II OBRADOIRO DE RADIO NA BIBLIO CON ARTUR TRILLO

  Este ano recibimos unha aportación extraordinaria para formación do alumnado que participa no Proxecto Radio na biblio e grazas a esta aportación puidemos facer unha segunda sesión do obradoiro "Todo se pode contar con teatro" co actor e director de teatro Artur Trillo destinado ao alumnado de 3º e 4º de Primaria.

     Coas actividades realizadas neste obradoiro, Artur ensinoulle ao alumnado a explorar as distintas posibilidades da expresión oral facendo fincapé nas seguintes premisas:

- Falar en público pode dar vergoña e iso é normal: poñerse colorado non importa e ter medo ao pensen de ti cando estás falando tamén é normal pero debemos intentar que iso non nos condicione.

 - Para manter unha boa comunicación é importante mirar á cara das persoas mentres lles falamos e non agachar a cabeza.

- Vocalizar sen ter présa de chegar ao final, pronunciando ben todas as consoantes; como se falaramos en negriña e subliñado.

 

 - Ter en conta canta xente me está escoitando e onde está para proxectar a voz de xeito adecuado e utilizar o volume necesario.

 

- As mans e o corpo tamén falan e deben acompañar á voz.

 - Hai que lembrarse de respirar para non quedar sen folgos no medio dunha frase. A respiración debe ser o máis parecido posible á respiración que facemos cando falamos con normalidade.

  - Temos que falar querendo dicir o que dicimos, é dicir, ser conscientes do que queremos transmitir e utilizar todos os recursos dispoñibles da voz e do corpo para conseguir facelo.

   Esperamos que estas premisas axuden ao noso alumnado a mellorar a súa capacidade de transmisión oral...escoitade atentamente os próximos podcast de Radiuvín para comprobalo!!

OBRADOIRO RADIO NA BIBLIO CON ARTUR TRILLO

   Desde hai sete cursos participamos no Proxecto Radio na biblio destinado a centros que forman parte do PLAMBE (Plan de Mellora de Bibliotecas Escolares) e grazas a este proxecto contamos cun orzamento específico para facer obradoiros de formación que repercuten na formación do noso alumnado.

    Nesta ocasión o alumnado de 4º, 5º e 6º de Primaria recibiu a súa formación da man do actor, director e autor teatral Artur Trillo co que realizaron o obradoiro "Todo se pode contar con teatro".

 

   Durante as actividades feitas neste obradoiro (lecturas, chistes, improvisacións...) deulles varias claves para realizar unha boa lectura que lles permita explorar as distintas posibilidades da expresión oral a través das distintas formas de ler e interpretar:

  - ACTITUDE: a actitude é primordial e principal para transmitir, temos que ter ganas de facelo e ser conscientes do que queremos transmitir.

- RESPIRACIÓN: debemos respirar mentres lemos tal como facemos cando falamos. Na lectura non deberían notarse pausas artificiais senon que deberían ser o máis naturais posibles.

- RITMO: cada lectura e cada tipo de texto ten o seu propio ritmo; por exemplo, se falamos moi rápido coa finalidade de rematar pronto podemos transmitir o que non queremos ou sensacións de ansiedade ou estrés. Ademais o ritmo é importante porque nos axuda crear expectativas.

- PALABRAS: a forma de dicir as palabras comunica tanto como a propia palabra; por iso hai que escoller ben as palabras que se van a utilizar e disfrutar de dicilas con todas as súas letras (r, z, v...)

 

- PROXECCIÓN: a proxección, a intensidade e o volume inflúen no proceso de comunicación. Cando queremos comunicar temos que darlle a proxección adecuada "falar en negrita".

- O PROPIO CORPO: aínda que o noso corpo non se vexa a través da radio temos que utilizalo para apoiar o que dicimos e que a mensaxe sexa máis crible.

   Esperamos que o noso alumnado saque moito partido destas ensinanzas... teredes que escoitar atentamente os nosos próximos podcast para comprobar o éxito do obradoiro!!

GALERÍA  DE  IMAXES

OBRADOIRO DE RADIO - PONTE NAS ONDAS

    Un ano máis seguimos participando no Proxecto Radio na biblio destinado a centros que forman parte do PLAMBE (Plan de Mellora de Bibliotecas Escolares), e esta participación permítenos contar con formación no centro para o noso alumnado.

   Nesta ocasión volvemos a contar coa presenza de Damián Alonso a través da Asociación Cultural e Pedagóxica Ponte...nas ondas!. 

 

    O obradoiro constou de tres partes: comezamos coa parte técnica centrándonos na aprendizaxe do programa de gravación e edición de audio Audacity: importar, cortar, aumentar ou reducir volume, modificar o tempo, a velocidade, o ton, engadir silencios, traballar con dúas pistas de audio, gardar proxecto, exportar...

 

    Despois chegou a parte da locución tendo en conta aspectos como a transmisión da mensaxe (velocidade, ton e intensidade), os signos de puntuación, os tipos de locucións... E tamén fixemos exercicios de vocalización, de lectura avanzada, trabalinguas...

 

   Para rematar elaboramos entre todos un programa de radio divididos por parellas, de xeito que cada parella podía falar do que quixera: deportes, gustos, actividades no tempo libre... pero para iso, tiñan que elaborar o guión da súa intervención tendo en conta todo o aprendido: frases curtas, linguaxe sinxela, poucos tecnicimos...

