DÍA DE ROSALÍA DE CASTRO 2026

    O 23 de febreiro conmemórase o Día de Rosalía de Castro porque é o aniversario do seu nacemento.

 

    Para conmemorar esta data tan importante para a nosa lingua no colexio fixemos diferentes actividades ao longo de toda a semana. Para empezar, os biblioaxudantes de 5º de Primaria leron ao resto do alumnado do centro a biografía incorporada no material elaborado e compartido polos Equipos de Dinamización da Lingua Galega de diferentes colexios da provincia de A Coruña.

   Despois o alumnado de primaria participou nun certame de investigación no que tiñan que procurar datos sobre a biografía e as obras de Rosalía de Castro e cubrir unhas fichas incluídas na proposta inicial.

  

   Tamén o alumnado de infantil participou nesta colaboración coloreando un retrato da autora que, xunto aos pintados polo alumnado de primaria nas clases de plástica, decoran o corredor do colexio.

  

    Para rematar a semana, entregamos uns agasallos aos nenos e as nenas que participaron no certame de investigación e que demostraron ser uns expertos en Rosalía de Castro.

   Se vós tamén queredes aprender moitas cousas sobre Rosalía de Castro e escoitar algúns fragmentos dos seus poemas, podedes facelo no seguinte podcast elaborado polos biblioaxudantes.

 

 

CLUB DE LECTURA (7 - 2025/2026)

    Nesta sesión comezamos a comentar o libro A historia de Brava Panadeira, escrito por Alicia Borrás (Ed. Xerais).

    Nesta primeira sesión de comentario da lectura, o libro deunos moitos temas interesantes para debater.

   Comezamos falando sobre a educación de Brava: como hai que educar a un can? Como se lle ensina a facer as súas "cousas" só cando a sacamos da casa? Como lle explicamos que non pode beber da auga do inodoro ou que non pode rañar as portas? E como se lle ensina a camiñar a modo coa correa para que non haxa accidentes como o que lle pasou a Lina, a nai dos nosos protagonistas?

   Despois quixemos centrarnos en Xullo (o neno protagonista que, segundo di a autora, ten Asperger), para entender mellor a súa forma de ser; para iso fixámonos no que di a súa irmán: que sabe o que ninguén da casa sabe (volcáns, ríos, multiplicar...), que ten que manter rutinas, que o tempo e moi importante para el e que utiliza 7 minutos exactos para vestirse e tres para almorzar, que ás veces está en modo avión, que é capaz de contar as boliñas de penso que hai no comedeiro de Brava... 

   E tamén falamos sobre a situación dos pais dos protagonistas que parece que están separados dándose un tempo mentres el está no estranxeiro e de como se senten os nenos coa separación.

   Podemos dicir que está primeira parte do libro nos deu moito en que pensar... 

 

DESFILE DE ENTROIDO: PROXECTO ANIMAIS

  Este ano o desfile de Entroido do colexio tivo como tema principal o proxecto "Misión animal: vida, hábitats e segredos" que estamos desenvolvendo nesta segunda avaliación. Por iso, o alumnado das diferentes clases se disfrazou de diferentes animais.

   Pero o tempo non nos acompañou e non puidemos desfilar polas rúas de Sober ata o Concello polo que tivemos que dar a volta na rúa do colexio e despois continuar no pavillón.

 Aínda así, o mal tempo non estropeou a diversión e no pavillón pasámolo moi ben bailando e xogando. Tamén o alcalde repartiu chuches para todos os nenos e as nenas do colexio e do PAI.

 

  Pola tarde foi o momento do disfrace libre no que cada quen puido disfrazarse do que quixo.

 Podedes ver todas as imaxes deste día no seguinte enlace

 

GALERÍA  DE  IMAXES 

COMANDAS DO MECO: XOVES 2026

 

DÍA DA NENA E A MULLER NA CIENCIA: EVA CABANELAS DOPAZO

   O día 11 de febreiro conmemórase o Día Internacional da Nena e a Muller na Ciencia. A  Asamblea Xeral das Nacións Unidas instaurou esta efeméride coa intención de visibilizar "o labor das científicas, promover a realización de actividades e fomentar vocacións científicas que axuden a pechar a brecha de xénero na ciencia".

Imaxe: Asesoría Bibliotecas Escolares

   Por esta razón e porque no colexio estamos desenvolvendo o proxecto de animais "Misión animal: vida, hábitats e segredos", convidamos á biblioteca a Eva Cabanelas Dopazo, profesora de FP de Sanidade no IES Daviña Rey de Monforte que ademais é Licenciada en Veterinaria e Doutora en Sanidade Animal pola Universidade de Santiago de Compostela.

   Na charla divulgativa que tivo cos máis pequenos e pequenas: "Curiosidades de los animales domésticos" contoulles moitas cousas sobre estes animais e sobre a responsabilidade que implica ter unha mascota na casa.

    Tamén lles explicou  aspectos que hai que ter en conta para a elección da mascota (raza, sexo, carácter...) e lles deu consellos moi interesantes sobre o seu coidado (educación, alimentación, hixiene, coidados veterinarios...).

     Ademais respondeu a todas as preguntas que lle fixeron os cativos, que non foron poucas!

   Na segunda charla (enfocada aos máis maiores) o tema foi totalmente diferente: "Ectoparásitos del ser humano". Nesta ocasión os protagonistas non foron as adorables mascotas senón pulgas, carrachos, piollos e ácaros.

  Descubrimos como poden chegar ao noso corpo,  como identificalos, que consecuencias teñen para nós, que enfermidades poden  transmitir, que é a enfermidade de Lyme e por que parece que hai tantos carrachos na nosa provincia, cal é a perigosidade de cada parasito...  En fin... un montón de aprendizaxe!!

 

         E para rematar a charla, puidemos ver unha mostra destes bichiños na pantalla amplificados cunha lupa e outros conservados en formol.

 

.   Claro que os máis riquiños eran os peluchiños que non parecen nada perigosos e ata dá gañas de achuchalos!

 

     Finalizamos a actividade coa entrevista que Carla Martínez, Silvia e Xiana lle fixeron a Eva en Radiuvín e que podedes escoitar no seguinte podcast.

 

MOITAS  GRAZAS  POR  VIR  A  PASAR  ESTE  DÍA  CON  NÓS, ESPERAMOS  QUE  VOLVAS  A CONTARNOS  MOITAS  MÁIS  COUSAS  SOBRE  O  MUNDO   ANIMAL  E  QUE  A  TÚA  EXPERIENCIA  ANIME  ÁS  NOSAS  NENAS  A  ESTUDAR  A  CARREIRA  QUE  QUEIRAN!!

 

 

GALERÍA  DE  IMAXES