AS FAMILIAS CONTAN: Familia de Lucía

     Hoxe tivemos unha nova familia acompañándonos na actividade As familias contan, a familia da nosa compañeira Lucía de Educación Infantil. Ela e a súa nai Sandra, decidiron ler o libro A rebelión da lectura de Fran Alonso.

 

    Con esta historia trasladámonos a un lugar onde a xente era bastante pobre porque os cobradores do sol da empresa Universo 2.0 ían todos os meses a cobrarlles un recibo moi caro como pago por recibir a luz do sol durante o día.

    Os veciños estaban tan desesperados por esta situación que un día reuníronse para buscar unha solución. Nesa reunión decidiron construír unha casa para poder pecharse e non abrirlles aos cobradores do sol cando viñeran a buscar os cartos.

   Un grupo construíu unha casa de madeira pero o cobrador do sol soprou e soprou ata que a casa derrubou. Outro grupo fixo a casa de pedra pero o cobrador do sol tamén puido derrubala.

   Houbo un tercer grupo que decidiu facer a casa de libros e chamarlle A casa da lectura. Mentres estaban esperando que chegara o cobrador do sol estiveron lendo os libros e de tanto ler, aprenderon moitas cousas como por exemplo que a luz do sol non era de ninguén e que non había que pagar por ela.

 Pero... se a luz do sol non tiña dono e non había que pagar por ela... que pasaría cando chegaran os cobradores do sol e a xente non lles quixera pagar?

 Se queredes saber como remata o conto, podedes escoitar o podcast que Sandra e Lucía gravaron en Lectuvín porque o final desta historia é moi intersante.

 

   MOITAS  GRAZAS  ÁS  DÚAS  POR  COMPARTIR  CON  NÓS  ESTE  LIBRO  CO  QUE  APRENDEMOS  QUE  A  LECTURA  PODE  CAMBIAR  A  MANEIRA  DE  VER  O  MUNDO  QUE  NOS  RODEA  E  AXUDARNOS  A  LOITAR  CONTRA  AS  INXUSTIZAS!! 

GALERÍA  DE  IMAXES

 

OBRADOIRO AMBIENTACIÓN MUSICAL E SONORA PARA RADIO E PODCAST

           Desde hai oito cursos  participamos no Proxecto Radio na Biblio destinado a centros que forman parte do PLAMBE (Plan de Mellora de Bibliotecas Escolares) e grazas a este proxecto contamos cun orzamento específico para facer obradoiros de formación para o noso alumnado.

 

    Este ano foi Pedro Iglesias o que veu a impartir o obradoiro AMBIENTACIÓN  MUSICAL  E  SONORA  PARA  A  RADIO  E  PODCAST, un obradoiro no que o alumnado de 5º e 6º de Primaria coñeceu o valor dos diferentes recursos sonoros que se poden utilizar nun programa de radio: música, efectos sonoros, silencio...

       O obradoiro dividiuse en dúas sesións. Na primeira o alumnado aprendeu conceptos moi diversos: 

- A voz e a diferenza entre darlle máis valor a voz (vococentrismo) ou darllo á palabra (verbocentrismo)

- O valor estrutural da música: sinfonía (para comezar e rematar un programa), ráfaga (variación da sintonía que serve para separar seccións), cortina ("tapadeira do que está pasando") ou golpe (para separar por exemplo, titulares).

- A música como contido: cando o programa radiofónico é sobre música (escoitar, analizar, entrevistas con artistas...). Dependendo do tipo de música temos diversas emisoras ou programas: Radio Clásica, Los 40, Kiss fm...

- A música como elemento narrativo: para describir ambientes ou trasladarnos a outros lugares e épocas ou para transmitir diferentes emocións ou sensacións como comprobamos escoitando a mesma escena con diferentes músicas de fondo.

- A diferenza entre son e ruído: podemos dicir que un ruído é un son que non queremos escoitar pero que se pode utilizar como efecto de son para axudar a describir un lugar (música de fondo nunha cafetería), para darlle valor expresivo (exemplo: son de campás), axudar a narración (exemplo: pasos, abrir unha porta...) ou adornar.

- A importancia do silencio como recurso expresivo para indicar calma, tensión, frases inacabadas...

     Ao finalizar esta sesión, Pedro púxolles unha tarefa para o próximo día: recrear diferentes ambientes sonoros por grupos (un zoo, un estadio, unha piscina, un hospital e unha cafetería) determinando que sons se escoitan en cada ambiente, buscando os sons ou efectos en internet e creando un arquivo sonoro en Audacity.

