CONCERTO DIDÁCTICO: O SAXOFÓN

      Hoxe tivemos na biblioteca un concerto didáctico para seguir afondando no coñecemento dos instrumentos de vento.

      Se en novembro era a quenda dos instrumentos de vento metal achegándonos a eles coa trompeta; agora cambiamos aos instrumentos de vento madeira con este concerto didáctico dedicado ao saxofón.

    Para isto acompañáronos Pablo Fernández (estudante de Grao Profesional), Emilio Vázquez, Lucas Guzmán e Juan Pablo Gil (mestres de saxofón). Dos catro, Juan Pablo é o máis coñecido polo noso alumnado xa que é mestre na Escola de Música de Sober e Director da Banda Infantil e Xuvenil.

 

   Neste concerto puidemos escoitar obras clásicas como o "Himno da alegría" pero tamén outras moi diferentes como "Tico, tico", un tango, bandas sonoras de películas...

   Ademais de tocar explicáronos os diferentes tipos de saxofóns que hai e puidemos escoitalos en directo: o saxofón soprano que é o máis agudo e diferente na forma xa que é recto, o saxofón alto que é o que soemos ver con máis frecuencia en bandas ou orquestras, o saxo tenor que é máis grave e máis grande que o alto e o saxofón barítono que é o máis grande e grave de todos eles.

 

 

    Foi un concerto moi participativo no que ademais de escoitar puidemos participar tocando palmas e respondendo ás súas preguntas sobre as obras que estabamos que estaban tocando.

   Rematamos este concerto cunha obra moi coñecida para os nenos e as nenas, o tema de Super Mario Bros, e entregándolles un agasallo como lembranza do seu paso polo colexio.

  Pero antes de marchar, tiveron un ratiño para pasar polos estudos de Radiuvín e compartir a súa experiencia como saxofonistas con nós. 

 

 MOITAS  GRAZAS  AOS  CATRO  POR  ESTE  CONCERTO  DIDÁCTICO,

ESTADES  CONVIDADOS  A  VOLVER  CANDO  QUEIRADES!!

GALERÍA  DE  IMAXES 

LETRAS GALEGAS: Concerto Didáctico

 

     O Día das Letras Galegas deste ano está dedicado á poesía popular oral. Unha homenaxe que recoñece a importancia da poesía tradicional que acompañou á nosa sociedade desde sempre; pero o certo é que a poesía popular oral, tamén estivo sempre unida á música polo que o Día das Letras Galegas se personifica nas cantareiras Adolfina Casás, Rosa Casás, Eva Castiñeira e as Pandeireteiras de Mens (Malpica).

    Elas eran mulleres que axudaron á transmisión da nosa lingua mentres cantaban, escoitaban, traballaban ou se divertían. E todo iso a maioría facíano sen estudar música, só de oído!

   Nós quixemos sumarnos a esta conmemoración invitando ao cole a Alfonso Campos e Suso Verao, dous músicos do noso Concello que saben moito de música, de galego e de tradición oral.

   Con eles cantamos diferentes cantigas tradicionais galegas como "A saia da Carolina" e coñecemos a diferenza entre tradidional (que se transmite de xeración en xeración de forma anónima) ou popular (moi coñecido) como "O carro" que aínda que é unha obra de uator, é coñecida en toda Galicia.

 

   Tamén nos ensinaron que ademais dos instrumentos tradicionais, calquera obxecto se podía utilizar para acompañar as cantigas: tixolas, culleres, latas de pimentón ou un simple tubo que resoe a modo de baixo continuo.

   Despois continuaron interpretando outras cantigas tradicionais galegas como "Danza do Agrazón" ou "Miña naiciña, meu corazón"

 

     E cantigas propias do noso Concello, como unha regueifa de desamor ou  "San Adrián é Barqueiro" recollida na parroquia de Proendos que combina un alalá e unha muiñeira.

  Na tradición oral tamén xogan un papel importante as cancións infantís e por iso cantaron "Mursummus est Cristo que reine diné" recollida en Proendos e "Pedra, pedriña" coa colaboración de Estrela.

  E como se aprendían todas estas cantigas se as cantareiras non eran compositoras que escribrían partituras? Pois aprendíanse escoitando e para que non se perdan hai que facer un traballo de investigación e recollida gravando ás persoas que cantaban e pasando esas melodías a notas musicais que permitan que permanezan como legado musical.

      Por iso quixemos agradecerlle este concerto didáctico cun agasallo que lles axude a seguir recollendo a tradición musical da nosa zona.

 

  Se queredes saber máis sobre cantigas e música tradicional, podedes escoitar a entrevista que Candela, Martín e Antía lles fixeron en Radiuvín.

 

    MOITAS  GRAZAS  AOS  DOUS  POR  ESTE  RATIÑO ENTRE PASODOBRES, ALALÁS, MUIÑEIRAS, FOLIADAS, DANZAS, REGUEIFAS, VALSES...   

FELIZ  DÍA  DAS  LETRAS  GALEGAS!!

GALERÍA  DE  IMAXES

 

INAUGURACIÓN DA RÚA MARUJA MALLO

    Como sabedes por todas as actividades que levamos realizando estes días, a rúa do colexio non tiña nome; pero o Concello de Sober aprobou por unanimidade dedicarlla á pintora Maruja Mallo polas súas raíces no municipio, xa que o seu avó materno era de Sober, concretamente de Naz, na parroquia de San Martiño de Anllo. 

