AS FAMILIAS CONTAN: Familia de Alassane

   Hoxe na actividade As familias contan temos a unha familia que ven a contar por primeira vez: a familia de Alassanne.

   Alassanne e a súa nai Natalia leron o conto Te quiero (casi siempre) de Anna Llenas e trouxeron un montón de actividades preparadas.

     Antes de ler, Natalia fixo unha actividade introductoria para que o alumnado coñecese aos protagonistas, Lolo e Rita, e comprendera de forma física que se lle facemos dano a alguén, podemos pedir perdón pero nunca poderemos borrar de todo o dano que lle fixemos.

      Despois comezou a lectura e con ela coñecemos mellor a Lolo e Rita que son dous bichos moi diferentes. 

    Lolo é un bicho bóla e Rita é un vagalume e aínda así son moi amigos; pero ás veces as súas diferenzas fan que a amizade non sexa doada: Lolo é o rei da camuflaxe e Rita brila como ninguén e voa moi alto.

    Todo ía ben ata que un día a Rita empeza a cansarse da coraza de Lolo que se converte en bóla para refuxiarse e a Lolo empeza a parecerlle que Rita brila demasiado e que voa tamén demasiado alto....

       Así é como comezan a distanciarse, ata que un día Lolo intenta abrandar a súa armadura e Rita intenta voar un pouquiño máis baixo...

      Pouco a pouco irán decatándose de que as diferenzas non son imposibles de salvar e de que o feito de adaptarse aos demais respectando o que os fai diferentes, fará que atopen un punto de encontro. 

 

   Despois, ao rematar a lectura, estivemos facendo as actividades propostas por Natalia para coñecer  mellor aos nosos compañeiros e un mural coas receitas de felicidade que elaboraron.

   Para rematar, subiron aos estudios de radio para gravar o conto e que todos poidades escoitalo.

MOITAS  GRAZAS  AOS  DOUS  POR  VIR  A CONTARNOS  ESTA  HISTORIA SOBRE  A  AMIZADE  E  O  RESPECTO!!

GALERÍA  DE  IMAXES

XORNADA DE CLUBS DE LECTURA

     O día 5 de xuño celebráronse en Santiago as XV Xornadas de clubs de lectura nas que se lle entrogu o premio Clubs de lectura ao autor galego máis lido nas bibliotecas escolares o pasado curso: Manuel Núñez Singala autor de obras como O achado do castro ou Atranco no banco.

    Despois dunha xornada moi completa de formación na que reforzamos os nosos coñecementos sobre temas como o papel dxs mediadorxs na biblioteca ou literatura e natureza: rematamos cunha intervención da poetisa de A Pobra do Brollón, Olga Novo, Premio Nacional de Poesía 2020 polo seu libro Feliz Idade quen, ademais de ensinarnos a ler o infinito, recitou algunha das súas obras poéticas.

 

VIAXANDO POLAS LETRAS (16 / 2022 - 2023)

   Aínda que xa está remantando o curso, no club de lectura non queremos deixar de ler e por iso comezamos un novo libro: Unha volta ao mundo de Joseba Sarrionandia.

     Nesta sesión comezamos lendo entre todos o primeiro capítulo do libro no que coñecemos ás dúas portagonistas: unha avoa que é mestra de Historia e a súa neta que pide que lle conte «unha historia de verdade».

       Continuamos lendo o segundio, cando a avoa empeza a falarlle de Juan Sebastián Elcano, dos comerciantes marítimos da época, dos asteleiros...

     E coa lectura xurdiunos unha dúbida sobre o formato do libro en forma de diálogo: por que é unha novela dialogada e non unha obra de teatro? Cales serían as principais diferenzas?

     Unha dúbida que queda pendente de investigación para a próxima sesión...

AS ABELLAS: PROXECTO DE INVESTIGACIÓN

    Para rematar as actividades relacionadas co mel deste ano, o alumnado fixo unha investigación para ampliar e poñer en orde os contidos obtidos que rematou cun programa especial de radio.

   Nas seguintes imaxes, podedes ver diferentes momentos do desenvolvemento da secuencia de aprendizaxe: busca de información en rede, tratamento da información, redacción do guión radiofónico e gravación do programa de radio.

