RETO LECTOR VERÁN 2026

 

E  SE  ES  DE  EDUCACIÓN  INFANTIL,  LEMBRA  QUE  TAMÉN  PODES  PARTICIPAR  PEDINDO  AXUDA  A  ALGUÉN DA  TÚA  FAMILIA.

DÍA DAS FAMILIAS 2026: En Familia

    Como cada 15 de maio, dende as aulas de Infantil, quixemos conmemorar o Día das Familias. Para isto, afondamos nas diferentes formas de familias que coñecemos e na incorporación das mascotas como un membro destas lendo o libro de En familia de Olga de Dios.

    Os días previos a esta celebración fomos elaborando de forma conxunta un agasallo sorpresa para as familias. Primeiro empezamos pintando catro depresores de dúas cores diferentes escollidas por cada nena e cada neno.

                                 

    Seguimos coa elaboración do agasallo, para o cal utilizamos os bolis 3D coa axuda das mestras. Con eles creamos tres figuras diferentes para decorar a nosa obra: unha estrela, un corazón e unha flor.

                                 

                                 

  

    Para rematar, pegamos todo xunto e por fin agasallo rematado, que a estas alturas xa imaxinades que sería: UN MARCO coa foto da nosa FAMILIA. A continuación, deixámosvos uns exemplos do resultado.

ANIMACIÓN Á LECTURA: EREA MORA

     Hoxe comezamos as actividades do Día do libro cunha sesión de animación á lectura con Erea Mora, a través da editorial Vicens Vives.

    Nesta sesión coñecemos a unha bolboreta que tiña un problema: As súas ás eran brancas!!

    Para solucionalo busca axuda noutros animais do bosque como o coello que lle presta unha cenoria para a cor laranxa, a rá que a embarra para dárlle cor marrón e o raposo que lle regala amorodos para a cor rosa.

 

 

      Tamén aparecerá un anano que remata de pintarlle as ás a bolboreta para que sexan unhas ás marabillosas!!

    Pero... neste  conto tamén hai unha bruxa que non é tan boa e que lle borrou todas as cores deixándo as ás brancas outra vez.

    Menos mal que volveu anano para arranxalas e finalmente bolboreta pode ter unhas ás preciosas cheas de mil cores!!

 

GALERÍA  DE  IMAXES

 

QUE QUERES SER DE MAIOR, PEQUENA? As nosas ex-alumnas contan

    O martes de Pascua é festivo local en Monforte que é a cidade á que os nosos alumnos teñen que ir ao instituto. Como as nosas ex-alumnas ex-biblioaxudantes Ada, Daniela, Nayara, Lara, Candela e Antía non tiñan clase, quixeron vir a compartir con nós o libro  Que queres ser de maior, pequena? de Sabela Fernández Trelles.

     Así coñecemos á protagonista deste libro, Antía, á que non  lle gusta nada que sempre lle pregunten que quere ser de maior; e, aínda menos, que os seus pais contesten: «Serás unha gran doutora, como a túa nai; ou unha gran panadeira, seguindo a tradición familiar!». 

    Ela ten moi claro á que lle gustaría dedicarse xa que hai seis oficios nos que pensa que sería moi boa. A primeira opción é ser coidadora de vacas voadoras que non é que non existan, senón que ninguén as coñece porque son tan áxiles que ata poden surfear na praia de A Coruña.

    A seguinte opción é coleccionista de bicos que, aínda que o pareza, non é nada sinxelo coleccionar bicos e gardalos no corazón: BEIXICLÍN!

     Tampouco estaría nada mal ser escultora de nubes e ir cambiando a súa forma, lectora de desexos para coñecer as ansias de cada un ou domadora de unicornios que non son tan doces como parecen.

     E nun lugar como a biblioteca, a quen non lle gustaría ser gardiá de historias? Das escritas ou das que conta a xente maior, de aventuras, de mariñeiros ou doutras que aínda están por contar.

   E xa non vos contamos máis... se queredes saber que vai ser Antía de maior e coñecer o resto desta historia, podedes facelo no seguinte podcast que nos deixaron en Radiuvín.

  

MOITAS  GRAZAS  POR  VIR  A  COMPARTIR  ESTA  LECTURA, DEDICÁNDONOS  O  VOSO  ÚLTIMO  DÍA  DE  VACACIÓNS!!

OXALÁ  QUE  DE  MAIORES  POIDADES  SER  O  QUE  QUEIRADES  SER!!

 GALERÍA  DE  IMAXES

 

CONTOS PARA O DÍA DA PAZ

   O 30 de xaneiro é o DÍA  DA  PAZ  E  DA  NON  VIOLENCIA  ESCOLAR.  Este ano, quixemos conmemoralo cunha sesión de contos pola paz coa narradora Teresa Grau e coa colaboración de Mercedes Fernández; unha actividade que foi subvencionada pola Asociación de Nais e Pais do colexio.

