AS FAMILIAS CONTAN: Familia de Estrela e Noé

    Hoxe recibimos no colexio a Paula, a nai dos nosos compañeiros Estrela e Noé, e aínda que Paula e Estrela xa saben o que é ler na biblioteca, para Noé era a primeira vez.

   Eles decidiron compartir con nós o libro Feliz Feroz. O lobiño riquiño de El Hematocrítico.

   Nesta historia coñecemos á irmá de Lobo Feroz que está moi preocupada porque o seu fillo non é un lobo feroz senón que é boísimo. 

   Como ela xa non sabe que facer, pídelle axuda ao seu irmán o Lobo Feroz quen lle di que llo leve uns días para a súa casa, que alí el se sencargará de ensinarlle a ser un lobo que meta moito medo. 

    Durante esta visita Lobo Feroz intenta ensinarlle a Lobiño cousas de lobos: cazar coellos, asustar a Carapuchiña, comer aos tres porquiños, atrapar aos sete cabritiños...

 

    Pero non hai maneira! Lobiño só sabe xer amable!! En vez de cazar aos coellos, failles unha ensalada; no canto de comer a Carapuchiña e á súa avoa, faise amigo delas... este Lobiño é un desastre!

  Ao final Lobo Feroz dáse por vencido e Lobiño acaba sendo un lobo riquiño e un boísimo pasteleiro que fai uns doces riquísimos para os demais dos animais do bosque.

  MOITAS  GRAZAS  POR  VIR  A CONTARNOS  ESTA  HISTORIA  E  POR  PREPARAR  ESTES  DEBUXOS  TAN  CHULOS!!

GALERÍA  DE  IMAXES

CLUB DE LECTURA (15 / 2023 - 204)

   Esta foi a última sesión dedicada a Luísa Villalta e ao libro Tinta do mar. Pequena biografía de Luísa Villalta escrito Polo Correo do Vento da colección Mulleres Galegas.

   Durante a mesma estivemos falando de moitos datos da biografía que aos membros do club lle chamaron a atención: 

   - Por que se chamaba Gurugú á zona onde vivía Luísa Villalta? Pois resulta que era unha zona pobre e recibiu este nome do Monte Gurugú que é un monte do Norte de Marrocos que está xusto antes do valado de Melilla, un lugar onde a xente malvive mentres espera para poder saltar o valado e chegar a España.

   - Que era a plataforma Nunca Máis? Unha plataforma cidadá para reclamar responsabilidades medioambientais, xudiciais e políticas polo derramamento de petróleo do Prestige.

 

   - Cales poderían ser as razóns polas que hai tan poucas mulleres homenaxeadas no Día das Letras Galegas?

   Para rematar fixemos a visualización deste vídeo publicado na páxina Galicia Aberta, especial Letras Galegas, na que os propios autores do libro fan un contacontos sobre el.

AS FAMILIAS CONTAN: Familia de Manuel V.

     Para rematar as actividades sobre Luísa Villalta, autora homenaxeada este ano polo Día das Letras Galegas, Noelia e Manuel viñeron a lernos o libro Sempre infinita. Luísa Villalta escrito por Eva Mejuto e ilustrado por Bea Gregores.

  

   Con este libro ampliamos coñecementos sobre a súa biografía intercalando datos da súa vida con fragmentos da súa obra.

    Escoitándooss soubemos da súa loita contra a desigualdade da muller, contras as inxustizas e a guerra; e á vez da súa loita pola defensa de Galiza e do galego.

    E tamén escoitamos na voz de Manuel fragmentos de obras como O oco da palabra, Alma de Beiramar, Concerto para un home só, Ruído... rematando con este anaco de En concreto:

Esa son eu

rubindo unha e outra vez as escadas

dun mundo posíbel

separado sempre pola idade, a teima

e a vontade íntima de voar

MOITAS  GRAZAS  AOS  DOUS  POR  ESTA  LECTURA  E  POR  DEIXARNOS  O  LIBRO  COMO  AGASALLO!

SEMPRE  É  UN  PRACER  ESCOITARVOS!!

 

GALERÍA  DE  IMAXES

 

DÍA INTERNACIONAL DOS MUSEOS

    Desde 1977, o 18 de maio conmemórase o Día Internacional dos Museos (DIM) para concienciar sobre o feito de que os museos son un importante medio para o intercambio cultural, o enriquecemento das culturas e o desenvolvemento da comprensión mutua, da colaboración e da paz entre os pobos. 

    Nós quixemos converter o colexio nun gran museo e para iso convertemos os corredores principais en galerías con afamadas obras pictóricas que os alumnos e alumnas de primaria reproduciron. Ademais o propio alumnado foi o encargado de realizar unha visita guiada polas súas obras.

 

  Comezamos a visita a galería "A arte das emocións" de Infantil A, estas crianzas pequeniñas crearon a súa galería de arte dentro dun proxecto sobre emocións no que traballaron "O grito" de Munch para o medo, "Noite estrelada" de Van Gogh para a tristeza e "Estudio da cor. Cadrados con círculos concéntricos" de Kandinsky para a ledicia.

  Ademais explicáronos moitísimas cousas e curiosidades sobre estas obras.

   Na exposición correspondente á aula de Infantil B, achegámonos ao puntillismo, que é unha técnica artística que consiste en facer unha obra mediante pequenos puntos, como ben nos explicaron os alumnos desta aula.

    Subimos as escaleiras e atopámonos coa exposición de 1º e 2º de Primaria dedicada a Kandinsky que foi un pintor ruso considerado como un dos fundadores do abstracto. Estes alumos presentáronnos dúas obras "Several circles" e "Árbore da vida"

   Continuando o percorrido chegamos ao espazo de 3º e 4º de Primaria. Eles reproduciron varias cadros do pintor catalán J. Miró, un pintor ao que lle gustaba pintar animais; sobre todo os ollos dos animais por iso hai tantos nas súas obras. 

    Primeiro observamos "O xardín"

 

  E despois "Muller con bonito sombreiro e estrela" e "Amencer"

   Para rematar, achegámonos ao recuncho de 5º e 6º de Primaria que estiveron reproducindo arte aborixe australiano e cadros de orixe xaponés.

 Así, despois de aprender moitísimas cousas sobre a pintura e os museos,  finalizou a nosa visita ao Museo do CEIP Plurilingüe Virxe do Carme!!

Feliz Día dos Museos!!

  

LA JOYA INTERIOR

  Cremos que nesta sociedade na que vivimos, cada vez é máis importante traballar a autoestima dos rapaces e das rapazas. Con esta finalidade estivemos traballando co libro La joya interior de Anna Llenas.

    Este libro fala de cada un de nós centrándose no eu, aínda que tamén explica a importancia dos demais á hora de descubrir a nosa xoia interior, de valorarnos e sentirnos queridos porque é moi importante querernos tal como somos.

   Con esta finalidade deberiamos ser conscientes das nosas emocións, ser capaces de falar delas, darlles a importancia que teñen; e tamén ser conscientes das nosas capacidades e dos aspectos que poderiamos mellorar.

  A idea principal é que de pequenos todos nacemos cunha xoia interior que é a nosa esencia pero que é necesario coidala e protexela para non perdela polo camiño cara a idade adulta nin por nós mesmos nin polo que nos poidan dicir aqueles que nos rodean.

  Para que o alumnado de 6º de Primaria non perda a súa esencia, quixemos facer as nosas propias xoias con arxila e decoralas para que nos lembren a nosa xoia interior.