DÍA DAS BIBLIOTECAS

    Desde 1997, o día 24 de outubro, conmemórase o Día das Bibliotecas co "obxectivo de concienciar á sociedade da importancia da lectura e como homenaxe e recoñecemento ao traballo dos bibliotecarios/as".

    Nós aproveitamos esta conmemoración para inaugurar o curso na biblioteca do cole facendo diferentes actividades. O primeiro que estivemos facendo foi formación de usuarios para lembrar as normas da biblioteca, a CDU, as etiquetas dos libros... 

   Pero, sobre todo, estivemos facendo fincapé na organización da biblioteca xa que, coa axuda dos biblioaxudantes, estivemos facendo cambios na distribución dos andeis.

    Ademais da formación de usuarios tamén entregamos os premios aos participantes no reto lector do verán do curso 2024:

   Para rematar esta conmemoración todo o alumnado recibiu o marcapáxinas conmemorativo deste día escrito polo colectivo Erre que Erre como texto agasallo para o Colectivo Lemos Le que este ano dedicará o traballo do curso á proposta para o Día das Letras Galegas: á tradición oral; concretándoa nos brindos de A Pobra do Brollón.

 

 

FELIZ  DÍA  DAS  BIBLIOTECAS!!

OBRADOIRO VOLUNTARIADO DE LECTURA - A

   Como xa anunciamos, xunto a outras nove bibliotecas escolares, o equipo de Biblioaxudantes do noso centro foi seleccionado na convocatoria de Voluntariado de Lectura - A para o curso 2023 - 2024  na que se lle recoñece o traballo de colaboración que veñen desempeñando os alumnos e alumnas de 5º e 6º de Primaria nas bibliotecas escolares de forma voluntaria en actividades de xestión, organización e lecturas compartidas dentro do centro.

    Por esta selección, recibimos no centro un obradoiro de Pablo Otero "Peixe" escritor, ilustrador e pintor galego nado en Ourense co que realizaron dúas actividades diferentes.

    A primeira actividade consistiu na realización de ideogramas que son imaxes ou símbolos que representan unha idea. O reto era conseguir representar o significado dunha palabra utilizando as letras que a forman como Pablo nos mostrou nestes exemplos.

  Partindo das ideas propostas, os biblioaxudantes recibiron varias palabras ao azar e estes foron algúns dos resultados:

   A segunda parte do reto consistía en facer o mesmo cos seus nomes: intentar representar algo da súa personalidade coas letras dos seus nomes e... vaia imaxinación teñen estes biblioaxudantes!

 

 

    A segunda parte do obradoiro foi o xogo Liso - Rizo, un xogo que explora a diversidade de talentos e habilidades de todo o grupo para aprender a perder e tamén aprender a gañar.

    Realizando probas moi divertidas, o xogo serviunos para reflexionar sobre a importancia da convivencia e do respecto aos compañeiros e sobre a resolución pacífica de conflictos.

MOITAS  GRAZAS  Á  ASESORÍA  DE  BIBLIOTECAS  ESCOLARES  E  A  PABLO  OTERO  POR  ESTE  OBRADOIRO  QUE  RECOÑECE  O  LABOR  DOS  BIBLIOAXUDANTES!!

 

GALERÍA  DE  IMAXES

PREMIO VOLUNTARIO DE LECTURA - A

    Desde hai varios cursos, o alumnado de 5º e 6º de Primaria participa no programa Bibliotecas Escolares Solidarias na modalidade Voluntariado na biblioteca escolar en dúas categorías: Categoría A: Colaboración coa biblioteca escolar e Categoría B: Ler con... D.

      Este ano tivemos un gran equipo de biblioaxudantes e o seu traballo fixo que sexamos un dos 10 centros seleccionados de Galicia que recibirá un obradoiro como premio!

   Estamos moi contentos porque este é un programa que lles axuda máis aló do currículo.

