SEMANA DA MULLER: MULLERES NA HISTORIA

   Dentro do proxecto "Un pouco de historia" que estamos desenvolvendo, conmemoramos o Día da Muller coa actividade: Mulleres na historia. Durante o desenvolvemento desta actividade, cada día  da semana candansúa clase presentounos a unha muller importante de cada época histórica.

  Comezaron o luns os nenos e nenas de Ed. Infantil contándonos o conto "A troglodita" escrito por Paula Merlán. A súa protagonista, Alicia, pinta animais prehistóricos, viaxa en Bisonte Express, coa súa gritapedra espanta os rinocerontes laúdos e traballa pintando covas mentres a súa parella Funo, coidaba do fogar.

  O martes o alumnado de 1º e 2º foi o encargado de falarnos de Exipto. Os nenos e as nenas de 1º achegáronnos á figura de Nefertiti e os de 2º, fixeron o propio con Cleopatra.

   As crianzas de 3º e 4º explicáronnos o mércores moitas cousas interesantes sobre dúas mulleres viquingas: Aud, a Sabia que tivo coraxe para ser a líder do seu propio barco viquingo e  Sigrid, a Altiva a muller valente que non tiña medo.

   Grecia é a época atribuída a 5º de primaria. Este curso presentounos o xoves a Theano de Crotona, unha matemática grega que tamén fixo descubrementos de medicina e física. Ela desenvolveu varios tratados matemáticos sobre poliedros rectangulares, a teoría da proporción e a proporción áurea. 

    Rematamos este proxecto o venres con Hipatía de Alejandría, presentada polo alumnado de 6º de primaria. Unha muller científica, filósofa neoplatónica e mestra, que contribuíu ao desenvolvemento das matemáticas e da astronomía da época.

   Podedes escoitar a biografía destas mulleres contadas polo alumnado do centro no seguinte podcast.

 

BAILAMOS TOD@S

  Dentro da conmemoración do Día da Muller, realizamos na biblioteca a actividade BAILAMOS TOD@S organizada pola ANPA a través de FACAPEL co grupo TROUPELEAR.

    A finalidade deste obradoiro esta desterrar roles de xénero a través de xogos bailados da nosa tradición dándolles unha perspectiva diferente para achegalos aos nosos días.

    Así xs nosxs alumnxs cantaron, percutiron e realizaron diferentes bailes que lles axudaron a tomar conciencia dos seus corpos e dos corpos dos demais e a  interaccionar entre eles.

 

MOITAS  GRAZAS á ANPA por organizar esta actividade tan interesante e divertida coa que seguir creando conciencia de xénero.

GALERÍA  DE  IMAXES

PROXECTO "OS PINGÜÍNS" (III)

    Durante o transcurso do proxecto o alumnado de Primaria fixo unha videoconferencia coa Base Antártica Española "Gabriel de Castilla" e desde alí ofrecéronnos a posibilidade de que as aulas apadriñaran un pingüín. 

 

    As crianzas quedaron alucinadas de que puideran poñerlle nome que quixeran a un pingüín de verdade e comezaron a pensar en como lles gustaría que se chamara.

 

    Así xurdiu un proceso de elección no que cada un deu un nome e logo votaron ao que máis lles gustaba. Ao final quedaron soamente tres, entre o que saiu o gañador: SALTARÍN!!! 

Que ledicia levaron cando chegou o diploma do "seu" pingüín! 

  Aproveitando todo o traballo que levaban feito sobre este tema, para conmemorar o Día Internacional da Muller, o 8 de marzo, coñeceron a figura de Josefina Castellví.

    Josefina, ou Pepita como lle gustaba que lle chamaran, foi unha das primeiras mulleres en participar nunha expedición internacional na Antártida e a primeira muller en dirixir a Base Antártica española Juan Carlos I.

  Primeiro elaboraron entre todos un gran mural de Josefina empregando diferentes técnicas e materiais, que agora decora o corredor das aulas de infantil e logo, cada neno fixo unha ficha individual para leval de recordo para a casa.

8M - MULLERES E XOGOS OLÍMPICOS

   Seguimos co proxecto dos Xogos Olímpicos e para o Día da Muller quixemos investigar sobre o papel das mulleres nestes xogos ao longo da historia.

  Comezamos esta investigación pola Antiga Grecia onde as mulleres non podían participar; pero descubrimos que existían os xogos Hereos que eran xogos na honra da deusa Heras, esposa de Zeus nos que as mulleres competían en problas atléticas.

   Despois investigamos sobre a primeira vez que as mulleres puideron participar nos Xogos Olímpicos e descubrimos que foi en 1900 en París nas disciplinas de golf, tenis e tiro con arco e tamén descubrimos que a primeira vez que unha española se clasificou para participar nuns xogos foi en 1920, a desportista Lili Álvarez que era tenista, xogadora de billar, piloto de coche de carreiras... pero por lesión non puido participar ata 1924.

    Tamén nos xurdiu a dúbida de cales serían as primeiras mulleres en acadar unha medalla a nivel mundial e cal a primeira española.

