DÍA DA NENA E A MULLER NA CIENCIA: LAURA LLANO RODRÍGUEZ

  A  Asamblea Xeral das Nacións Unidas conmemora o 11 de febreiro o Día Internacional da Nena e a Muller na Ciencia, coa intención de visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

Imaxe: Asesoría Bibliotecas Escolares

 

    Por esta razón invitamos hoxe ao colexio a Laura Llano Rodríguez, ex-alumna do centro que estudou o Grao en enxeñería eléctrica e traballa na actualidade nunha empresa de consultoría enerxética, concretamente na xestión das liñas de alta tensión.

   Ela comezou falándonos da importancia da electricidade na vida cotiá (acender ou apagar a luz, o frigorífico, a lavadora...) e as diferentes formas que temos de conseguir electricidade.

    Sobre todo da enerxía eólica e dos aeroxeradores que se poden ver case desde calquera lugar de Sober; de feito, o alumnado sorprendeuse moitísimo coas dimensións reais que teñen xa que nalgúns ata hai un ascensor dentro para subir a facer o mantemento!

 

    Tamén nos trouxo unha maqueta feita con culleres e un tapón de plástico que ao xirar acendía un pequeno led coa que nos explicou o seu funcionamento: por que as veces as aspas non funcionan aínda que haxa vento, por que non poden funcionar se hai moito, como xiran para aproveitar a dirección do vento...

   Despois explicounos como chega a electricidade que se xera ás nosas casas e os diferentes tipos de torres de alta tensión. Sabiades que son de cores brancas e vermellas con luces na parte superior cando están preto dun aeoroporto?

     Tamén aprendemos como son os cables de alta tensión: que poden ser de cobre ou aluminio porque ambos son bos materiais condutores (aínda que nos dixo que o mellor era o ouro pero sairía demasiado caro) e as diferenzas que hai entre eles dependendo se son dos que van polas torres ou se son dos que van soterrados.

       Para rematar Laura respondeu a todas as preguntas dos nosos nenos e nenas que vos podemos dicir que non foron poucas!

      Se queredes saber moitas máis cousas sobre o traballo de Laura, podedes escoitar o seguinte podcast no que responde ás preguntas de Lara, Nayara e Daniela.

MOITAS  GRAZAS  POLA  TÚA  VISITA!!

ESPERAMOS  QUE  A  TÚA  EXPERIENCIA  NOS   AXUDE  A  COMPRENDER  QUE AS  NENAS  E  OS  NENOS  PODEN  SER  O  QUE  QUEIRAN  SER.

 GALERÍA  DE  IMAXES

NOVEMBRO. MES DA CIENCIA EN GALEGO (IV)

  Compartimos os últimos experimentos realizados durante novembro, o mes da ciencia en galego nas bibliotecas.

  Rematamos cos experimentos de 5º e 6º de Primaria para que aprendades moito sobre o aparello dixestivo, as células vexetais da cebola e os efectos do tabaco no aparello respiratorio.

 

 

 

 

 

NOVEMBRO, MES DA CIENCIA EN GALEGO (III)

 Explorando o Universo na Biblioteta Escolar: Por que a Terra non para de bailar?

    Neste mes da ciencia nas bilbiotecas escolares os nenos e nenas de 4º de Primaria quixemos descubrir un segredo a voces: a Terra non deixa de moverse e iso fai que cada día e cada estación sexan unha verdadeira obra de arte científica. Para logralo, construímos unha pequena maqueta ilustrativa e contamos algunha que outra anécdota.

Acompáñanos nesta aventura!

 

NOVEMBRO, MES DA CIENCIA EN GALEGO (II)

    Seguimos compartindo experimentos realizados durante novembro, o mes da ciencia en galego nas bibliotecas.

    Compartimos hoxe os experimentos de 1º, 2º e 3º de Primaria para que vexades que pequenos científicos e científicas tan marabillosos temos:

 

 

 

 

NOVEMBRO MES DA CIENCIA EN GALEGO (I)

      No ano 2001, a UNESCO declarou o 10 de novembro como Día Mundial da Ciencia para a Paz e o Desenvolvemento e, por esta razón, novembro converteuse para nós no Mes da Ciencia en galego. 

   O obxectivo desta conmemoración é mostrar que a lingua galega é útil e tan válida como calquera outra para facer pescudas e divulgación científica e para demostralo, durante todo o mes estivemos a facer diferentes experimentos.

   Comezamos compartindo os experimentos de Educación Infantil:

 

 

XORNADA MICOLÓXICA

  Coas cestas preparadas e acompañados por Ramón Losada (micólogo da Asociación Micolóxida de Madrid), volvemos a realizar unha xornada didáctica sobre setas e cogomelos cos nenos e nenas do colexio.

 

 

   Nesta xornada saímos polos arredores do colexio para buscar as setas e os cogomelos e desfrutamos da natureza, das cores propias do outono e das explicacións de Ramón.