   Decidimos conmemorar este día con contos porque son unha gran ferramenta para facer que os nenos e as nenas reflexionen sobre a paz e a non violencia pero tamén sobre os sentimentos contrarios á paz: medo, rabia, enfado, ira...

   

   Teresa contounos a historia da raíña patata á que lle daba moito medo pensar que o cociñeiro a podía cociñar e a un soldado que tiña moita rabia e non sabía tranquilizarse polo que lle foi a pedir axuda a un sabio que lle ensinou a relaxarse, a respirar e a desfacerse do medo e da rabia que non lle deixaba estar tranquilo e controlar as súas emocións.

  

   Con Mercedes coñecemos a historia das botas dun xeneral que só pensaba na guerra e en destrozar todo o que se atopaba no seu camiño. Pero el non sospeitaba que nin os seus soldados nin as súas botas opinaban igual que el así que cando gritou "Ao ataqueeee" os soldados marcharon correndo e  as botas colleron o camiño contrario fuxindo da guerra e levando ao xeneral lonxe da destrucción.

  

    Tamén escoitamos un pequeno resumo da vida de Malala Yousafzai, unha rapaza paquistaní moi valente que loitou polo dereito á educación das nenas en todo o mundo chegando a recibir o Premio Nobel da Paz.

  

     Para rematar Teresa narrou A paz perfecta, un conto no que un rei e unha raíña decidiron ofrecer un premio ao artista que puidese debuxar a paz perfecta. De entre todos os debuxos que había, eles escolleron unha pintura na que se vían montañas escabrosas e unha gran tormenta. 

 

    Esta escolla foi algo que sorprendeu a todos pero eles fixáranse en que naquela pintura había un arbusto cun niño no que estaba tranquilamente un paxariño porque paz non significa estar nun lugar sen ruídos, sen problemas, sen traballo duro ou sen dolor. Paz significa que a pesar de estar no medio de todas esas cousas, poidamos manter a calma no noso corazón. Ese é o verdadeiro significado da paz!"

 

 MOITAS  GRAZAS  Á  ANPA  POR  ESTA  ACTIVIDADE  E  A  TERESA  E  A MERCEDES  POLAS  SÚAS  HISTORIAS!

 GALERÍA  DE  IMAXES

 

OS BOLECHAS NO COLEXIO

   Este fin de semana celébranse en Sober as festas patronais que tiveran que aprazarse polos incendios de setembro. Dentro do programa das festas, o Concello de Sober convidou a Os Bolechas a vir ao colexio para pasar un rato divertido co noso alumnado que non parou de bailar e rir durante esta visita.

 

   Para seguir disfrutando destes personaxes, lembrade que podedes levar prestados todos os libros que temos na biblioteca sobre eles, dos que aquí deixamos unha mostra: 

MOITAS  GRAZAS  AO  CONCELLO  POR  ESTA  ACTIVIDADE!!

Podedes ver todas as imaxes dela no seguinte enlace:

GALERÍA  DE  IMAXES

 

SAMAÍN 2025

 Como cada ano cando chega esta data, no colexio e na biblioteca facemos un montón de actividades para celebrar Halloween e Samaín.

  Comezamos coa exposición de todas as creacións artísticas terroríficas que trouxeron os nosos nenos e nenas das súas casas.

      Tamén colocamos no corredor principal unha selección de lecturas de medo para todas as idades coa intención de fomentar a lectura entre todo o alumnado.

   Ademais volvemos a convocar o certame de creación literaria no que lle demos ao alumnado o principio dun libro para que reinvente a historia; este ano os libros escollidos foron Os catro gatos de Archibaldo de Gaëlle Duhazé e O caderno de Roque de Carlos Taboada.

 

 

     Nas seguintes imaxes podedes ver aos participantes no certame e aos gañadores que nos leron os seus relatos na biblioteca. 

 

 

 

  Podedes escoitar os relatos gañadores nos seguintes enlaces:

 

EREA VÁZQUEZ RODRÍGUEZ

 

ESTRELA  CAMPOS  VÁZQUEZ

 

 TEO  CASTRO  LÓPEZ

 

LAURA TRIGO FERNÁNDEZ 

 

LEONOR  MOLINA  RIVAS

 

NOA CARNERO PÉREZ 

 

  Como remate final da xornada, celebramos unha festa no patio do colexio na que o pasamos xenial!

 SAÚDOS  TERRORÍFICOS!!

 

GALERÍA  DE  IMAXES