DÍA DA NENA E A MULLER NA CIENCIA: LAURA LLANO RODRÍGUEZ

  A  Asamblea Xeral das Nacións Unidas conmemora o 11 de febreiro o Día Internacional da Nena e a Muller na Ciencia, coa intención de visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

Imaxe: Asesoría Bibliotecas Escolares

 

    Por esta razón invitamos hoxe ao colexio a Laura Llano Rodríguez, ex-alumna do centro que estudou o Grao en enxeñería eléctrica e traballa na actualidade nunha empresa de consultoría enerxética, concretamente na xestión das liñas de alta tensión.

   Ela comezou falándonos da importancia da electricidade na vida cotiá (acender ou apagar a luz, o frigorífico, a lavadora...) e as diferentes formas que temos de conseguir electricidade.

    Sobre todo da enerxía eólica e dos aeroxeradores que se poden ver case desde calquera lugar de Sober; de feito, o alumnado sorprendeuse moitísimo coas dimensións reais que teñen xa que nalgúns ata hai un ascensor dentro para subir a facer o mantemento!

 

    Tamén nos trouxo unha maqueta feita con culleres e un tapón de plástico que ao xirar acendía un pequeno led coa que nos explicou o seu funcionamento: por que as veces as aspas non funcionan aínda que haxa vento, por que non poden funcionar se hai moito, como xiran para aproveitar a dirección do vento...

   Despois explicounos como chega a electricidade que se xera ás nosas casas e os diferentes tipos de torres de alta tensión. Sabiades que son de cores brancas e vermellas con luces na parte superior cando están preto dun aeoroporto?

     Tamén aprendemos como son os cables de alta tensión: que poden ser de cobre ou aluminio porque ambos son bos materiais condutores (aínda que nos dixo que o mellor era o ouro pero sairía demasiado caro) e as diferenzas que hai entre eles dependendo se son dos que van polas torres ou se son dos que van soterrados.

       Para rematar Laura respondeu a todas as preguntas dos nosos nenos e nenas que vos podemos dicir que non foron poucas!

      Se queredes saber moitas máis cousas sobre o traballo de Laura, podedes escoitar o seguinte podcast no que responde ás preguntas de Lara, Nayara e Daniela.

MOITAS  GRAZAS  POLA  TÚA  VISITA!!

ESPERAMOS  QUE  A  TÚA  EXPERIENCIA  NOS   AXUDE  A  COMPRENDER  QUE AS  NENAS  E  OS  NENOS  PODEN  SER  O  QUE  QUEIRAN  SER.

 GALERÍA  DE  IMAXES

DÍA INTERNACIONAL DA NENA E A MULLER NA CIENCIA - 2024

   Mentres estivemos de entroido conmemorouse o Día Internacional da Nena e a Muller na Ciencia. Un día que a Asamblea Xeral das Nacións Unidas celebra o 11 de febreiro coa intención de visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

   No colexio sumámonos a esta iniciativa invitando cada ano á biblioteca a mulleres de Ciencia relacionadas coa nosa comunidade educativa. Nesta ocasión tivemos con nós a Alejandra Losada Novoa, compañeira do mestre Marco e que, entre outras cousas, estudou Desenvolvemento de aplicacións web.

 

   Ela explicounos o seu traballo e que era iso de programar: que se programa? onde atopamos programación na nosa vida cotiá? que é necesario para programar? onde se almacenan as aplicacións?

   Ademais falounos da evolución dos ordenadores desde o primeiro ENIAC (Electronic Numerical Integrator and Computer) de 1947 que xa estaba operado por mulleres ata un Raspberry que é un pequeno ordenador do tamaño dunha man.

   Tamén nos falou da evolución doutros dispositivos tecnolóxicos que coñecen ou manexan os nosos alumnos e alumnas: móbiles, tablets, consolas... e mostrounos unha das primeiras consolas que utilizaban casettes.

     

  Despois pasamos á parte práctica da intervención. Primeiro un pouco de programación scratch e despois Alejandra desmontou un dos vellos ordenadores que temos no almacén do colexio para ensinarnos os seus compoñentes e comparalos cos actuais e cun escornabot.

 

 

 

      Así o noso alumnado puido ver de cerca como é un ordenador por dentro.

 

    Para saber moitas máis cousas sobre programación e sobre o traballo de Alejandra podedes escoitar o seguinte podcast no que ela responde ás preguntas de Martín, Lara e Candela.