    Cunha boa colleita e coas cestas cheas voltamos ao colexio onde, coa axuda do micólogo e consultando libros sobre setas, diferenzamos as especies tóxicas (mantel vermello) das non tóxicas (mantel branco) e puxémoslles etiquetas cos seus nomes.

 

      Para rematar a xornada, Ramón fixo unha explicación sobre elas, as súas propiedades, os seus perigos, as súas partes, como diferenzalas...

     Pero a experiencia coas setas este ano non acabou aquí senon que ao día seguinte, Juan e Sefa (os nosos cociñeiros) prepararon todos os boletus reticulatus que colleitamos para acompañar o menú do comedor.

Estaban boísimos!!!

 

   Lembrade que na biblioteca temos moitos fondos sobre setas nos que poderedes ler historias ou contos de cogomelos, pero tamén libros nos que poderedes aprender moitas máis cousas sobre as setas.

 

 

 

 

GALERÍA  DE  IMAXES

 

FLOTACIÓN E PRINCIPIO DE ARQUÍMEDES

   O alumnado de 5º de Primaria segue traballando a materia de ciencias facendo experimentos na biblioteca escolar; neste caso puxeron en práctica os coñecementos adquiridos sobre flotación e o principio de Arquímedes. 

  Así puideron entender por que un barco que pesa toneladas non afunde mentres que un pequeno anaco de ferro ou unha pedriña que pesa moito menos, si o fan.

VOLUME E DENSIDADE

  Dentro da materia de Ciencias da Natureza, o noso alumnado de 5º de Primaria traballa os conceptos de masa, volume e densidade. 

    Para clarificar estes conceptos e traballalos de xeito práctico, estiveron argallando na biblioteca e realizando diferentes actividades científicas coas que reforzar e comprobar o aprendido: unha columna de densidade e desprazamentos de líquidos.

 

 

 

GALERÍA  DE  IMAXES

CIENCIA Á FEIRA

  Hoxe tivemos no colexio a actividade "Ciencia á Feira" impulsada polo grupo de innnovación docente XuvenCiencia do Campus de Lugo da USC. 

 Este proxecto aproveita os mercados tradicionais e os centros educativos para achegar a adultos e escolares contidos ligados a diversos aspectos científicos. 

     Na feira puxeron un posto no que repartían información e organizaron unha charla na Casa da Cultura. No noso colexio organizaron unha sesión na que nos falaron sobre a xestión sustentable da auga: ciclo natural da auga,  ciclo urbano da auga, xestión deste recurso en Galicia, estratexias e enfoques para a súa xestión sustentable, as depuradoras da nosa zona... 

  Esperamos que o noso alumnado aproveitara ben esta sesión e lembre no futuro todo o aprendido hoxe.

 

 

CAMPAÑA ANTÁRTICA ESPAÑOLA

   O noso centro tivo a oportunidade de participar nunha videoconferencia coa Base Antártica Española "Gabriel de Castilla" de Illa Decepción para coñecer de primeira man o seu labor e as actividades que están realizando alí.

 

   Durante esta conferencia un dos científicos que está na base e o Capitán de Transmisións, Pablo Álvarez Balsa, faláronnos sobre aspectos moi diversos da súa campaña.

 

   Primeiro empezamos coñecendo a Antártida como continente: a súa xeografía, o clima, a súa historia e o tratado Antártico que permite estas investigacións.

 

    Despois explicáronnos as diferentes especies animais que viven alí e que a única flora que hai son musgos. Así coñecemos a diferentes especies de pingüíns, ás focas, aos leóns mariños, a aves como o petrel e tamén ao krill, que é un pequeno crustáceo do que se alimentan moitos dos demais animais.

 

 

    Na seguinte parte da videoconferencia explicáronnos algúns dos proxectos científicos que están realizando, como é a base onde viven, que fan e cales son as funcións que teñen alí.

     Para rematar a actividade abriuse unha queda de preguntas na que o noso alumnado e o alumnado dos outros centros participantes pudieron falar directamente cos nosos interlocutores.

    Ao final, o alumnado recibiu un saúdo especial de Pablo Álvarez xa que ten raíces en Sober e foi membro da Banda de Música do noso Cocenllo durante varios anos.

 

 

     E despois da videoconferencia aínda tivemos outra sorpresa: chegaron os diplomas que acreditan o apadriñamento dun pingüín por parte de cada clase puidendo ver na foto correspondente os seus pingüíns apadriñados: Marcelino, Josito, Tomi e Saltarín.

  Con este diploma comprometémonos a coidar o medio ambiente para que os pingüíns residentes na Antártida poidan seguir vivindo alí durante moito tempo.

 

MOITAS  GRAZAS  AOS  RESPONSABLES  DA  CAMPAÑA  POR  PERMITIR  QUE  O NOSO  CENTRO  FOSE  UN  DOS  PARTICIPANTES  NAS  VIDEOCONFERENCIAS  DESTE ANO!!

 

Se queredes ampliar a información sobre esta campaña podedes facelo directamente na súa páxina web:

 

https://ejercito.defensa.gob.es/unidades/Antartica/antartica/index.html