SEMANA DA EDUCACIÓN VIAL

    Durante esta semana a mestra de Educación Física desenvolveu un Proxecto de Educación Vial con todo o alumnado do colexio; para isto fixo un gran circuíto vial no pavillón do colexio que os nenos e as nenas percorreron cos triciclos, bicicletas ou patinetes que trouxeron das súas casas.

 

   Desde a biblioteca colaboramos con este proxecto facendo agasallos coa impresora 3D para o alumnado participante. Unha medalla de elaboración propia con Doodle 3D e unha bicicleta descargada de thingiverse (Bicicleta miniatura Keila_Ortega).

 

 

 

O VERDADEIRO COELLO DE PASCUA

     A piques de comezar as vacacións de Semana Santa, o alumnado do cole tivo que enfrontarse a unha busca do tesouro de Pascua.

    Para comezar os biblioaxudantes de 6º léronnos a fábula "O verdadeiro coello de Pascua"  que conta a historia dunha familia de coellos que debe entregar os ovos de Pascua aos nenos da casa verde con xardín.

 

   Despois do conto os nenos e as nenas dividíronse por equipos de coellos de cores coas súas graciosas orellas.

   E a continuación comezou a busca do tesouro para a que tiñan que superar diferentes probas pero para saber por onde tiñan que comezar tiñan que descifrar a primeira pista en inglés.

   A primeira proba era doada se estiveron atentos á fabula xa que se trataba de resolver un encrucillado con datos da historia.

   A segunda proba era un circuíto de equilibrio para coellos no Salón de Actos.

 A terceira fase que había que superar unha proba de puntería.

 Na cuarta proba os coelliños  e coelliñas  tiveron que facer unha carreira de saltos.

O penúltimo reto consistía en facer dous coelliños co trangram clásico e resolver un tangram oval impreso coa impresora 3D.

A última proba era conseguir poñer a salvo os ovos de Pascua para poder entregalos aos nenos da casa verde con xardín.

 Unha vez rematado o xogo e con todas as probas superadas, os equipos puideron saborear os doces ovos de chocolate!!

 Para acabar o día, o alumnado puido disfrutar dunha sesión de cine na biblioteca.

GALERÍA  DE  IMAXES 

 

POSTAIS E AGASALLOS DE NADAL

   Para as postais e os agasallos de Nadal deste ano, o alumnado de primaria do colexio estivo argallando coa impresora 3D e o programa Doodle 3D co que elaboraron os seus propios deseños.

    Fixeron fermosos bonecos de neve (con ou sen neve), agasallos con lazos de corazón, galletas de xenxibre e bólas para a árbore de Nadal.

   Ademais de deseñar estes obxectos foron quen de adaptalos par utilizalos nas postais de Nadal. Tamén usaron uns lazos que descargamos de thingiverse (by Colorme3D)

  Despois presentamos estas postais ao certame de postais do Concello de Sober xunto coas do alumnado do Infantil que fixo as súas utilizando as pegadas das súas mans.

   Por esta participación no certame, o Concello agasallounos cun diploma e un par de xogos novos para a nosa biblioteca.

FELIZ  NADAL  A  TODOS!!

GALERÍA  DE  IMAXES

XII SEMANA DA MÚSICA 2024: A TROMPETA

     Como xa é tradición, polo mes de novembro coincidindo co día de Santa Icía, celebramos a Semana da Música que este ano cumpre 12 edicións. 

    A finalidade desta actividade é coñecer mellor un instrumento musical. En anos anteriores coñecemos ao piano, á guitarra, á familia do vento madeira, a instrumentos tradicionais galegos... e este ano tocoulle a quenda á familia do vento metal, concretamente, á trompeta.

    Durante esta semana o alumnado do centro tivo que resolver os diferentes retos que aparecían diariamente na entrada da biblioteca investigando e descubrindo moitas cousas sobre a trompeta.

 

    Para rematar a semana tivemos unha exposición didáctica a cargo de José Nazario Rodríguez, mestre de trompeta na Escola Municipal de Música de Sober, que ademais é tío da nosa alumna Candela e ex-alumno do centro.

  El ensinounos moitas cousas sobre este intrumento: un pouco da historia, como se produce o son, as súas partes, que finalidade teñen os pistóns...

    Tamén nos presentou varios tipos de trompetas e nos ensinou a diferenza entre a trompeta e o fliscornio (agora xa sabemos que non son da mesma familia aínda que se parezan).

      Ademais Nazario nos ensinou diferentes sordinas que son accesorios que se colocan na campá da trompeta e serven para modificar o seu timbre ou baixar o volume.

     A explicación completouse coa colaboración de Manuel Vázquez e a interpretación dun dúo entre mestre e alumno. 

   Para finalizar Nazario fixo entrega dos agasallos do certame de investigación a entre os que había unhas boquilllas de trompeta e unhas claves de sol  impresas en 3D.

 

 

    E non podíamos dar por rematada esta actividade sen que o noso convidado pasara polos estudos de Radiuvín para compartir con Candela e Noa unha entrevista que podedes escoitar no seguinte podcast. 

MOITAS  GRAZAS  POR  ESTE  CONCERTO  DIDÁCTICO!!

 

FELIZ  DÍA  DE  SANTA  ICÍA!!!

 GALERÍA  DE  IMAXES