LETRAS GALEGAS: CERTAME DE DIVULGACIÓN

      Para rematar a Semana das Letras Galegas dedicada á poesía popular e ás cantareiras, fixemos entrega dos premios do Certame de Investigación Letras Galegas 2025 no que tiñan que resolver os cuestionarios que elaboramos utilizando o material publicado polo Seminario Galán sobre as homenaxeadas deste ano.

    Comezamos entregando un agasallo a todos os nenos e as nenas que decidiron participar neste certame de investigación  e despois entregamos os premios ao alumnado que fixo unha investigación perfecta sen ningún erro.

 

 

MOITAS  GRAZAS  POR  PARTICIPAR  E  FELIZ  DÍA  DAS  LETRAS  GALEGAS!!

 

LETRAS GALEGAS: Concerto Didáctico

 

     O Día das Letras Galegas deste ano está dedicado á poesía popular oral. Unha homenaxe que recoñece a importancia da poesía tradicional que acompañou á nosa sociedade desde sempre; pero o certo é que a poesía popular oral, tamén estivo sempre unida á música polo que o Día das Letras Galegas se personifica nas cantareiras Adolfina Casás, Rosa Casás, Eva Castiñeira e as Pandeireteiras de Mens (Malpica).

    Elas eran mulleres que axudaron á transmisión da nosa lingua mentres cantaban, escoitaban, traballaban ou se divertían. E todo iso a maioría facíano sen estudar música, só de oído!

   Nós quixemos sumarnos a esta conmemoración invitando ao cole a Alfonso Campos e Suso Verao, dous músicos do noso Concello que saben moito de música, de galego e de tradición oral.

   Con eles cantamos diferentes cantigas tradicionais galegas como "A saia da Carolina" e coñecemos a diferenza entre tradidional (que se transmite de xeración en xeración de forma anónima) ou popular (moi coñecido) como "O carro" que aínda que é unha obra de uator, é coñecida en toda Galicia.

 

   Tamén nos ensinaron que ademais dos instrumentos tradicionais, calquera obxecto se podía utilizar para acompañar as cantigas: tixolas, culleres, latas de pimentón ou un simple tubo que resoe a modo de baixo continuo.

   Despois continuaron interpretando outras cantigas tradicionais galegas como "Danza do Agrazón" ou "Miña naiciña, meu corazón"

 

     E cantigas propias do noso Concello, como unha regueifa de desamor ou  "San Adrián é Barqueiro" recollida na parroquia de Proendos que combina un alalá e unha muiñeira.

  Na tradición oral tamén xogan un papel importante as cancións infantís e por iso cantaron "Mursummus est Cristo que reine diné" recollida en Proendos e "Pedra, pedriña" coa colaboración de Estrela.

  E como se aprendían todas estas cantigas se as cantareiras non eran compositoras que escribrían partituras? Pois aprendíanse escoitando e para que non se perdan hai que facer un traballo de investigación e recollida gravando ás persoas que cantaban e pasando esas melodías a notas musicais que permitan que permanezan como legado musical.

      Por iso quixemos agradecerlle este concerto didáctico cun agasallo que lles axude a seguir recollendo a tradición musical da nosa zona.

 

  Se queredes saber máis sobre cantigas e música tradicional, podedes escoitar a entrevista que Candela, Martín e Antía lles fixeron en Radiuvín.

 

    MOITAS  GRAZAS  AOS  DOUS  POR  ESTE  RATIÑO ENTRE PASODOBRES, ALALÁS, MUIÑEIRAS, FOLIADAS, DANZAS, REGUEIFAS, VALSES...   

FELIZ  DÍA  DAS  LETRAS  GALEGAS!!

GALERÍA  DE  IMAXES

 

LETRAS GALEGAS 2025: OS DARDOS DAS CANTAREIRAS

  O Día das Letras 2025 está dedicado ás cantareiras e ás cantigas tradicionais galegas.

  Durante esta semana estamos publicando diferentes recursos relacionados coas homenaxeadas deste ano. Hoxe publicamos o XOGO  DE  DARDOS  DAS  CANTAREIRAS? compartido polo Seminario Galán.

LETRAS GALEGAS 2025: QUE SABES DAS CANTAREIRAS?

 O Día das Letras 2025 está dedicado ás cantareiras e ás cantigas tradicionais galegas.

  Durante esta semana estamos publicando diferentes recursos relacionados coas homenaxeadas deste ano. Hoxe compartimos o genially QUE  SABES  DAS  CANTAREIRAS? compartido polo Seminario Galán.

LETRAS GALEGAS 2025: OS INSTRUMENTOS MUSICAIS

   O Día das Letras 2025 está dedicado ás cantareiras e ás cantigas tradicionais galegas.

