ENCONTROS BIBLIOTECAS ESCOLARES DE GALICIA

    Como cada ano, participamos nos Encontros de Bibliotecas Escolares de Galicia celebrados no Palacio de Congresos de Santiago de Compostela para formarnos sobre temas tan interesantes como o futuro das bibliotecas, o poder TRANSformador da biblioteca na educación do S. XXI, a inclusión de videoxogos como un recurso máis da biblio, os libros de non-ficción e a plataforma ELBE.2 da que vos falaremos en breve.

   Ademais tivemos un momentiño para coñecernos e sacarnos unha fotografía case todos os responsables das bibliotecas escolares da provincia de Lugo.

XORNADA BIBLIOTECA CREATIVA 2021 - 2022

   Esta venres tivo lugar a Xornada de Biblioteca Creativa 2021-22, unha xornada  foi inaugurada por Román Rodríguez, Conselleiro de Cultura, Educación e O. U. e nas que participamos todos os centros que formamos parte do proxecto Biblioteca Creativa.

 

     Nesta xornada aprendemos moito sobre xogos e aprendizaxe basado en xogos, explotamos a nosa creatividade con talleres específicos e ademais a Asesoría de Bibliotecas Escolares contou co noso centro para expor o noso traballo na parte referida a "Dinamización do espazo creativo" onde participamos coa presentación do mesmo nome que podedes consultar a continuación:

  

  Queremos darlle as grazas á Asesoría de Bibliotecas por ternos escollido entre todos os centros que participan, pois esta elección é un orgullo para nós xa que recoñece o traballo que realizamos no eido das alfabetizacións múltiples, da robótica e dos laboratorios creativos de aprendizaxe.

   Para min, como mestra encargada do proxecto, é unha honra representar ao colexio e compartir o noso traballo ante mestres de toda Galicia. Pero tamén quero darlle as grazas a todas as persoas da Comunidade Educativa e fóra dela que colaboran con nós en todos os nosos proxectos.

IX XORNADAS DE BIBLIOTECAS ESCOLARES DE GALICIA

    Este fin de semana celebráronse en Santiago de Compostela as IX Xornadas de Bibliotecas Escolares de Galicia e ata alí fomos a directora e a encargada de biblioteca para formarnos, traer un montón de ideas na cabeciña e compartir con outros 1.000 mestres inquedanzas sobre o traballo que realizamos nas diferentes bibliotecas.

    Ademais atopámonos cunha gran sorpresa xa que a libreta que publica a Asesoría de Bibliotecas Escolares cada curso e que chega a todas as bibliotecas escolares de Galicia, leva un pedaciño do noso cole.

 

VIII XORNADAS BIBLIOTECAS ESCOLARES DE GALICIA

   Esta fin de semana tiveron lugar as VIII Xornadas de Bibliotecas Escolares de Galicia; unhas xornadas que foron inauguradas por Román Rodríguez, Conselleiro de Cultura, Educación e O. U. e nas que participamos máis dun milleiro de mestres. 

 

    Nesta ocasión a Asesoría de Bibliotecas Escolares contou por segundo ano co noso centro para expor o noso traballo na parte referida a "Biblioteca escolar, base de exploracións" onde participamos coa presentación Queres argallar? Escornabots e espazo maker na biblioteca escolar de Sober que podedes consultar a continuación

  Queremos darlle as grazas á Asesoría de Bibliotecas por ternos escollido entre todos os centros que participan, pois esta elección é un orgullo para nós xa que recoñece o traballo que realizamos no eido das alfabetizacións múltiples, a robótica e os laboratorios creativos de aprendizaxe.

   Para min, como mestra encargada do proxecto, é unha honra representar ao colexio e compartir o noso traballo ante mestres de toda Galicia.

    Para rematar, desde o Equipo de Biblioteca queremos dar grazas a todas as persoas que colaboraron con nós na posta en marcha e funcionamento deste proxecto; sobre todo a Elías e Rocío, papás que voluntariamente viñeron durante boa parte do curso a traballar a linguaxe de programación co alumnado de Primaria de xeito desinteresado e que supuxeron un gran apoio.

MÁIS  IMAXES  DA  XORNADA

VII XORNADAS BIBLIOTECAS ESCOLARES DE GALICIA

   Este ano, a Asesoría de Bibliotecas Escolares de Galicia contou co noso centro para a organización dunha ponencia nas VII Xornadas de Bibliotecas Escolares; concretamente na parte referida a Experiencias salientables no tratamento de distintos ámbitos de actuación na Biblioteca Escolar.

 

   Nestas xornadas, que foron inauguradas conselleiro de Cultura, Educación e Ordenación Universitaria, Román Rodríguez, participaron máis dun milleiro de mestres. 

    Para nós é un orgullo esta elección xa que recoñece a nosa labor e o noso traballo durante os últimos anos; unha labor que está dando froitos tanto no ámbito académico onde o alumnado está a obter mellores resultados; como noutros ámbitos externos ao centro onde os alumnos e alumnas acadaron varios premios a nivel provinvial e nacional.

 

    Para min, como mestra encargada do Equipo de Biblioteca, foi unha honra representar ao colexio e compartir o noso traballo ante mestres de toda Galicia baixo o título A biblioteca día a día: actividades e recursos. A continuación un momento da ponencia e o enlace á presentación que serviu de guión para ela.

    A biblioteca día a día: actividades e recursos

    Para rematar, desde o Equipo queremos dar grazas a todas as persoas que colaboraron con nós na posta en marcha e no funcionamento deste proxecto de biblioteca:
       - aos mestres e mestras provisionais e itinerantes que pasaron polo noso colexio nestes cursos;
       - ás familias e á ANPA que sempre que lles pedimos axuda e colaboración, nola conceden;
       - ao Concello de Sober sempre disposto a apoiarnos,
      - a Julia Fernández Garza, bibiotecaria da BPM de Sober pola súa axuda e polo seu ánimo en momentos de desconcerto
     - e as mestras encargadas das Bibliotecas Escolares da nosa zona que levaban máis tempo no PLAMBE e que colaboraron con nós para que a nosa biblioteca formara parte desta rede; destacando o apoio de Celsa Varela e Dora Fernández.

Algúns momentos das xornadas: