PREMIO VOLUNTARIO DE LECTURA - A - Curso 2025/2026

ESTAMOS  DE  NORABOA!

    Acabamos de saber que un ano máis, o traballo dos nosos biblioaxudantes recibiu un importante recoñecemento xa que o noso centro foi un dos 10 centros seleccionados de Galicia entre os centros participantes no programa Bibliotecas Escolares Solidarias, na modalidade Voluntariado de Lectura - A, e recibirá un obradoiro como premio ao labor desenvolvido ao longo do curso.

    Este recoñecemento pon en valor o compromiso e a responsabilidade do alumnado que colabora coa biblioteca escolar, dedicando parte do seu tempo a tarefas de organización, apoio aos compañeiros e compañeiras e dinamización das actividades lectoras. Grazas á súa implicación, a biblioteca convértese cada día nun espazo máis acolledor, participativo e solidario.

   Ademais das aprendizaxes relacionadas coa lectura, este programa contribúe a desenvolver valores como a responsabilidade, a cooperación, a empatía e a axuda aos demais.

   Parabéns aos nosos biblioaxudantes por este merecido premio e moitas grazas por todo o que achegades á nosa biblioteca!

 

DESPEDIDA BIBLIOTECA 2025/2026

     Rematamos un novo curso na biblioteca e queremos facer un recoñecemento moi especial aos nosos Biblioaxudantes que ao longo do ano participaron no programa Voluntariado de Lectura - A, integrado en Bibliotecas Escolares Solidarias.

   Durante os tempos de lecer, este grupo de alumnos e alumnas colaboraron de maneira desinteresada en numerosas tarefas da biblioteca: atención do servizo de préstamo, organización dos fondos, apoio aos compañeiros e compañeiras, actividades de lectura e moitas outras iniciativas.

    Como agradecemento pola súa implicación e compromiso, fixemos entrega dun pequeno agasallo de Lectuvín e dos diplomas correspondentes asinados pola Directora Xeral de Xuventude e a Directora Xeral de Ordenación e Innovación Educativa

      Ademais tamén quixemos facerlle un recoñecemento ás mestras e á coidadora que este ano tiveron o seu destino no noso colexio e que tamén formaron parte da familia da nosa biblioteca. 

Moitas grazas a vós e aos biblioaxudantes por compartir o voso tempo, a vosa responsabilidade e a vosa ilusión coa nosa biblioteca!!

AMPADRIÑAMENTOS E APADRIÑAMENTOS LECTORES POLO DÍA DO LIBRO

   Cada ano polo Día do Libro realizamos unha actividade que lle gusta moito ao noso alumnado: os apadriñamentos e amadriñamentos lectores. Como este curso o Día do Libro coincidiu case ao voltar das vacacións, trasladámola un par de días para que os biblioaxudantes puideran preparar as lecturas escollidas.

    O alumnado biblioaxudante organizouse en cinco grupos que se repartiron polo colexio con candanseu libro para lerlles ao resto do alumnado que, tamén dividido en 5 grupos, foi percorrendo a senda dos libros:

  Na biblioteca Valeria, Saúl e Xiana contaban o libro Paco y el rock escrito por Magali Le Huche con animación musical incluída.

    No corredor principal Laura e Manuel V. esperaban co libro O xardín de Irene de Xosé Neira Vilas para recitar varios dos poemas do libro pero tamén algúns escritos por eles mesmos.

  

   Continuamos no Salón de Actos con Carla M. e Noa e o libro O libro grande dos números pequenos  escrito por Berta Dávila; unha lectura acompañada dun xogo que elas tiñan preparado.

  

  No patio do colexio Leonor, Xoán e Carla R. tiñan preparada a lectura do libro Violeta ás agachadas  de Ramón D. Veiga, tamén con algunha sorpresiña.

  

    Rematamos o percorrido no patio do colexio onde Ainhoa, Silvia e Manuel L. tiñan preparado un teatrillo para compartir o libro Astropal. Un comenta con corazón escrito por Julio José Fernández.

Podedes ver todas as imaxes desta conmemoración na 

GALERÍA  DE  IMAXES

MOITAS  GRAZAS  AOS  BIBLIOAXUDANTES  POR  ESTAS  LECTURAS!!

FELIZ  DÍA  DO  LIBRO!!

(En breve estarán dispoñibles os podcast de Radiuvín! 

Estade atentos!) 