 

 

AS CORES DO MUNDO

    O grupo de teatro do cole representou en primicia a obra "As cores do mundo" que é unha adaptación do libro do mesmo título feita pola súa mestra de teatro Paqui Abeledo.

   Con Xoán, Aldán, Teo, Erea, Leonor, Ada, Candela, Carlota e Darío coñecemos mellor todas as cores do mundo e a importancia de cada unha delas.

Foi unha obra moi entretida e divertida que mantivo a todo o público moi atento ata o final!

   Para rematar os protagonistas e a súa mestra de teatro, responderon ás preguntas que os espectadores e espectadoras lles fixeron sobre a montaxe da obra, a dificultade, o vestiario...

PARABÉNS  POR  ESTA  ACTUACIÓN!!

SODES  UNS  ARTISTAS!!

EDUCACIÓN AFECTIVO - SEXUAL NA INFANCIA

    Esta actividade forma parte dun programa de Educación e Saúde na escola e na familia organizado polo Colexio de Enfermería de Lugo e a Federación de Asociacións de Nais e Pais de Lugo (FACAPEL) para axudar aos nenos e nenas a valorar igual ambos sexos mostrando as diferenzas entre cada un desde a primeira infancia pero de xeito igualitario.

   As matronas que nos acompañaron centraron a súa intervención na aceptación, recoñecemento e valoración tanto do propio sexo como do outro, proceso esencial para un desenvolvemento libre de discriminación e desigualdade xa que ningún sexo vale máis co outro.

  Tamén nos falaron sobre a nosa orixe desmitificando o procesos de fecundación, embarazo e parto para tratar de normalizalos.

   Outra actividade relacionada co embarazo foi a auscultación do latido cardíaco mediante o estetoscopio de Pinard.

    

    Os máis maiores afondaron na aceptación do propio corpo e dos cambios que van a ir experimentando para evitar complexos e connotacións negativas: cambios físicos (a altura, os xenitais, crecemento de pelo, a voz, o olor corporal, a menstruación...) e cambios emocionais (dificultade para controlar as emocións, os cambios de humor, a apreciación de que ninguén nos entende...)

    Para rematar queremos compartir un lema que nos debe quedar claro:

"ANTES DE QUERER AOS DEMAIS

HAI QUE  QUERERSE  A  UN  MESMO.

AUTOESTIMA É COÑECERSE, ACEPTARSE,

QUERERSE, COIDARSE E VALORARSE

PARA  MOSTRARNOS  COMO  SOMOS"

  

 GALERÍA  DE  IMAXES

HIXIENE E SAÚDE BUCODENTAL

    Hoxe tivemos visita na biblioteca; con nós estiveron Iván Sánchez, exalumno do colexio, Sergio Rodríguez e Lucía Vázquez. Os tres traballan na Clínica Dental Escairón e viñeron a falarnos sobre saúde e hixiene bucodental, xa que como sabedes, a saúde é un dos obxectivos da Axenda 2030 que queremos reforzar.

 

 

       

    Nesta actividade os alumnos e alumnas do cole coñeceron da man destes profesionais a importancia dun bo cepillado dental e os pasos para que o cepillado sexa correcto. 

 

 

 

    Tamén nos falaron sobre a importancia dunha alimentación adecuada e dos alimentos que nos poden axudar a manter san a nosa dentadura: froitas, verduras, leite, queixo... porque a saúde da dentadura repercute no resto do corpo.

   Para rematar, practicamos o cepillado cunha dentadura e cubrimos unhas fichas nas que se recollían as ideas principais desta charla:

• Cepillar os dentes 3 veces ao día.

• Que o cepillado dure 2 minutos

• Utilizar pouca pasta

• Visitar ao dentista

• Comer menos chuches e doces
  

 

    

   Se queredes máis información e consellos sobre hixiene e saúde bucodental podedes escoitar o podcast no que Iván, Sergio e Lucía responden ás preguntas de Carlota e Diego.

MOITAS  GRAZAS  POR  ESTA  CHARLA!

ESPERAMOS, COMO VÓS DIXESTES, QUE  O  COLE  DE  SOBER  SEXA  A  PARTIR  DE  AGORA  UN  LUGAR  LIBRE  DE  CARIES!!

 GALERÍA  DE  IMAXES