DESPEDIDA JULIA

      Hai despedidas que non marcan un final, senón a celebración dun camiño compartido; e iso é o que nos pasou coa despedida de Julia Fernández, a bibliotecaria municipal do noso concello. 

   Desde o cole quixemos renderlle unha pequena homenaxe por ser unha persoa moi especial para a nosa comunidade lectora xa que tras anos de dedicación á biblioteca municipal e de colaboración constante co noso centro, chegou o momento da súa xubilación.

     Ela acompañounos en innumerables actividades de animación á lectura e á escritura e compartiu con nós coñecementos, ilusión e proxectos. Ademais, foi fundadora e integrante do noso club de lectura, contribuíndo a crear ese espazo de encontro onde os libros nos unen e nos fan medrar.

      No seu último día no club de lectura, o alumnado quixo agradecerlle todo o recibido formando un corredor de aplausos que encheu de emoción a despedida. Entre sorrisos, apertas e algún que outro ollo brillante, fixémoslle entrega dun pequeno agasallo cargado de gratitude e cariño.

 

     As bibliotecas están feitas de libros, pero sobre todo de persoas. Grazas por formar parte da nosa historia e por axudarnos a escribir tantas páxinas fermosas. Desexámosche unha nova etapa chea de lecturas, proxectos e momentos felices. 

AS  PORTAS  DA  NOSA  BIBLIOTECA  ESTARÁN  SEMPRE  ABERTAS  PARA  TI!!

I ROMARÍA DAS LETRAS GALEGAS

    Hoxe celebramos en Sober a I Romaría das Letras organizada polo Colectivo LEMOSLE, que como sabedes, está formado por bibliotecas escolares da Comarca, BPM, librarías e persoas vencelladas ao ámbito da lectura da comarca de Lemos. 

 

    Nesta xornada de convivencia participamos 8 centros educativos de Primaria (CEIP Pobra de Brollón, CEIP A Gándara, CEIP Plurilingüe de Monforte, CEIP de Oural, CEIP de Sober, CEIP Rosalía de Castro de Bóveda e CEIP Monte Baliño de Pantón) o IES Daviña Rey de Monforte de Lemos e usuarias da Biblioteca Pública Municipal do noso Concello xuntándonos así máis de 300 personas no colexio xa que o mal tempo decidiu ser partícipe tamén desta xornada e no nos deixou celebrala na carballeira como estaba previsto.

 

   Durante o acto principal os diferentes colexios fixeron propostas moi diversas para conmemorar a nosa lingua e a Begoña Caamaño: regueifas, maios, cancións tradicionais, poesía, obradoiros, murais... e todo isto amenizado por un grupo de música tradicional formado por alumnado do IES Daviña Rey que terminou de darlle o toque festeiro a esta xuntanza.

   Desde o noso colexio participamos propuxemos recoller a relación de Begoña Caamaño coa mitoloxía e compartir dúas lendas do noso concello; a primeira explica que a creación dos Canóns do Sil se debe aos deuses Xúpiter e Xuño e a segunda é unha lenda de mouras e encantamentos.

   

     Ao rematar o IES Daviña Rey repartiu chapas conmemorativas para todos os asistentes e fixemos unhas fotos cun fotocall dedicado á obra de Begoña Caamaño.

   

 
 

    A xornada finalizou cun xantar de confraternidade no pavillón do colexio durante o que o alumnado do CEIP Monforte de Lemos, organizou o obradoiro sementando palabras no que os nenos e as nenas podían escribir a súa palabra favorita en galego.

   Se queredes escoitar toda a información desta xornada, podedes facelo no seguinte podcast no que tamén escoitaredes as interesantes lendas de Sober contadas por alumnado de 5º e 6º de Primaria.

 

 

OXALÁ  ESTA  SEXA  A  PRIMEIRA  DE  MOITAS  EDICIÓNS  PORQUE  A  LINGUA  GALEGA  MEDRA  CANDO  A  COMPARTIMOS,  CANDO  A  CELEBRAMOS  E  CANDO  A  VIVIMOS  XUNTOS!!

 

FELIZ  DÍA  DAS  LETRAS  GALEGAS!! 

 

GALERÍA  DE  IMAXES

 

 

 

 

PETISCOS DE GALICIA

 

       PETISCOS DE GALICIA é un proxecto de podcast escolar no que participamos diferentes colexios de Galicia para dar a coñecer as receitas galegas tradicionais máis ricas!

      Desde o noso cole propuxemos como protagonista do programa á Rosca de Sober pero tamén podedes escoitar a receita da empanada de iscos e, por se sodes moi lambóns, outro doce típico que é a vexiga ou tripón.

     Estas receitas son froito dun traballo de investigación que fixo o noso alumnado en colaboración coas familias. A redacción final de cada receita é a combinación de todas as propostas recibidas con diversas variacións que nos foron chegando.