 

MOITAS  GRAZAS  POR  DEDICARNOS ESTA MAÑÁ!!

ESPERAMOS  QUE  CON  ACTIVIDADES  COMO  ESTAS  AS  CRIANZAS COMPRENDAN  QUE  NO  FUTURO  PODEN  SER  O  QUE  QUEIRAN  SER.

 

 GALERÍA  DE  IMAXES

DÍA INTERNACIONAL DA NENA E A MULLER NA CIENCIA - 2023

     O 11 de febreiro conmemórase o Día Internacional da Nena e a Muller na Ciencia. Un día co que a Asamblea Xeral das Nacións Unidas pretende visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

   Desde o colexio xa fai varios anos que nos sumarnos a esta iniciativa invitando a mulleres de Ciencia do noso Concello. Nesta ocasión tivemos con nós a Tamara Quiroga e Betty Pérez, que ademais de ser de Sober; son nais dos nosos compañeiros Aldán e Noa.

    

     Elas son técnicas de Raios e traballan no Servizo de Radioloxía do Hospital de Monforte de Lemos polo que puidemos aprender moitísimas cousas sobre este traballo que pertence á rama sanitaria que se encarga do radiodiagnóstico con probas como radiografías ou ecografías.

    Durante a súa intervención, faláronos dos diferentes tipos de probas que se fan e das diferentes máquinas que se utilizan para facelas: radiografías, TAC, resonancias, mamografías... e para que o entenderamos ben, explicáronos que cando nos fan unha resonancia as imaxes que vemos son como se nos cortasen en rebanadas.

 

   Ademais de explicarnos en que consiste o seu traballo, ensináronos un vídeo co que coñecemos un pouco da orixe e o descubremento destas probas desde a 1ª radiografía que se fixo en 1895.

   Tamén nos mostraron radiografías antigas na mesa de luz para que puidésemos ver exemplos de como se ven as diferentes partes do noso corpo:

Craneo

Vexiga, riles e uréteres

Pulmóns

Columna vertebral

E ata unha prótese de cadeira!!

      Ademais aprendemos que para protexerse das radiacións a sala onde se fan está aislada con chumbo e que se teñen que quedarse co paciente que ten que facer a proba deben protexerse con delantais plomados.

      Para rematar a visita, acudiron as instalacións de Radiuvín onde falaron con Lola e Darío sobre todo o que nos contaran na biblioteca.

ESPERAMOS  QUE  O  VOSO  EXEMPLO  DE  MULLERES  DE  CIENCIA, AXUDE  ÁS  NOSAS  ALUMNAS  A  COMPRENDER  QUE  DE  MAIORES  PODEN  SER  O  QUE  ELAS  QUEIRAN  SER.   

 

   MOITAS  GRAZAS  POR  VIR  A  COMPARTIR
CON  NÓS  ESTE  DÍA!!

GALERÍA  DE  IMAXES 

 

DÍA DA NENA E A MULLER NA CIENCIA: PATRICIA DOMÍNGUEZ

   O  11 de febreiro conmemórase o  Día Internacional das nenas e das mulleres na ciencia  que ten como finalidade visibilizar o labor das científicas, promover a realización de actividades e fomentar vocacións científicas entre as nenas para axudar a pechar a brecha de xénero na ciencia.

 

   Para reforzar estas ideas, na biblioteca levamos varios cursos convidando a mulleres ex-alumnas do colexio de Sober relacionadas con diferentes ramas da ciencia que lle contan ao noso alumnado como é o seu traballo. Este acompañounos  Patricia Domínguez Corbacho  que é enxeñeira técnica industrial e que traballa nunha central hidroeléctrica.

   Ela ensinounos o proceso de produción de electricidade a través da auga e así puidemos coñecer como funciona unha central de este tipo: as súas partes, as posibles incidencias ou avarías e todas cantas dúbidas tiveron os nosos alumnos e alumnas.

   Despois o alumnado distribuído en grupos enfrontouse ao reto de crear a súa propia turbina de auga reproducindo a proposta didáctica de Endesa Educa e a verdade é que como podedes ver no vídeo, fixéronno moi ben!!

 

 

      Para rematar Patricia tamén pasou polos estudos de radio onde respondeu ás preguntas de Lucía e de Pilar e nos deixou unhas agarimosas verbas. Poderedes saber moitas cousas sobre o tema de hoxe escoitando a súa entrevista.

  MOITAS  GRAZAS  POLA  TÚA  VISITA!! 

GALERÍA  DE  IMAXES