CAMPAÑA ANTÁRTICA ESPAÑOLA

   O noso centro tivo a oportunidade de participar nunha videoconferencia coa Base Antártica Española "Gabriel de Castilla" de Illa Decepción para coñecer de primeira man o seu labor e as actividades que están realizando alí.

 

   Durante esta conferencia un dos científicos que está na base e o Capitán de Transmisións, Pablo Álvarez Balsa, faláronnos sobre aspectos moi diversos da súa campaña.

 

   Primeiro empezamos coñecendo a Antártida como continente: a súa xeografía, o clima, a súa historia e o tratado Antártico que permite estas investigacións.

 

    Despois explicáronnos as diferentes especies animais que viven alí e que a única flora que hai son musgos. Así coñecemos a diferentes especies de pingüíns, ás focas, aos leóns mariños, a aves como o petrel e tamén ao krill, que é un pequeno crustáceo do que se alimentan moitos dos demais animais.

 

 

    Na seguinte parte da videoconferencia explicáronnos algúns dos proxectos científicos que están realizando, como é a base onde viven, que fan e cales son as funcións que teñen alí.

     Para rematar a actividade abriuse unha queda de preguntas na que o noso alumnado e o alumnado dos outros centros participantes pudieron falar directamente cos nosos interlocutores.

    Ao final, o alumnado recibiu un saúdo especial de Pablo Álvarez xa que ten raíces en Sober e foi membro da Banda de Música do noso Cocenllo durante varios anos.

 

 

     E despois da videoconferencia aínda tivemos outra sorpresa: chegaron os diplomas que acreditan o apadriñamento dun pingüín por parte de cada clase puidendo ver na foto correspondente os seus pingüíns apadriñados: Marcelino, Josito, Tomi e Saltarín.

  Con este diploma comprometémonos a coidar o medio ambiente para que os pingüíns residentes na Antártida poidan seguir vivindo alí durante moito tempo.

 

MOITAS  GRAZAS  AOS  RESPONSABLES  DA  CAMPAÑA  POR  PERMITIR  QUE  O NOSO  CENTRO  FOSE  UN  DOS  PARTICIPANTES  NAS  VIDEOCONFERENCIAS  DESTE ANO!!

 

Se queredes ampliar a información sobre esta campaña podedes facelo directamente na súa páxina web:

 

https://ejercito.defensa.gob.es/unidades/Antartica/antartica/index.html

CLUB DE LECTURA (9 / 2023 - 2024)

 Hoxe é a última sesión que dedicaremos ao libro O neno de lume de Ledicia Costas.

 

   Nesta xuntanza falamos moito sobre o final do libro pero tamén sobre as emocións e a importancia de controlalas partindo de dous fragmentos do libro:

 "A nena agachouse para coller outra pedra do chan e entón Morgan sentiu que os seus ollos se incendiaban. Non había volta atrás. Non sabía como deter aquilo. Nese momento non podía, era como se a súa rabia tivese vida propia" (Páxina 102)

"Quixo aguantar as bágoas, e iso provocou que lle doese moito a garganta, como se lle estivesen cravando alfinetes.

- Non as tragues - suxeriulle Anna-. Eu fíxeno unha vez e tiven unha indixestión tremenda. A miña barriga inchouse coma un globo por mor das bágoas e tardou días en recuperar o seu tamaño normal" (Páxina 131)

      Debemos deixar saír as nosas emocións? Que podo facer se me sinto superado por unha emoción? Cales son as emocións "malas" e cales as "boas"?

  Tamén falamos sobre os tipos de narradores que existen xa que nalgúns pasaxes da lectura, atopámonos cun narrador en 2ª persoa que fala como se se dirixise directamente aos que estamos lendo:

"E ti, que pensas? Si, ti, a persoa que está lendo esta historia. Cres que Anna inventaba todas aquelas cousas ou que había algo de verdade?" (Páxina 85)

"Imaxino que tes curiosidade por saber que foi o que atopou Morgan máis alá da néboa." (Páxina 135)

  

    Ademais Julia e Dunia trouxeron unhas imaxes duns reloxos como os que nomea Culpepper, parecidos a reloxos de cuco pero que indican o tempo que vai facer e explicáronnos como funcionan

   Despois quixemos facer como os protagonistas da historia: comer un anaco de red velvet no salón da casa de Culpepper aínda que a tarta non era tan red senón que quedou un pouco pink, e o salón da casa cambiámolo pola biblioteca do colexio.

 

   E se vos estades preguntando de onde saíu esta tarta, pois contarvos que a fixeron algúns membros do club o día anterior:

 

-  Primeiro houbo que facer o biscoito con colorante vermello, esperar a que enfriara e cortalo a metade.

