DÍA DA BIBLIOTECA - 2018

     Xa chegou o Día da Biblioteca e con el un montón de actividades que tiñamos preparadas para conmemorar esta data:

     

      Primeiro presentamos as dúas novidades deste curso:  a CDU ilustrada de Óscar Villán  e o cartel co lema deste ano para as bibliotecas escolares: Poéticas diversas na biblioteca escolar de Nuria Díaz.

 

   Tamén comezamos coa formación de usuarioscos nenos de infantil e de primaria recordando as normas básicas da nosa biblioteca:

    A media mañá fomos de visita á Biblioteca Pública Municipal onde nos recibiron Julia Fernández Garza, a bibliotecaria, e Rocío Fernández, técnica informática do Concello, para falarnos de todas as posibilidades que nos ofrece a biblioteca: fondos, actividades, recursos, horario...

    Para nós é moi importante a colaboración entre as dúas bibliotecas, a escolar e a municipal, xa que os nosos alumnos e alumnas son parte dos seus usuarios e usuarias como podemos comprobar neste vídeo que elaboraron na BPM e que ten como protagonistas a algúns dos nosos alumnos que participan no programa de animación á lectura: Merenda con contos.

   E como mostra da colaboración entre as dúas bibliotecas, iniciamos alí o noso BREAK OUT, un xogo de formación de usuarios no que o noso alumnado terá que ir superando retos para conseguir abrir os candados que custodian o gran tesouro por descubrir.

    O primeiro reto foi para os alumnos de 4º e 5º de Educación Infantil. Eles tiñan que atopar na biblioteca os libros indicados na súa pista e acadar así a chave que abriría o primeiro candado.

 

 

  Con esta proba superada, entre todos levamos o noso tesouro para a biblioteca do colexio onde seguiremos superando probas que nos permitan descubrir que é o que esconde esta gran maleta.

 

GALERÍA  DE  IMAXES

DÍA DA BIBLIOTECA - Lemos LE

    Como todos sabedes, a nosa biblioteca e a BPM de Sober formamos parte do Colectivo Lemos LE que por sexto ano, ven de organizar un xantar de confraternidade para conmemorar o Día da Biblioteca que se celebra o 24 de outubro; no que nos reunimos persoas de todos os sectores relacionados coa cultura, a lectura e a educación da nosa comarca.

    Nesta ocasión a reunión tivo lugar no Concello de Bóveda, por iso, comezamos esta xuntanza escoitando a Miriam Palmón, bibliotecaria do Concello anfitrión e a Cristina Juíz López  Concelleira de Cultura para darnos a benvida ao Colectivo e a todos os asistentes.

    Antes de xantar tamén puidemos escoitar na voz de Mónica, bibliotecaria do Saviñao, o texto co que a escritora do mesmo concello, Alicia Fernández, nos agasallou con motivo desta celebración.

     E como recordo para os participantes nesta xuntanza, editamos un marcapáxinas co texto co que o ano pasado nos agasallou Ramón Sandoval, un texto que podedes ler aquí e que fala da súa relación persoal coa lectura e cos libros e que ademais fala do noso Concello xa que el é soberino.

    Despois de xantar, centrámonos no V Certame Mulleres de Lemos. Unha muller para o 8 de marzo adicado a Genoveva González Prieto.

   Para isto, da man do Centro de Información á Muller, fixemos un visionado do conto baseado na súa vida escrito por Mirian Palmón Díaz e ilustrado polo alumnado de centros de Primaria da Comarca coma o noso.

    Despois desta fermosa proxección, membros do colectivo fixeron entrega dos premios correspondentes ao Certame Mulleres de Lemos:

    1º PREMIO BANDA DESEÑADA: para Samanta López Vázquez e Celine Varela Zher (quen non puido acompañarnos no xantar) pola atmosfera poética que a impregna e que a través dun debuxo, que en ocasións se achega case á abstracción, consegue ofrecer unha narrativa visual moi interesante. Trátase dun debuxo maduro no que se xoga co uso da perspectiva e dos distintos planos para lograr cambios de ritmo que conseguen acrecentar o interese e a atención pola historia.

    ACCÉSIT  BANDA  DESEÑADA para Víctor Domínguez polo gran coidado no seu acabado e presentación, así como o traballo, a limpeza das liñas e a personalidade do debuxo.