 

 

  

     Na segunda sesión puxemos en común os arquivos sonoros realizados polo alumnado realizando unha valoración crítica sobre os sons utilizados e posibles melloras para as seguintes creacións.

      Despois Pedro fixo un exemplo práctico creando desde cero o ambiente sonoro dunha peluquería: secador, xente falando, música de fondo...

      Para rematar intentaron identificar que era o que estaba pasando nun audio intentando identificar cada son ou efecto sonoro que escoitaban: pasos, unha porta, un reloxo... e ao final puideron ver a imaxe correspondente a ese arquivo sonoro que correspondía á película muda Nosferatu.

   Esperamos que esta formación tan interesante repercuta positivamente nos podcast do noso alumnado así que a partir de agora, estade atentos ás emisións de Lectuvín. Seguro que non vos defraudan!  

GALERÍA  DE  IMAXES

 

CLUB DE LECTURA (5 - 2025/2026)

    Hoxe tivemos unha nova sesión do club de lectura, a última dedicada ao libro Fábulas de Esopo, a antoloxía realizada por Jerry Pinkney.

      A parte de lectura esta sesión viña con sorpresa xa que o noso compañeiro Gabriel que estivo en Brasil, tróuxonos de alí unhas palomitas típicas brasileñas moi diferente ás nosas pero que gustaron moito porque non quedou ningunha. Moitas grazas, Gabriel por lembrarte dos teu compañeiros!

    En canto a lectura en si, podemos dicir que aos membros do club a última parte do libro non lles defraudou senón que as fábulas finais lles gustaron tanto como as anteriores e lles resultaron moi interesantes.

    Despois compartimos as actividades que realizaron voluntariamente entre as propostas no libro: escoitamos unha nova letra para a canción da cigarra composta por Manuel López, ampliamos información sobre a historia do Rei Midas con Saúl, buscamos solucións para abrir unha botella de viño pechada sen ter sacarrollas e realizamos a tarefa de investigación proposta a partir da última fábula: "O leñador e a náiade" que consistía en averiguar as diferenzas entre náiade e serea. Para responder a esta pregunta fixemos unha táboa de comparación que podedes ver a continuación:

 

     Para concluír esta lectura podemos dicir que todas as historias, mesmo as máis curtas nos ensinaron algo. A través de animais que falan e actúan como persoas e das persoas que interveñen, analizamos situacións e sentimentos que nos rodean cada día: envexa, amizade, orgullo, mentira, xenerosidade, esforzo...

     Tamén aprendemos que as decisións teñen consecuencias, e que moitas veces os problemas aparecen cando non escoitamos, cando queremos ser máis que os demais ou cando non pensamos antes de actuar. Ao mesmo tempo, as fábulas lémbrannos o valor da honestidade, a humildade e a cooperación.

    Esperamos que ler este libro nos axude a coñecernos mellor e a entender como convivir cos demais: se aprendemos das historias, poderemos tomar mellores decisións na vida real.

 

 

PLAN DIRECTOR - Curso 2025/26

     Dentro do PLAN  DIRECTOR  PARA  A  CONVIVENCIA  E  A MELLORA  DE  SEGURIDADE  NOS  CENTROS  EDUCATIVOS  E  NOS  SEUS  CONTORNOS, contamos na biblioteca coa presenza de Ramón Peña Pérez, membro da Garda Civil experto en riscos de seguridade asociados ás novas tecnoloxías e ao uso de redes sociais que veu a darlle unha charla ao alumnado de 5º e 6º de Primaria.

      Nesta charla Ramón comezou falándonos sobre as confusións que se poden xerar entre as persoas nas aplicacións de comunicación xa que ao utilizar estas aplicacións non temos á persoa coa que falamos diante; por iso:

   Ademais abordáronse temas importantes para o alumnado xa que, queiramos ou non, internet e plataformas como wassapp, youtube, tiktok... polo que é importnte que coñezan conceptos como cyberbulling, grooming, roubo de datos persoais, estafas, xogos en rede e a importancia de manter unha boa seguridade nas nosas redes.

     Outros dous aspectos nos que Ramón fixo fincapé foi en evitar dar datos persoais nos nosos perfís públicos (ano de nacemento, gustos, lugar de residencia...) e non aceptar solicitudes de persoas que non coñezamos físicamente. 