 

QUE QUERES SER DE MAIOR, PEQUENA? As nosas ex-alumnas contan

    O martes de Pascua é festivo local en Monforte que é a cidade á que os nosos alumnos teñen que ir ao instituto. Como as nosas ex-alumnas ex-biblioaxudantes Ada, Daniela, Nayara, Lara, Candela e Antía non tiñan clase, quixeron vir a compartir con nós o libro  Que queres ser de maior, pequena? de Sabela Fernández Trelles.

     Así coñecemos á protagonista deste libro, Antía, á que non  lle gusta nada que sempre lle pregunten que quere ser de maior; e, aínda menos, que os seus pais contesten: «Serás unha gran doutora, como a túa nai; ou unha gran panadeira, seguindo a tradición familiar!». 

    Ela ten moi claro á que lle gustaría dedicarse xa que hai seis oficios nos que pensa que sería moi boa. A primeira opción é ser coidadora de vacas voadoras que non é que non existan, senón que ninguén as coñece porque son tan áxiles que ata poden surfear na praia de A Coruña.

    A seguinte opción é coleccionista de bicos que, aínda que o pareza, non é nada sinxelo coleccionar bicos e gardalos no corazón: BEIXICLÍN!

     Tampouco estaría nada mal ser escultora de nubes e ir cambiando a súa forma, lectora de desexos para coñecer as ansias de cada un ou domadora de unicornios que non son tan doces como parecen.

     E nun lugar como a biblioteca, a quen non lle gustaría ser gardiá de historias? Das escritas ou das que conta a xente maior, de aventuras, de mariñeiros ou doutras que aínda están por contar.

   E xa non vos contamos máis... se queredes saber que vai ser Antía de maior e coñecer o resto desta historia, podedes facelo no seguinte podcast que nos deixaron en Radiuvín.

  

MOITAS  GRAZAS  POR  VIR  A  COMPARTIR  ESTA  LECTURA, DEDICÁNDONOS  O  VOSO  ÚLTIMO  DÍA  DE  VACACIÓNS!!

OXALÁ  QUE  DE  MAIORES  POIDADES  SER  O  QUE  QUEIRADES  SER!!

 GALERÍA  DE  IMAXES

 

DÍA DA MULLER 2026: JANE GOODALL

     O 8 de marzo foi o Día Internacional da Muller. Como este ano estamos realizando o proxecto "Misión animal: vida, hábitats e segredos", quixemos escoller a Jane Goodall, unha científica que revolucionou a forma na que entendemos os animais e a nosa relación coa natureza e que, con moito esforzo e paixón, conseguiu cumprir o seu soño. Por iso, neste día lembrámola como un exemplo de curiosidade, respecto polos animais e valentía para seguir os soños.

https://alastensas.com/wp-content/uploads/2025/11/jane-goodall.jpg

  Para coñecer a súa biografía e as cousas que descubriu, algúns biblioaxudantes prepararon un conto basándose no libro Jane Goodall. La mejor amiga de los chimpancés y de la naturaleza da Editorial Shackleton kids e contáronllo ao resto do alumnado.

   Tamén o gravaron en Radiuvín para que todas as persoas que queirades escoitar este podcast, poidades coñecela mellor.

  

   Despois fixemos unha reflexión conxunta sobre os seus logros e os seus descubrimentos e a continuación, por equipos interniveis, convertéronse en pequenos primatólogos que tiñan que observar diferentes imaxes incluídas nunhas fichas con algunhas preguntas para pensar.

   Cando todos os equipos remataron as súas fichas, expuxeron as súas reflexións para que o resto do alumnado puidera aprender o que eles observaran.

   Rematamos con dúas actividades creativas: as crianzas de educación infantil colorearon a Jane Goodall interactuando cun chimpancé e o alumnado de primaria que quixo debuxouse a si mesmo como pequenos exploradores e exploradoras observando diferentes animais.

 

 

      

     Como resumo, podemos dicir que hoxe coñecemos a historia de Jane Goodall, unha nena que soñaba coa selva cando moita xente pensaba que non era posible.

     E aínda que houbo quen dicía que era difícil, a súa nai díxolle: "Se traballas duro e cres en ti, poderás facelo.” Así foi como decidiu ser científica nun tempo no que case todos os científicos eran homes.

CADA  NENA  PODE  SOÑAR EN  GRANDE,

CADA  NENO  PODE  APOIAR  E  RESPECTAR, 

TODAS  AS  PERSOAS  PODEN  MARCAR  A  DIFERENZA.

HOXE  LEMBRAMOS  A UNHA  MULLER  QUE  ABRIU  CAMIÑO  E  COMPROMETÉMONOS  A  INTENTAR  CONSTRUÍR  UN  MUNDO  MÁIS  XUSTO  E  IGUALITARIO.