CLUB DE LECTURA (12 - 2024/2025)

    Hoxe tivemos unha nova sesión do club de lectura dedicada ao libro Os contos do Lobicán escrito por Eva Mejuto.

     Durante a mesma estivemos falando sobre aspectos propios do xénero teatral reflectidos no libro como os escenarios, as acotacións, a forma de falar dos personaxes cando manteñen un diálogo con outro ou cando fan un aparte... 

   Tamén falamos das ilustracións porque lles chamou moito a atención a gama de cores xa que so utiliza o azul, o negro e o vermello sobre branco. Entre elas destacaron a da páxina 26 e a da páxina 31 porque non entendían ben esas ilustracións.

        Para rematar a reflexión sobre o libro, puxemos o foco no propio argumento xa que é un libro que lle dá a volta á visión dos personaxes dos contos que temos sobre os malos e os bos e porque igual, coma na vida, pode que os malos non sexan tan malos e os bos non sexan tan bos.

 

   Despois as moderadoras propuxémoslles aos membros do club facer unha representación do libro e a eles encantoulles a idea así que a proposta para a próxima sesión é que pensen ideas para a representación: os títeres, os decorados, a distribución da lectura...

APADRIÑAMENTOS E AMADRIÑAMENTOS LECTORES POLO DÍA DO LIBRO

   Cada ano polo Día do Libro realizamos unha actividade que lle gusta moito ao noso alumnado: os apadriñamentos e amadriñamentos lectores. Como este curso o Día do Libro coincidiu case ao voltar das vacacións, trasladámola un par de días para que os biblioaxudantes puideran preparar as lecturas escollidas.

    O alumnado biblioaxudante organizouse en cinco grupos que se repartiron polo colexio con candanseu libro para lerlles ao resto do alumnado que, tamén dividido en 5 grupos, foi percorrendo a senda dos libros:

  Na biblioteca Candela, Carla e Manuel contaban o libro Dona Carme que ten un sono tan pesado que nin todos os animais da granxa conseguían que espertara. Un conto de tradición oral pasado ao papel por Manuel Bragado.

 

 

   No corredor principal Lara, Martín e Noa esperaban co libro Queres xogar comigo? de Eric Carle no que un ratiño sae da súa casa á busca de alguén con quen xogar... atopará algún amigo?

    Continuamos no Salón de Actos con Daniela, Pablo e Xoán e o libro Quen dixo medo? escrito por Ana Sánchez Garea. Un álbum ilustrado no que a súa protagonista, que ten medo á escuridade, descobre co seu pai a maxia da escuridade e as cousas boas que poden pasar cando non hai luz.

 

 

    No patio do colexio Ada, Laura e Itzae esperaban co libro ¿Qué hacen los mayores durante el día? de Dawid Ryski para falarnos dos distintos traballos que realizan os adultos pero... ¿que fan exactamente? Os biblioaxudantes deste grupo sácannos de dúbidas.

 

 

 

    Rematamos o percorrido no ximnasio do colexio onde Antía, Saúl e Nayara tiñan preparadas varias actividades do libro Con calma. 50 historias de la naturaleza escrito por Rachel Williams e as cartas da mesma serie: Con calma. 30 actividades mindfulness de Emily Sharrat: debuxo e ioga foron os protagonistas desta actividade.

 

 

Podedes ver todas as imaxes desta conmemoración na 

GALERÍA  DE  IMAXES

  

MOITAS  GRAZAS  AOS  BIBLIOAXUDANTES  POR  ESTAS  LECTURAS!!

FELIZ  DÍA  DO  LIBRO!!

AS FAMILIAS CONTAN: Familia de Estrela e Noé

   Na actividade "As familias contan" de hoxe, acompañáronnos Estrela, Noé e a súa nai Paula para contar o libro Tucho Despistes escrito por Ana Santiso.

 

  Tucho, tal como di o título do libro, é un neno moi despistado que perde as cousas e fai mal os recados como cando a súa nai o mandou a comprar arroz normal pero mercou integral.

    Un día xogando no río coñeceu a Pirucho que era un peixe moi educado que se fixo o seu amigo e lle deu un consello: "colle o medo, a rabia e a pena e méteos nunha botella".

   A Tucho dáballe medo ver á súa nai enfadada por iso se preocupou moito cando comenzaron as vacacións e perdeu as notas do colexio así que tal como lle dixera Pirucho, escribiu nuns papeis medo, rabia e pena e gardounos nunha botella.

   Ademais mergullouse no río con Pirucho e un traxe que lle prestou o seu amigo e coñeceu á monstra Tomasa que era a que tiña gardadas todas as cousas que perdera: as chaquetas, a bicicleta, o arroz normal...

