LETRAS GALEGAS: Concerto Didáctico

 

     O Día das Letras Galegas deste ano está dedicado á poesía popular oral. Unha homenaxe que recoñece a importancia da poesía tradicional que acompañou á nosa sociedade desde sempre; pero o certo é que a poesía popular oral, tamén estivo sempre unida á música polo que o Día das Letras Galegas se personifica nas cantareiras Adolfina Casás, Rosa Casás, Eva Castiñeira e as Pandeireteiras de Mens (Malpica).

    Elas eran mulleres que axudaron á transmisión da nosa lingua mentres cantaban, escoitaban, traballaban ou se divertían. E todo iso a maioría facíano sen estudar música, só de oído!

   Nós quixemos sumarnos a esta conmemoración invitando ao cole a Alfonso Campos e Suso Verao, dous músicos do noso Concello que saben moito de música, de galego e de tradición oral.

   Con eles cantamos diferentes cantigas tradicionais galegas como "A saia da Carolina" e coñecemos a diferenza entre tradidional (que se transmite de xeración en xeración de forma anónima) ou popular (moi coñecido) como "O carro" que aínda que é unha obra de uator, é coñecida en toda Galicia.

 

   Tamén nos ensinaron que ademais dos instrumentos tradicionais, calquera obxecto se podía utilizar para acompañar as cantigas: tixolas, culleres, latas de pimentón ou un simple tubo que resoe a modo de baixo continuo.

   Despois continuaron interpretando outras cantigas tradicionais galegas como "Danza do Agrazón" ou "Miña naiciña, meu corazón"

 

     E cantigas propias do noso Concello, como unha regueifa de desamor ou  "San Adrián é Barqueiro" recollida na parroquia de Proendos que combina un alalá e unha muiñeira.

  Na tradición oral tamén xogan un papel importante as cancións infantís e por iso cantaron "Mursummus est Cristo que reine diné" recollida en Proendos e "Pedra, pedriña" coa colaboración de Estrela.

  E como se aprendían todas estas cantigas se as cantareiras non eran compositoras que escribrían partituras? Pois aprendíanse escoitando e para que non se perdan hai que facer un traballo de investigación e recollida gravando ás persoas que cantaban e pasando esas melodías a notas musicais que permitan que permanezan como legado musical.

      Por iso quixemos agradecerlle este concerto didáctico cun agasallo que lles axude a seguir recollendo a tradición musical da nosa zona.

 

  Se queredes saber máis sobre cantigas e música tradicional, podedes escoitar a entrevista que Candela, Martín e Antía lles fixeron en Radiuvín.

 

    MOITAS  GRAZAS  AOS  DOUS  POR  ESTE  RATIÑO ENTRE PASODOBRES, ALALÁS, MUIÑEIRAS, FOLIADAS, DANZAS, REGUEIFAS, VALSES...   

FELIZ  DÍA  DAS  LETRAS  GALEGAS!!

GALERÍA  DE  IMAXES

 

LETRAS GALEGAS 2021: PROGRAMA DE RADIO

 

   Varixs alumnxs de diferentes cursos de primaria participaron na redacción e gravación deste programa sobre Xela Arias no que poderedes coñecer os seus datos biográficos máis importantes e escoitar algúns exemplos da súa obra: un poema do libro Darío a diario e un capítulo do libro inédito Non te amola! (Música: banco sonidos Ministerio de Educación e bensound.com)

Escoitade atentos!

AS PITAS BAIXO A CHOIVA - radio

    Os biblioaxudantes Laura, Pablo e Senén contan o libro AS PITAS BAIXO A CHOIVA de RICARDO CARVALHO CALERO.

     Este libro narra un feito anecdótico da infancia do autor que un día descobre desde a fiestra da súa casa que as pitas estanse mollando pola choiva e decide saír e facelas entrar ao galiñeiro para que non se acatarren; pero... ao final... todos os membros da familia acaban mollados como pitos!!

SOBERICIAS - PREMIO MARA LÓPEZ E ANTÍA GAGO

    Hoxe temos un programa especial de Sobericias con dúas protagonistas tamén especiais: Mara López (6º de Primaria) e Antía Gago (6º Infantil), dúas alumnas do centro que acaban de recibir sendos premios relacionados co mundo bibliotecario.

    Antía Gago recibiu un premio na fase provincial do Certame de Debuxo das Letras Galegas convocado pola Biblioteca Nodal de Lugo.

    Mara López foi a gañadora do concurso SELFIE LIX, convocado pola Asociación Galega do Libro Infantil e Xuvenil.

    Elas falaron con Aitana e Gisela dos seus traballos e dos seus premios... non vos perdades a entrevista!!

II ESCALEIRA LITERARIA DE SOBER

    Este sábado 11 de maio, celebrouse a II Escaleira Literaria de Sober organizada por Moncha Prieto e Neus Canadell coa colaboración do Concello de Sober na que participaron alumnos do noso colexio.