    CATEGORÍA DIVULGACIÓN para Julio González Puente polo seu traballo A escola de Genoveva no que de forma autobiográfica relata a importancia desta mestra na súa educación.

   Con esta entrega de premios damos por rematado o V Certame e adiantamos que a VI edición terá como protagonista a unha muller do Concello de Ferreira de Pantón

   O acto finalizou cunhas verbas de José Manuel Arias López, alcalde de Bóveda, concello anfitrión nesta edición.

FELIZ  DÍA  DA  BIBLIOTECA!!

Membros do Colectivo Lemos Le

O alcalde de Sober celebra con nós esta data.

Algunhas mestras do colectivo

 

BIBLIOTECA CREATIVA: Xornada de formación

    Este venres 55 centros asistimos á xornada de formación do proxecto Biblioteca Creativa; antes Proxecto Escornabots.

    Desta xornada vimos cargadiños de ideas e proxectos para levar a cabo na nosa biblioteca e tamén con novos fondos.

  Pola tarde compartimos a nosa experiencia co resto de centros asistentes dando as grazas a Asesoría por contar co noso centro para esta parte da xornada de formación; podedes ver un resumo da intervención a partir do minuto 6.

 

 

  E para rematar levamos unha sorpresa cando vimos algunhas imaxes da nosa biblioteca na exposición de final da Asesoría de Bibliotecas Escolares

POÉTICAS DIVERSAS NA BIBLIOTECA ESCOLAR (Texto: Asesoría Bibliotecas Escolares)

    Hoxe coñecimos o lema escollido pola Consellería de Cultura, Educación e Ordenación Universitaria para as bibliotecas do PLAMBE durante o curso 2018/2019: 

"Poéticas diversas na biblioteca escolar"

Imaxe de  Nuria Díaz

    "A poesía está por todas partes, o que importa é explorar para descubrila. A biblioteca escolar é un lugar privilexiado para estimular esa mirada que xogue a descubrir a poesía que se agocha nas paisaxes, na música, no cine, nunha noite estrelada, no baile do vento na herba, nos seres minúsculos que só podemos ver a través do microscopio, nesa música que engaiola, na palabra dos poetas, na tradición oral, nun texto que nos traspasa e nos obriga a mirarnos, nesa persoa que nos axuda a abrir os ollos para ver o que nos rodea, no último descubrimento científico (eses escutoides descoñecidos até agora), nesa voz que nos fala, nese abrazo que nos agarima..."

Texto: Asesoría Bibliotecas Escolares 

BRAULIOTUBER NA NOSA BIBLIOTECA

    Hoxe tivemos na biblioteca do colexio un invitado moi especial: Braulio, un dos irmáns Bolechas, que xunto co resto dos membros da súa familia é protagonista de moitos dos nosos libros infantís.

   E por que credes que nos fixo esta visita??

   Pois para gravar o programa infantil da TVG BraulioTuber, un programa moi divertido que terá como protagonistas aos nosos alumnos e alumnas de 6º de infantil e 1º de Primaria.

   A actividade comezou explicándolles aos nenos o funcionamento dos equipamentos que ían a utilizar: microfónos, cámara...

   Unha vez familiarizados cos medios técnicos comezaron a gravación:

 

 

   E para rematar... que tal un pouco de música e baile?

Avisáremosvos da súa emisión,
SEGURO  QUE  SERÁ  UN  PROGRAMA  ESPECTACULAR E  MOI  DIVERTIDO!!

GALERÍA  DE  IMAXES

COMPARTINDO BOAS PRÁCTICAS. Encontros de intercambio de experiencias educativas

   Este fin de semana, tiveron lugar en Lugo os Encontros de intercambio de experiencias educativas: Compartindo boas prácticas organizados polo Centro de Formación e Recursos (Cefore) de Lugo para dar visibilidade ao traballo desenvolvido en diferentes centros a partir da formación recibida nos plans de formación permanente do profesorado.

   Neses encontros estivemos compartindo con outros centros da provinvia de Lugo o proceso polo que fomos incorporando á nosa biblioteca novos espazos, novas linguaxes, novas metodoloxías... a medida que fomos participando nos proxectos de Bibliotecas Escolares como o Proxecto escornabots na biblioteca escolar e nos fomos formando cos PFPP.

   Podedes acceder a toda a información e documentación destes encontros no seguinte enlace: