recoñecemento ao traballo dos bibliotecarios/as". Tamén da súa función como centros socializadores e integradores poñendo os fondos e recursos a disposición de todos os usuarios. 

    Estes obxectivos entroncan co lema das bibliotecas escolares deste ano Biblioteca Escolar: Viveiro de Cidadanía pois as bibliotecas son lugares de encontro coa cultura e lugares de encontro entre lectores de todas as idades o que fai delas un lugar inmellorable para traballar moitos valores necesarios para o desenvolvemento desa cidadanía.

    Nesta data, cada ano, un ilustrador/a e un autor/a son os encargados do deseño do cartel e da redacción do pregón.

    O cartel foi deseñado por Miguel Calatayud e o texto "A sen conto" por Gemma Pasqual

  Para saber máis sobre esta conmemoración e coñecer o pregón traducido ao galego por Héctor Cajaraville; podedes escoitar o primeiro programa de Radiuvín deste curso con música de Kevin MacLeod "The Descent"  (https://incompetech.com).


BO  DÍA  DAS  BIBLIOTECAS  A  TODOS!!

jueves, 17 de octubre de 2019

COÑECENDO OS NOSOS CONCELLOS. Programa 1 (19/20)

    XA  RECIBIMOS  A  PRIMEIRA  EMISIÓN  DO  PROGRAMA  COÑECENDO  OS  NOSOS  CONCELLOS  DESTE  CURSO!!!

   A CONTINUACIÓN  DEIXÁMOSVOS  A  SÚA  RESEÑA  E  O  ENLACE  Á  EMISIÓN:

    Este curso continuamos co proxecto intercentros de radio colaborativo co CEIP Virxe do Carme de Sober. 

    No seu último programa preguntábannos polos monumentos do noso concello así que acompañados polo técnico de cultura do concello, Xosé Gago, saímos de excursión para coñecer as igrexas románicas coas que conta o noso concello. 

   Outras fontes de información foron as veciñas Nélida, Admirable e Marga e Secundino, que nos contou unha lenda. Froito desta información emitimos o noso programa. 



NON  TARDAREMOS  EN  RESPOSTARVOS!!!

martes, 1 de octubre de 2019

BIBLIOTECA ESCOLAR, VIVEIRO DE CIDADANÍA (Texto: Asesoría de Bibliotecas Escolares)

   Xa coñecemos o lema escollido pola Consellería de Educación, Universidade e Formación Profesional para as bibliotecas do PLAMBE durante o curso 2019/2020: 

BIBLIOTECA  ESCOLAR, VIVEIRO  DE  CIDADANÍA

Ilustrador Óscar Villán
    «Cómpre sementar, crear ese hábitat axeitado para que os pequenos e as pequenas, os mozos e mozas vaian desenvolvendo a estima por si mesmos e polos recursos naturais e culturais á súa disposición, aprendan a convivir cos outros, adquiran paulatinamente os valores democráticos, o respecto polos Dereitos Humanos e a Cultura de Paz imprescindible para unha convivencia xusta, pacífica e enriquecedora para todos e todas.  

    A biblioteca escolar pode chegar a ser ese "viveiro de cidadanía" no que medren en confianza as xeracións novas e poidamos forxar esperanza fronte aos retos que o mundo actual nos presenta.»