  Durante estes días iremos publicando diferentes recursos relacionados coas homenaxeadas deste ano. Comezamos con un genially sobre os INSTRUMENTOS  TRADICIONAIS  GALEGOS (Genially compartido polo Seminario Galán)

AS FAMILIAS CONTAN: Familia de Manuel V.

     Para rematar as actividades sobre Luísa Villalta, autora homenaxeada este ano polo Día das Letras Galegas, Noelia e Manuel viñeron a lernos o libro Sempre infinita. Luísa Villalta escrito por Eva Mejuto e ilustrado por Bea Gregores.

  

   Con este libro ampliamos coñecementos sobre a súa biografía intercalando datos da súa vida con fragmentos da súa obra.

    Escoitándooss soubemos da súa loita contra a desigualdade da muller, contras as inxustizas e a guerra; e á vez da súa loita pola defensa de Galiza e do galego.

    E tamén escoitamos na voz de Manuel fragmentos de obras como O oco da palabra, Alma de Beiramar, Concerto para un home só, Ruído... rematando con este anaco de En concreto:

Esa son eu

rubindo unha e outra vez as escadas

dun mundo posíbel

separado sempre pola idade, a teima

e a vontade íntima de voar

MOITAS  GRAZAS  AOS  DOUS  POR  ESTA  LECTURA  E  POR  DEIXARNOS  O  LIBRO  COMO  AGASALLO!

SEMPRE  É  UN  PRACER  ESCOITARVOS!!

 

GALERÍA  DE  IMAXES

 

SEMANA DAS LETRAS GALEGAS: xoves

    Para rematar a Semana das Letras Galegas con actividades dedicadas a Luísa Villalta, fixemos entrega dos premio acadados no Certame de Investigación Letras Galegas.

   Primeiro démoslle un agasallo a todos os nenos e as nenas que decidiron participar neste certame investigando sobre Luísa Villalta e a súa obra.

  Despois entregamos os premios a todos aqueles nenos e nenas que fixeron unha investigación perfecta sen ningún erro. Este premio consistiu nun libro e nun chaveiro co mapa de Galicia impreso en 3D.

FELIZ  DÍA  DAS  LETRAS  GALEGAS!!

SEMANA DAS LETRAS GALEGAS: martes e mércores

     O martes e o mércores adicámolos a traballar con varios textos da autora de diferentes xéneros literarios. Os biblioaxudantes Candela, Martín,  Nayara e Daniela que tamén son membros do club de lectura foron as encargadas de preparar a lectura dos textos para o resto do alumnado.

  Despois de escoitalas fixemos unhas fichas relacionadas cos textos lidos repartidos en grupos internivel.

SEMANA DAS LETRAS GALEGAS: luns

 Durante a Semana das Letras Galegas, o alumnado do cole estivo desenvolvendo varias actividades arredor da escritora Luísa Villalta homenaxeada este ano.

   Primeiro achegámonos á súa biografía da man dos biblioaxudantes Carlota, Germán e Javier que como tamén son membros do club de lectura, xa coñecían a esta autora polo traballo realizado nas últimas sesións do club e con esa información prepararon un resumo da súa vida ademais de compartir co resto do alumnado o vídeo elaborado polo alumnado do CEIP Chans - Bembrive coa música "I love it" de Icona Pop con letra e voz de Ana M. García.

   Despois presentamos o Certame de Investigación Letras Galegas sobre o autora homenaxeada no que lle propuxemos ao alumnado unha batería de preguntas sobre a súa vida e a súa obra basadas no material publicado polo Seminario Galán.

   Dependendo do nivel ao que ían dirixidas, as repostas ás preguntas podíanse encontrar nos carteis recibidos ou ampliando información a través da investigación.

    O alumnado de Infantil tamén se achegou á vida desta autora cunha pequena ficha que incluía un código QR con información adaptada á súa idade.

CLUB DE LECTURA (14 / 2023 - 204)

   Queremos seguir coñecendo a Luísa Villalta e para iso hoxe comezamos o libro Tinta do mar. Pequena biografía de Luísa Villalta escrito Polo Correo do Vento da colección Mulleres Galegas.

  Tras a lectura das primeiras páxinas, lemos tamén uns pequenos caligramas: o primeiro recolle en forma de violín datos importantes da súa biografía e o segundo é un fragmento do seu poema á Torre de Hércules.

   Despois rematamos a sesión co visionado da biografía musical da autora elaborada polo alumnado do CEIP Chans - Bembrive coa música "I love it" de Icona Pop con letra e voz de Ana M. García.