 

   A continuación quixemos saber cales eran as con máis medallas e descubrimos que o ranking mundial o encabezan mulleres como Larisa Latynina (ximnasta da Unión Soviética, 18 medallas), Birgit Fischer (piragüista alemá, 12 medallas), Jenny Thompson (nadadora estadounidense, 12 medallas) ou Věra Čáslavská (ximnasta, 11 medallas)

   E que as primeiras mulleres do medalleiro olímpico español son Mireia Belmonte (natación, 4 medallas), Andrea Fuentes (natación sincronizada, 4 medallas) e Arantxa Sánchez Vicario (tenis, 4 medallas).

   Despois elaboramos un mural que nos serviu de base para compartir toda esta información co resto do alumnado do colexio.

  E fixemos unha reflexión sobre a muller á que nos lle daríamos a medalla de ouro das nosas vidas.

  Esperamos que todo o falado hoxe sirva para que o noso alumnado reflexione sobre a importancia da igualdade de xénero en todos os ámbitos da vida.

 

8M: DÍA INTERNACIONAL DA MULLER

  O Día Internacional da Muller deste ano 2023 xira en torno ao seguinte lema: "Por un mundo dixital inclusivo: innovación e tecnoloxía par a igualdade de xénero".

  Tamén a igualdade de xénero ten un obxectivo propio na Axenda 2030 que é o obxectivo 5: Lograr a igualdade entre os xéneros e empoderar a todas as mulleres e nenas. 

  Na nosa biblioteca traballamos co concepto de igualdade durante todo o ano pero nestas datas intensificamos o traballo con diferentes actividades que compartimos a continuación:

 

 OBRADOIRO  DE  VISIBILIDADE

 

Este obradoiro foi unha actividade proposta polo Concello de Sober na que o noso alumnado tiña que escribir nos seus globos o nome de mulleres referentes para eles; podían ser mulleres que destacaran en diferentes campos ou mulleres da súa contorna ou familia.

 

    Para as mestras do cole foi unha sorpresa ver que entre os nomes de científicas, activistas, nais ou avoas aparecían tamén os nosos nomes e os das cociñeiras de xeito espontáneo. Foi un pracer sentir este recoñecemento dos nenos e nenas ao cariño e traballo que lles dedicamos todos os días; moitas grazas!!

 Despois con eses globos fíxose un gran 8M que se levou á Praza do Concello para que todo o mundo poida velo e reflexionar sobre o día de hoxe.

 

ALFABETO  DE  MULLERES  RELEVANTES

 

   Outra das actividades que se fixeron foi a elaboración deste mural a partir do libro El ABC de las mujeres que han hecho historia escrito por  Miriam Payá López (@MiriamiTaP) no que se recollen mulleres relevantes en ámbitos moi diversos: ciencia, deporte, televisión, literatura, medio ambiente, paz, igualdade, política...

 

 WOMEN´S  DAY

   Como somos un centro plurilingüe, o departamento de plástica coa axuda de Aly, a nosa auxiliar de conversa, elaborou un mural para esta conmemoración e un vídeo en inglés con subtítulos en galego co que coñeceredes os motivos polos que se celebra esta data e algunhas mulleres importantes da historia.

 

 

   Ademais na parte final do video poderedes ver a todo o alumnado do centro cos debuxos que fixeron das mulleres que son importantes para eles/elas.

DÍA INTERNACIONAL DA MULLER: A PITA XEFA

   O 8 de marzo conmemórase o Día Internacional da Muller.

   Desde o colexio, este ano quixemos facer fincapé na loita contra os estereotipos partindo do libro  A pita xefa  de Marta Lado que foi o gañador do III Premio Fina Casalderrey de Literatura Infantil pola Igualdade (2021).

   Varios biblioaxudantes foron os que leron esta historia na que coñecemos a Coro, a galiña protagonista que ten grandes sonos e quere chegar a ser xefa do galiñeiro sen entender que o señor Quiríaco, só por ser galo, teña que ser o que mande; estaba farta de oír aquel refrán antigo que sempre funcionara no galiñeiro: "Os galos mandan, e as galiñas apandan"

     Tamén coñeceremos a galiñas que fan cousas moi diversas: malabares con ovos, partir leña facendo kárate, bailar claqué, deseñar prototipos... 

   Ao longo da historia, vemos como o resto das galiñas do galiñeiro van comenzando a pensar que igual Coro ten razón e que ao mellor unha pita pode ser xefa.

  Pouco a pouco decátanse de que as galiñas poden facer o que queiran así que, para que Coro poida voar tan alto como o galo e convertirse na xefa do galiñeiro; a galiña enxeñeira deseña unha estrutura que todas as demais enchen coas súas propias plumas de xeito que ao final Coro pode voar ao alto do poleiro e cantar o seu ulululúúúú.

    Para rematar, a través da unión de todas, acadarán o seu obxectivo: cambiar as normas do galiñeiro! E para iso fundaron un Consello de anciáns no que incluían ao señor Quiríaco e tamén unha comisión de innovación. 

 

 Despois de ler o libro quixemos recrear a súa portada con plumas pintadas por cada un dos nenos e das nenas do colexio para axudar a Coro a voar, pois tanto os nenos como as nenas temos que loitar para acadar unha ruptura real dos estereotipos de xénero.

 

   E  agora un pequeno exercicio para rematar:

1º) Pensade na persoa que manda nunha empresa e que está presidindo unha reunión nunha mesa moi longa.

2º) Contestade sendo sinceiros... pensastedes nun xefe ou nunha xefa?

LOITEMOS  CONTRA  OS  ESTEREOTIPOS!!