 

    A escaleira comezou cunha breve achegamento á vida e obra de Antonio Fraguas a cargo de Xose manuel Fernández.

 

   Despois os nosos alumnos Senén, Laura G., Mara, Uxía e Aitana leron os traballos realizados sobre o medio ambiente para o certame das Letras Galegas convocado pola Biblioteca Nodal de Lugo.

 

 

    O acto continuou con Sara González e Neus Canadell que representaron a lenda ‘A lavandeira da noite’.

     A continuación houbo un recital no que varios autores compartiron as súas creación literarias: Luis Fernández Guitián, Ramón Sandoval, Mercedes Marcos, Alfonso Campos, Paco Ledo, Rosa García e Moncha Prieto. 

    Tamén estivo presente a Escola Municipal de Teatro de Sober coa posta en escena da obra de Manuel Lourenzo ‘Margot na residencia’, dirixida por Eva F. Ferreira. As actrices foron Ana Somoza e María Trigo.

 

 

    O recital rematou coa actuación do grupo musical O Trícole que xa estivera acompañando musicalmente  os recitados dos poetas.

     Para falarnos sobre este acto e a súa organización tivemos nos estudos de Radiuvín a Moncha Prieto e Neus Canadell ás que desde aquí queremos agradecer a súa presenza e o seu tempo.

     Durante a emisión do programa tamén poderedes escoitar os relatos do noso alumnado que, como xa dixemos, versan sobre o medio ambiente xa que é o tema do certame de narración e debuxo convocado pola Biblioteca Nodal de Lugo para o Día das Letras Galegas .

NA PROCURA DOS TESOUROS DE SOBER

       A Dirección Xeral de Centros e Recursos Humanos en colaboración coa CRTVG, convocou o I CONCURSO DE PODCASTS - Radio na Biblio para conmemorar o Día das Letras Galegas 2019 dedicado ao etnógrafo Antón Fraguas.

      O obxectivo deste concurso é estimular a elaboración de programas radiofónicos que destaquen o patrimonio material ou inmaterial de Galicia, especialmente o máis próximo a cada centro escolar.

      Nós quixemos participar cunha emisión que resaltase as tres igrexas máis importantes e destacables do Concello: coñecelas de primeira man visitándoas e aprendendo delas coa visita guiada da encargada da Oficina Municipal de Turismo, Mari Fé,  para logo dedicarlle este programa radiofónico poñendo en valor o noso patrimonio.

    Esperamos que vos resulte tan interesante como a nós e que aprendades moito sobre elas!

I ESCALEIRA LITERARIA

     O sabado día 12 de maio, celebrouse no Centro Sociocultural de Sober a I Escaleira Literaria, un acto poético musical dedicado a María Victoria Moreno, autora homenaxeada este ano polo Día das Letras Galegas.

    O acto comezou coa lectura e relatos de poemas con acompañamento instrumental. Participaron Carlos Rafael, Leticia Sáez, Moncha Prieto, Paco Ledo, Rosa García, Ramón Sandoval, Sara González, Xosé Lois García e a nosa directora Montse Rodríguez.

   Tamén participaron o grupo musical O Trícole, a Escola Municipal de Teatro e Sara González que interpretou un poema con danza. Rematou o acto o alcalde Luis F. Guitián.

   Para falarnos deste acto, tivemos nos estudios de Radiuvín a Moncha Prieto, Eva Ferreira e Neus Canadell.

  

   Moitas grazas por concedernos esta entrevista!!

AS FAMILIAS CONTAN EN RADIUVÍN

    Hoxe estrenamos en Radiuvín unha nova sección para a nosa radio: As familias contan en Radiuvín. Esta sección é unha variante da actividade As familias contan que sen ven desenvolvendo desde fai varios cursos na biblioteca do colexio.

   Estrenamos programa co recitado do conto en verso Can Branco, can negro do libro Eu conto, ti cantas...  de María Victoria Moreno;  autora homenaxeada este ano no Día das Letras Galegas.

Moitas grazas as familias de Carlota, Iria, Laura G., Valeria, Mara e dos irmáns Pablo e Hugo, Héctor e Darío, Laura e Lucas e Mencía e Candela!!  

Esperamos volver a escoitarvos pronto nesta radio!!

LETRAS GALEGAS 2018: ORIXE E BIOGRAFÍA DE MARÍA VICTORIA MORENO

     Acaba de comezar o mes de maio que é o mes no que celebramos o Día das Letras Galegas .

    Para conmemoralo iremos contándovos durante todo o mes cousas curiosas sobre este día e sobre María Victoria Moreno que é a escritora homenaxeada este ano.

    Neste primeiro programa das Letras Galegas 2018, o alumnado de 3º e 4º de Primaria fálanos sobre a orixe desta conmemoración e cóntanos a biografía de María Victoria Moreno que está publicada na páxina do Seminario Galán: seminariogalán.org

   Escoitade atentos!!