 

    Unha vez que tiveron o guión elaborado, foron pasando polos estudios de radio que Damián instalou na biblioteca de xeito que todos fixeron de locutores e de técnicos de son encargándose da mesa de mesturas e da gravación.

 

    Moitas grazas a Ponte...nas ondas! e a Damián Alonso por este obradoiro tan completo e divertido.  Seguro que lle sacaremos moito proveito!!

 

GALERÍA  DE  IMAXES

 

RADIO VOZ ESCOLAR

  O noso centro foi proposto pola Consellería de Cultura, Educación, FP e Universidades para formar parte do programa Radio Voz Escolar que xorde da colaboración entre a Consellería e Radio Voz. Unha experiencia piloto dirixida a 40 centros integrados no programa Radio na biblio.

 

  

  

   Esta colaboración enmárcase dentro do Plan Lía (Lectura, Información, Aprendizaxe) que ten como unha das súas liñas principais a educación mediática e informacional polo que se persegue "reforzar os programas de alfabetización mediática e informacional do alumnado, con propostas que promovan o coñecemento e un uso responsable da información en múltiples formatos"

 

    Para isto achegáronse ao centro Antía Díaz Leal (Xefa de Programas e informativos de Radio Voz) e Sonia Rodríguez (Técnica responsable de son). A primeira parte da actividade consistiu nunha charla na biblioteca na que Antía lles falou do seu traballo como locutora, redactora e produtora e da radio en xeral. Tamén lles deu consellos sobre a elaboración de guións e a gravación de programas.

s

        A segunda parte da actividade realizouse nos estudos de Radiuvín onde gravaron en falso directo un programa sobre o Día do Libro que se emitirá a través da frecuencia de Radio Voz o próximo xoves día 27 de abril e despois estará dispoñible na súa web. Durante esta parte da actividade foi Sonia Rodríguez a que lles ensinou a utilizar todo o que ten que ver coa parte técnica da gravación.

Moitas grazas a Radio Voz e á Consellería por contar con nós para esta experiencia!!

 

HABÍA UNHA VEZ... NA RADIO

  O alumnado de 3º, 4º, 5º e 6º de Primaria participou nun obradoiro de formación a través do proxecto Radio na biblio; pois grazas a este proxecto contamos cun orzamento específico para facer obradoiros que repercutan na formación do noso alumnado.

   Para o obradoiro deste ano estivo no centro Soledad Felloza que desenvolveu unha actividade de narración oral titulada Había unha vez... na radio.

    Primeiro o alumnado estivo facendo unha posta en común sobre o concepto que tiñan de radio: que escoitaban, que lles parece que fai falta para ter un bo programa...

 

   Despois, Soledad contoulles O conto dos Reis Magos á vez que os nenos e nenas tiñan que ir teatralizando algunhas partes.

     A continuación, coas indicacións de Soledad, o alumnado participante entendeu que na radio hai que contar só para as orellas porque a persoa que nos está escoitando non nos pode ver. Para iso ensinoulles técnicas coas que facer da voz un gran instrumento que poida recrear voces con diferentes matices ou sons do mar, do vento, de animais...

     Por último, dividíronse en pequenos grupos para ler diferentes contos (As tres curuxiñas, Sígueme, Avós, Os Esqueletos divertidos, Pioneiras...) nos que tiñan que poñer en práctica o aprendido: entoación adecuada, diferenciación de voces, expresividade...

   Esperamos que esta formación tan interesante repercuta positivamente no noso alumnado así que a partir de agora, estade atentos ás emisións de Lecturradio: as túas lecturas na nosa radio. Seguro que non vos defraudan! 

GALERÍA  DE  IMAXES

OBRADOIROS DE FORMACIÓN RADIO NA BIBLIO

      Este é o cuarto curso desde que entramos no Proxecto Radio na biblio, e grazas á participación nel temos un orzamento específico para facer obradoiros que repercutan na formación do alumnado.

  

    O obradoiro de formación deste ano centrouse máis nos aspectos técnicos relacionados co proceso de gravación. Denís de Rede Espora foi o encargado de ensinarlle ao alumnado todo o necesario para poder gravar de forma autónoma os programas de radio.

    Na sesión en común que realizamos na biblioteca comezou falándonos de aspectos como:

- Posibilidades da radio: noticias, entrevistas, deportes, coñecemento, diversión, realidade, concursos, debates, contos...

- Tarefas a levar a cabo para gravar un programa con éxito: elaboración dos guións, documentación e investigación, manexo do equipo, locución, produción e organización.

- Manexo da mesa de son

- Ideas e consellos relacionados coa elaboración de guións: escribe como falas, fala con naturalidade, utiliza oracións curtas, non uses palabras moi longas ou difíciles de pronunciar se hai sinónimos co mesmo significado, resalta o máis importante do guión...

- Recursos e bancos de sons dispoñibles

    Para recordar todo o que nos dixo; podedes acceder á súa presentación no seguinte enlace: ARRANCAMOS  COA  RADIO!

   Despois, por grupos, os nenos e as nenas participantes no obradoiro foron pasando polos estudos de Radiuvín para poñer en práctica todo o aprendido na biblioteca.

ESPERAMOS  QUE  A  FORMACIÓN  RESULTE  PROVEITOSA!!