   Hoxe era o día da inauguración oficial e para o evento preparamos unha exposición coas obras que replicamos, a liña do tempo que reflicte a súa vida e unhas chapas como recordo fixemos unhas chapas coa ilustración de Carlos Taboada.

  Os actos comenzaron cunha na que participaron Luis Fernández Guitián (alcalde do Concello), Emilio Insua (autor do libro "Maruja Mallo: de prometedora pioneira a artista universal. Materiais para unha biografía exacta e completa da pintora viveirense entre 1902 e 1936") e Ángel Armaiz (xornalista de Monforte de Lemos).

  Durante a intervención, o alcalde explicounos o motivo polo que o Concello dediciu este nome para a rúa; Emilio Insua falounos da biografía de Maruja Mallo e da súa importancia como artista e Ángel Arnaiz fixo unha exposición sobre as súas raíces en Sober.

  Despois todos participamos no descubrimento da placa co nome Rúa Maruja Mallo.

   E antes de dar o acto por rematado, Luís, Emilio e Ángel estiveron nos estudos de Radiuvín onde Lara e Saúl lles fixeron unha entrevista  na que poderedes aprender moitas cousas sobre a protagonista deste día.

 

RESEÑAS  DE  PRENSA:

 

El Progreso, Ribeira Sacra (27/03/2025)

 

 

MARUJA MALLO. POLO CORREO DO VENTO

  Ata agora a rúa do colexio non tiña nome, pero en febreiro o Concello decidiu poñerlle o nome da pintora Maruja Mallo xa que o seu avó era de Sober, concretamente de Naz.

   Por este motivo estamos investigando a súa vida e a súa obra e por iso no club de lectura lemos o libro Meiga nova, metade anxo, metade marisco. Pequena biografía de Maruja Mallo escrito por Enrique Mauricio e Carlos Taboada.

    Pareceunos tan interesante que nos puxemos en contacto cos autores e hoxe estiveron no centro Carlos Taboada e Marcelo para facer unha actividade con todo o alumnado do colexio. Na primeira parte da actividade, achegámonos aos principais datos da súa biografía e mentres Carlos facía unha ilustración da pintora e Marcelo poñíalle música.

    Na segunda parte fixemos de forma individual unha caricatura da pintora guiándonos polas directrices que nos ía dando Carlos.

   Estas caricaturas expuxéronse no Salón de Actos ao lado da ilustración de Carlos formando unha pequena homenaxe a Maruja Mallo.

   Para rematar, Carlos e Marcelo estiveron en Radiuvín onde Nayara e Ada lles fixeron unha pequena entrevista sobre o seu libro e sobre a propia Maruja Mallo.

 

 GALERÍA  DE  IMAXES

 

DÍA DA NENA E A MULLER NA CIENCIA: LAURA LLANO RODRÍGUEZ

  A  Asamblea Xeral das Nacións Unidas conmemora o 11 de febreiro o Día Internacional da Nena e a Muller na Ciencia, coa intención de visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

Imaxe: Asesoría Bibliotecas Escolares

 

    Por esta razón invitamos hoxe ao colexio a Laura Llano Rodríguez, ex-alumna do centro que estudou o Grao en enxeñería eléctrica e traballa na actualidade nunha empresa de consultoría enerxética, concretamente na xestión das liñas de alta tensión.

   Ela comezou falándonos da importancia da electricidade na vida cotiá (acender ou apagar a luz, o frigorífico, a lavadora...) e as diferentes formas que temos de conseguir electricidade.

    Sobre todo da enerxía eólica e dos aeroxeradores que se poden ver case desde calquera lugar de Sober; de feito, o alumnado sorprendeuse moitísimo coas dimensións reais que teñen xa que nalgúns ata hai un ascensor dentro para subir a facer o mantemento!

 

    Tamén nos trouxo unha maqueta feita con culleres e un tapón de plástico que ao xirar acendía un pequeno led coa que nos explicou o seu funcionamento: por que as veces as aspas non funcionan aínda que haxa vento, por que non poden funcionar se hai moito, como xiran para aproveitar a dirección do vento...

   Despois explicounos como chega a electricidade que se xera ás nosas casas e os diferentes tipos de torres de alta tensión. Sabiades que son de cores brancas e vermellas con luces na parte superior cando están preto dun aeoroporto?

     Tamén aprendemos como son os cables de alta tensión: que poden ser de cobre ou aluminio porque ambos son bos materiais condutores (aínda que nos dixo que o mellor era o ouro pero sairía demasiado caro) e as diferenzas que hai entre eles dependendo se son dos que van polas torres ou se son dos que van soterrados.

       Para rematar Laura respondeu a todas as preguntas dos nosos nenos e nenas que vos podemos dicir que non foron poucas!

      Se queredes saber moitas máis cousas sobre o traballo de Laura, podedes escoitar o seguinte podcast no que responde ás preguntas de Lara, Nayara e Daniela.

MOITAS  GRAZAS  POLA  TÚA  VISITA!!

ESPERAMOS  QUE  A  TÚA  EXPERIENCIA  NOS   AXUDE  A  COMPRENDER  QUE AS  NENAS  E  OS  NENOS  PODEN  SER  O  QUE  QUEIRAN  SER.

 GALERÍA  DE  IMAXES