 

     Tampouco fiarse das imaxes que enviamos de "ver unha vez" xa que é moi doado facerlles unha foto con outro dispositivo. Así que é moi importante pensar que queremos enviar e compartir e non compartir imaxes privadas que non nos gustaría que se difundisen por internet

 

    Para rematar queremos dar as grazas a Ramón Peña e a este plan da Garda Civil que tan necesario nos parece e lembrar que ante calquera problema que teñades, debedes FALAR CUN ADULTO sen que vos dé vergoña xa que é moi importante actuar a tempo. 

 

CLUB DE LECTURA (4 - 2025/2026)

     Hoxe dedicamos unha nova sesión ao libro Fábulas de Esopo, a antoloxía realizada por Jerry Pinkney.

   Para esta xuntanza, tiñamos que ler a parte central do libro. Delas o alumnado destacou "A cola do pavón" sobre a vaidade que nos ensinou que ás veces se presumimos moito, acabamos perdendo cousas realmente importantes; "A gansa dos ovos de ouro" sobre a importancia de non ser avariciosos; "O feixe de varas" sobre o valor de manter a familia unida ou "A raposa e o corvo" relacionada coa do pavón sobre desconfiar dos que nos adulan moito e nos fan a pelota.

   Houbo outras que lles resultaron máis graciosas como "O muiñeiro, o seu fillo e o burro"  que por facer tanto caso ao que din os demais tiveron un final que non esperaban ou "O caranguexo e a avoa" na que a avoa ten que dárlle a razón ao seu neto. Con todo, algunha que lles resultou máis complicada de entender como "Os ratos e as donicelas" que trata sobre a responsabilidade que deben ter aqueles que ostentan o poder.

   Ademais na última reunión deramos a posibilidade aos membros do grupo de realizar algunha das actividades propostas no propio libro e hoxe puidemos escoitar algunhas historias diferentes do que lle puido pasar ao rato de campo cando visitou ao rato da cidade, novas probas para que o Vento do Norte desafiase ao Sol ou un par de letras para as cancións que cantaría a cigarra no verán. Aquí deixamos mostra dunha delas a para cantar con ritmo de rap:

 Moitas grazas a todo o alumnado por esta sesión tan divertida. O próximo día, remataremos este libro!

AS FAMILIAS CONTAN: Familia de Leonor

   Comezamos as actividades do ano 2026 coa familia da nosa alumna Leonor. Cristina, a súa nai, e Miguel, o seu pai, estiveron hoxe na biblioteca do colexio para compartir con nós o libro  Vaia cabuxiño!  escrito por El Hematocrítico.

  Un conto con moito humor no que os personaxes non son o que parecen: nin o inocente Cabuxiño, é tan inocente; nin o Lobo Feroz, tan feroz. De feito, o Lobo Feroz é un cidadán respectable e responsable que coida do seu sobriño e rexenta unha xastraría. 

   Pero iso é agora, porque antes o Lobo non era así. Non era feliz. Só era feroz. Pois como se conta en todos os contos que coñecedes, os animais e os habitantes do bosque temíano porque era unha besta parda que comía todo canto se lle puxese diante: avoas, porcos, cabuxiños...

   Aínda así, un día un pequeno cabuxiño que non tiña nada de medo do lobo enfrontouse a el con moito enxeño e conseguiu dárlle a volta ao conto.

   Tan listo foi que el e os seus irmáns conseguiron todo o que quixeron sen poñerse en perigo en ningún momento: unha videoconsola, doces e zumes, unha piscina con trampolín... si, si... como o oídes... enganárono ben enganado!

    Se queredes saber como fixo o cabuxiño para enganalo por se algunha vez vós tamén vos atopades cun Lobo Feroz, podedes escoitar todo o conto no seguinte podcast que gravaron en Radiuvín.

 MOITAS GRAZAS  AOS  TRES  POR  VIR  A  CONTARNOS  ESTE  CONTO  TAN  DIVERTIDO!!

 GALERÍA  DE  IMAXES

 

CERTAME DE POSTAIS DE NADAL DA BIBLIOTECA PÚBLICA MUNICIPAL

   Mentres estabamos de vacacións de Nadal, no Concello de Sober entregáronse os Premios do Certame de Nadal da Biblioteca Pública Municipal de Sober, un certame no que sempre participamos enviando unhas fermosas postais de Nadal feitas por todo o alumnado do colexio.

     Pola nosa participación, recibimos un agasallo e un diploma que recolleu a mestra Antía xunto aos outros participantes.

  Pero antes de chegar á Biblioteca Pública, estas postais xa estiveran decorando a nosa propia biblioteca. Mirade  que bonitiña quedaba!!