    Tamén viron á mostra rabia e ao monstro medo pero ao final marcharon espantados e, aínda que a súa nai non creu a historia que Tucho lle contou, as notas apareceron e ela asinounas encantada.

   Desde esas Tucho xa non ten tantos problemas e na súa casa son moi felices, "só teñen broncas gordas cando hai para cear troitas".

    Se queredes escoitar esta historia rimada, podedes facelo no podcast que gravaron en Radiuvín.

 

 MOITAS  GRAZAS  POR  VIR  A  COMPARTIR  CON  NÓS  A  HISTORIA  DE  TUCHO  DESPISTES  QUE  CONSEGUIU  VENCER  AO MEDO, Á RABIA  E  Á  PENA!!!

 GALERÍA  DE  IMAXES

ANIMACIÓN Á LECTURA

   O martes de Pascua é festivo local en Monforte que é a cidade á que os nosos exalumnos teñen que ir ao instituto; por iso un grupo deles xunto con Ángel e Ainhoa; preparaon a lectura do libro De los amigos de antes... a  los amigos de ahora. Tus amigos, escrito por Nuria Roca.

  Un libro que nos fala do fantástico que é ter amigos cos que podes xogar, rir, atopar compañía para non sentirte só...

  Pero o protagonista do libro ten que mudarse de casa e ten medo de perder os amigos que tiña antes e non poder facer novos amigos agora.

   Así que neste libro Juan vai lembrando os amigos que tiña e o diferentes que eran: Javier ao que lle gustaba a aventura, Pablo que eras máis medroso, Ricardo que era moi mandón pero despois de pelexar sempre acaban perdoándose e rindo ás gargalladas... Menos mal que podían falar por teléfono e contarse todo o que non podían dicir en persoa!

    Tamén lembrou algunhas ocasións nas que non se sentía moi ben como cando algúns amigos murmuraban e contaban secretos deixándoo de lado.

     Aínda con todo Juan sentíase só así que os seus pais mercáronlle a Buck, un cadeliño, e levárono ao parque para que coñecese novos nenos e nenas.

      Agora Juan xa ten moitos amigos: os amigos novos nesta cidade máis os que tiña de antes; así que se tes que cambiar de colexio ou de cidade, non te preocupes; é doado facer amigos se segues os consellos de Juan: escoitar, compartir, preocuparse polo que senten os demais e non pasar todos os días criticando nin mandando.

   Podes escoitar toda a historia de Juan no seguinte podcast:

MOITAS  GRAZAS  POR  VIR  A  COMPARTIR  ESTA  LECTURA  DA  QUE  QUEREMOS  DESTACAR  A  SEGUINTE  CITA:

"Hay muchas formas diferentes de ser amigo. Puedes ser amigo de otro niño como tú, de una persona mayor, o hasta de un perro o un árbol.  Tener un amigo es algo muy especial, porque se trata de alguien a quien quieres y con el que te sientes a gusto, aunque no hagas nada espectacular.

Es posible que en algún lugar muy lejos de donde vives ahora haya un niño o una niña que será amigo tuyo dentro de unos años. O tal vez viva en la casa de al lado. ¿Te imaginas tener amigos en todo el mundo?"

 GALERÍA  DE  IMAXES

O VERDADEIRO COELLO DE PASCUA

     A piques de comezar as vacacións de Semana Santa, o alumnado do cole tivo que enfrontarse a unha busca do tesouro de Pascua.

    Para comezar os biblioaxudantes de 6º léronnos a fábula "O verdadeiro coello de Pascua"  que conta a historia dunha familia de coellos que debe entregar os ovos de Pascua aos nenos da casa verde con xardín.

 

   Despois do conto os nenos e as nenas dividíronse por equipos de coellos de cores coas súas graciosas orellas.

   E a continuación comezou a busca do tesouro para a que tiñan que superar diferentes probas pero para saber por onde tiñan que comezar tiñan que descifrar a primeira pista en inglés.

   A primeira proba era doada se estiveron atentos á fabula xa que se trataba de resolver un encrucillado con datos da historia.

   A segunda proba era un circuíto de equilibrio para coellos no Salón de Actos.

 A terceira fase que había que superar unha proba de puntería.

 Na cuarta proba os coelliños  e coelliñas  tiveron que facer unha carreira de saltos.

O penúltimo reto consistía en facer dous coelliños co trangram clásico e resolver un tangram oval impreso coa impresora 3D.

A última proba era conseguir poñer a salvo os ovos de Pascua para poder entregalos aos nenos da casa verde con xardín.

 Unha vez rematado o xogo e con todas as probas superadas, os equipos puideron saborear os doces ovos de chocolate!!

 Para acabar o día, o alumnado puido disfrutar dunha sesión de cine na biblioteca.

GALERÍA  DE  IMAXES