    A Categoría A: colaboración coa biblioteca, fai que sexan máis responsables xa que teñen que cumprir as súas quendas e “facer cumprir” as normas da biblioteca e solidarios xa que implica a renuncia dalgúns dos seus tempos de lecer en favor dos compañeiros; sobre todo, no referido á axuda que prestan os/as biblioaxudantes aos máis pequenos en canto á organización da biblioteca, ao uso de medios tecnolóxicos, ao uso dos escornabots, á mediación se xurde algún tipo de conflito...

   O desenvolvemento da Categoría B: Ler con... D, axúdalles tamén a ser máis responsables xa que se comprometen a realizar unha tarefa de lectura que leva implícita preparación fóra do tempo escolar adicando parte do seu tempo de lecer e tempo extraescolar de xeito voluntario e isto tamén os fai máis empáticos e mellora as relacións internivel do alumnado.

MOITAS  GRAZAS POR  ESTE  RECOÑECEMENTO  AO  SEU  LABOR!!

DÍA DAS BIBLIOTECAS

   Hoxe celebramos o Día das Bibliotecas e, como non podía ser doutra forma, foi un día moi completo!

   Durante toda a semana estivemos facendo formación de usuarios para lembrar as normas da biblioteca, a CDU, organización dos andeis, o significado das etiquetas dos libros...

   Pero hoxe comezamos pola mañá entregando varios agasallos. Por unha banda, tivemos a entrega de premios aos nenos e nenas de 4º de Primaria que o ano pasado gañaron o Accésit da Categoría III do concurso Nós tamén creamos da TVG polo súa cortometraxe do libro A princesa do Caurel de Javier Solchaga e Patacrúa que é un conto acumulativo clásico arredor do roubo do anel desta princesa do Caurel.

    Podedes ver esta produción no seguinte enlace:

      Despois entregamos uns premios tamén aos participantes no reto lector do verán do curso 2023 que consistía en reescribir o final dun libro que leran na época estival

    A continuación fixemos a presentación do club de lectura deste ano para que o alumnado de 5º e 6º de Primaria vaia decidindo se quere participar e entregámoslle a ficha de inscrición.

 Para rematar esta sesión matutina, todo o alumnado de Primaria recibiu o marcapáxinas conmemorativo deste día escrito polos autores e ilustradores Dani Viéitez e Iria Iglesias como texto agasallo para o Colectivo LEMOS LE.

A PRINCESA DO CAUREL: Premiada co Accésit do concurso Nós tamén creamos

   Este ano participamos por primeira vez no concurso  Nós tamén creamos  convocado pola Consellería de Cultura, Educación e Universidade e a Secretaría Xeral de Política Lingüística que ten como finalidade a "promoción da adquisición, do uso e da valoración da lingua galega na aula por medio da creatividade e da incorporación das tecnoloxías da información e da comunicación ás aulas". 

    Para participar cada centro ten que elaborar unha curtametraxe en galego coa técnica stop motion a partir dun álbum ilustrado. No noso caso escollemos o libro A princesa do Caurel de Javier Solchaga e Patacrúa que é un conto acumulativo clásico arredor do roubo do anel desta princesa do Caurel.

   Para a elaboración da curtametraxe, o alumnado de 3º de primaria comezou investigando en internet como facer os elementos e personaxes que aparecen no libro co tangram.

   Despois fixeron todas as fotos necesarias para a montaxe da curta.

 

 

  E para rematar, gravaron a narración do conto nos estudos de Raiduvín.

   Despois de tanto traballo...  

O RESULTADO  FINAL  FOI  PREMIADO  CO  ACCÉSIT  NA  SÚA  CATEGORÍA!!

Podédelo ver no seguinte enlace:

Acceso a páxina web da CRTVG

 PARABÉNS  AO  ALUMNADO  E  PROFESORADO  ENCARGADOS  DESTE  PROXECTO!!!