POSTAIS E AGASALLOS DE NADAL

   Para as postais e os agasallos de Nadal deste ano, o alumnado de primaria do colexio estivo argallando coa impresora 3D e o programa Doodle 3D co que elaboraron os seus propios deseños.

    Fixeron fermosos bonecos de neve (con ou sen neve), agasallos con lazos de corazón, galletas de xenxibre e bólas para a árbore de Nadal.

   Ademais de deseñar estes obxectos foron quen de adaptalos par utilizalos nas postais de Nadal. Tamén usaron uns lazos que descargamos de thingiverse (by Colorme3D)

  Despois presentamos estas postais ao certame de postais do Concello de Sober xunto coas do alumnado do Infantil que fixo as súas utilizando as pegadas das súas mans.

   Por esta participación no certame, o Concello agasallounos cun diploma e un par de xogos novos para a nosa biblioteca.

FELIZ  NADAL  A  TODOS!!

GALERÍA  DE  IMAXES

CARTAS DESDE A RÍA - Nadal 2024

   Este curso retomamos o proxecto Cartas dende a ría co CEIP de Seara (Moaña) que comezamos o ano pasado.

  E comezamos intercambiándonos postais de Nadal cheas de bos desexos para esta época do ano e para o próximo ano 2025.

   Coma noutras ocasións, recibir esta correspondencia dos nosos amigos e amigas de Moaña fíxonos moita ilusión!

 

 

MOITAS  GRAZAS  POLAS  VOSAS  POSTAIS!!

ATÉ O VINDEIRO NADAL

   O xoves día 19 tivemos na biblioteca a presentación do libro  Até o vindeiro Nadal  coa intervención da súa autora Inés Silva.

 

     A autora contoulles aos nenos e ás nenas a motivación para escribilo e leulles o principio da historia para despois invitar a algúns deles a compartir a lectura.

 

 

 

 

 

 

  Ademais o libro está editado por Peruchela Edicións e durante a presentación tamén nos acompañou a súa editora para falarnos sobre o proceso que vai desde a escritura ata que o libro está dispoñible nunha libraría e como se lles ocorreu a idea de publicar o libro en formato reversible por un lado en galego e outro en castelán.

    Moitas grazas a Peruchela Edicións por esta actividade tan interesante que rematou cunha rolda de preguntas á autora que nos animou a compartir e vivir a maxia do Nadal durante todo o ano.

TALLER DE ADORNOS DE NADAL

 Chegada a época navideña, as crianzas de Educación Infantil quixeron facer un adorno para levar as súas casas, así que organizamos un Taller de adornos de Nadal con arxila fría.

  As mestras elaboraron unha masa moi sinxela que leva unicamente tres ingredientes: maizena, bicardonato e auga.

  Primeiro os nenos e nenas puideron manipular a arxila descubrindo a súa textura e dándolle multitude de formas diferentes.

  

Despois, coa axuda duns cortapastas, as crianzas foron dándolle forma aos seus adornos.  

 

    Unha vez rematados fixéronlles un burato cunha palliña para logo poder colgalos e deixáronse secar durante un par de días.

   

    Pasado ese tempo chegou o momento de decoralos con pintura.

    

E así de bonitiños quedaron unha vez rematados!