    Podedes escoitar o programa final no seguinte podcast que ten como locutores representantes do centro ao alumnado de 6º d Primaria.

   Se queredes coñecer moitas máis receitas tradicionais de Galicia como a empanada de millo e berberechos que propoñen desde Rianxo, a tortilla romana de Lugo, a Pan dos Apóstolos de Viveiro.... escoitando os programas dos outros coles que participan no proxecto no seguinte enlace:

 PETISCOS  DE  GALICIA

BO  PROVEITO!! 

 

PRÁCTICUM - Facultade de Educación e Traballo Social de Ourense

    Por terceiro ano colaboramos coa Facultade de Educación e Traballo Social do Campus de Ourense. Nesta ocasión a colaboración fíxose dento do Prácticum. Obradoiros de iniciación á práctica profesional destinado ao alumnado dos Graos de Educación Infantil e Educación Primaria coa finalidade de coñecer a realidade do noso centro educativo.

    Para  o desenvolvemento da actividade, xs universitarios dividíronse en varios grupos guiados por biblioaxudantes que pasaron por 5 puntos diferentes do noso colexio: a biblioteca, o espazo croma, a radio e as aulas de Ed. Infantil e Ed. Primaria.

   Na biblioteca, xs biblioaxudantes tiñan preparada unha intervención sobre a organización da nosa biblioteca (Lectuvín, a CDU, espazo creativo...), as actividades que facemos, o seu labor como biblioaxudantes e todos os recursos e materiais que se poden atopar nela.

     No espazo audiovisual do croma, tres biblioaxudantes explicáronlles como se utiliza esta técnica e as súas aplicacións didácticas: pero non só de forma teórica xa que puideron facerse varias fotografías e gravar algúns vídeos. 

      A continuación coñeceron os nosos estudos radiofónicos de Radiuvín, onde outro grupo de biblioaxudantes recibiron aos futuros mestres e mestras para explicarlles como se grava, como funciona o programa editor de audio e ata lles fixeron unha pequena entrevista.

    Na visita ás aulas de Ed. Infantil e Ed. Primaria puideron coñecer ás nosas crianzas e a diferente metodoloxía de traballo que se leva a cabo nas aulas mixtas, nas que convive o alumnado de dous cursos diferentes, e nas aulas simples.

   Despois das visitas programadas puideron compartir tempo de lecer co noso alumnado durante o recreo.

    E para rematar, o alumnado da facultade participou nunha mesa redonda coa directora do centro e o noso alumnado na que puxeron en común impresións, inquedanzas, dúbidas, ideas...

MOITAS  GRAZAS  POR  VIR  A  COMPARTIR  CON  NÓS  ESTA  MAÑÁ,

ESPERAMOS  QUE  VOS  GUSTARA  A  VISITA!!

GALERÍA  DE  IMAXES

 

DÍA MUNDIAL DA SAÚDE

 

  O 7 de abril conmemórase o Día Mundial da Saúde para recoñecer a súa importancia como un dereito básico e universal recoñecido tamén na Axenda 2030 que propón Saúde e Benestar como un dos seus obxectivos.

  Este ano realizamos unha actividade co IES Daviña Rey que nos convidou a pasar unha mañá co alumnado do Ciclo Medio de Coidados auxiliares de enfermaría co que aprendemos moito sobre o coidado da saúde.

   Alí ensináronos a facer unha RCP: os máis pequenos aprenderon cunha versión da canción infantil Había una vez un barquito chiquitito na que aprenderon a técnica cun peluche e memorizaron o número de emerxencias 112, os maiores aprenderon a facela entre eles e os dos últimos cursos con maniquíes e desfibriladores.

 

 

    Tamén nos fixeron fincapé na hixiene dental para o que lles puxeron un vídeo e lles ensinaron como cepillarse correctamente. Tamén limparon unhas dentaduras e subiron a unha cadeira de dentista explicándolles para que era cada aparato e os instrumentos que se utilizan nunha consulta dental.

 

    Ademais ensináronlles a facer a maniobra de Heimlich en caso de que alguén se atragante.

    Outro obradoiro centrouse no coñecemento do propio corpo a través do recoñecemento dos ósos nun esqueleto, de xogos como Potato ou Operación e de realidade aumentada.

 

    Entre tanta aprendizaxe tamén houbo tempo para repoñer forzas, para xogar ao aire libre e para coñecer a súa biblioteca e poñer a mente a funcionar con algúns dos recursos dispoñibles nela.

 MOITAS  GRAZAS  AO  IES  DAVIÑA  REY  POR  ESTA  XORNADA  TAN  PROVEITOSA!!

GALERÍA  DE  IMAXES