 

- Despois houbo que mollar o biscoito cun almibre feito con agua e azucre. Para este proceso fixeron buratos na tapa dunha botella de auga.

 

 

- Unha vez que o biscoito estivo mollado, prepararon a crema pasteleira para o recheo e tapárono.

- Para finalizar montaron clara de ovo a punto de neve cun pouco azucre para decorar.

- E listo! Así quedou a nosa versión da red velvet apta para intolerantes á lactosa!!

   Unha tarta moi saborosa que desfrutamos no remate da sesión mentres resolvíamos a actividade pendente da sesión anterior, lembrades? Cada un tiña que pensar nun apodo que o definise e deixalo dobrado na mesa e os demáis tratar de adiviñar a quen correspondía cada un.

 

   Así, entre bocado e bocado, enterámonos de quen eran Lady Tallarín, Cabezanube, Dona Rateira, Avalancha, Dona Perfeccionista, Aracnofóbica, Don Comillón...  Unha actividade moi divertida que nos deixou moi bo sabor de boca e con ganas de que chegue a próxima sesión!!

 

DÍA DE ROSALÍA - 2024

   O 23 de febreiro conmemórase o Día de Rosalía de Castro porque é o aniversario do seu nacemento.

   Este ano a AELG (Asociación de Escritoras e Escritores en Lingua Galega) mandou aos centros de ensino unha proposta que consistía en ilustrar uns versos de Rosalía de Castro e despois elaborar un collage con eles. Nós fixemos unha variación e cambiamos o collage por uns pequenos vídeos.  Esperamos que vos gusten!!

 

 

    Ademais das ilustracións tamén fixemos un certame de investigación no que o alumnado de primaria tiña que investigar sobre a biografía e as obras de Rosalía de Castro e cubrir unhas fichas elaboradas por varios centros educativos de A Coruña que eles mesmos compartiron con nós a través do e-mail.

  

    Hoxe despois do visionado das montaxes dos videopoemas, entregamos os agasallos ao alumnado que participou neste certame porque o fixo moi ben!!

 

 

 

FELIZ  DÍA  DE  ROSALÍA!!

AS FAMILIAS CONTAN: Familia de Aldán

   Hoxe estiveron na biblioteca Aldán e a súa nai Tamara para compartir con nós o libro Alicia y el cerebro maravilloso escrito por Nazareth Castellanos.

     Á nai de Alicia encántalle ler libros sobre o funcionamento do corpo humano pero a Alicia resúltalle aburrido porque hai moitas palabras difíciles e non entende nada; aínda que todo cambia cando coñece á Coneja Cajal e ao seu espello máxico co que pode ver o que hai dentro do seu corpo.

  O primeiro que viu foi unha noz xigante que resultou ser o seu cerebro. Sobre el descubriu moitas cousas que non sabía: pesa máis de un quilo e medio, encárgase de procesar toda a información, é o órgano máis comellón e comunica todo o corpo formando un precioso bosque de neuronas ao que hai que coidar.

   Alicia tamén coñeceu á eiruga xardineira que lle ensinou a ler e lle explicou que cada vez que aprendemos algo as ramas das árbores dos nosos bosques de neuronas medran e enlázanse entre si facendo o bosque moito máis fermoso.

     A continuación coñeceu a uns xemelgos que a levaron á zona da memoria onde se atoparon cun cabaliño de mar moi especial que nos axuda a lembrar un montón de cousas.

    A seguinte parada nesta viaxe polo cerebro foi nunha améndoa (amígdala) que medra con sentimentos como a rabia ou a tristeza mentres que cando te sintes ben volve ao seu tamaño normal. Esta améndoa é a encargada das emocións.

    Outro personaxe que coñeceu Alicia foi a Raíña de corazóns, chamada tamén Atención. Ela pode facer que só vexas unha cousa e as outras desaparezan; pero como isto era un pouco difícil para Alicia e a súa améndoa estaba comezando a crecer outra vez, a Raíña levouna cos seus trompetistas para que aprendese a respirar e relaxarse: inspirar, expirar, inspirar, expirar...

  E así, pouco a pouco, Alicia coñeceu como funciona o cerebo dunha persoa. Se vós queredes saber todo o que a Coella Cajal lle ensinou, podedes escoitar o seguinte podcast onde Tamara e Aldán nos deixaron gravado o libro.

 

 

MOITAS  GRAZAS  POR  VIR  A CONTARNOS  ESTE  LIBRO  E  POR  TODO  O  QUE  TRABALLASTES  PARA  FACER  OS  TÍTERES  DOS  PROTAGONISTAS!

 

 

GALERÍA  DE  IMAXES