DÍA DO LIBRO INFANTIL: Cando abres un libro

    O 2 de abril celébrase o Día do Libro Infantil xa que nesta data naceu o escritor danés Hans Christian Andersen autor de moitos dos libros infantís máis coñecidos.

    Para conmemorar este día escollemos o libro Cando abres un libro escrito por  Caroline Derlatka e ilustrado por Sara Ugolotti. 

    Con esta historia a autora quere transmitirnos que a aventura máis grande do mundo é ler un libro: dragóns, piratas, sereas, árbores de caramelo, un montón de animais, o universo enteiro... Acompañádenos nesta aventura!!

 

DÍA DAS ARTES GALEGAS

    A Real Academia Galega de Belas Artes, declarou o 1 de abril como "Día das Artes Galegas" para exaltar, divulgar, promocionar e sensibilizar sobre as artes da nosa comunidade.  Para conmemorar este día centrámonos na figura de Maruja Mallo xa que estivemos investigando e traballando moito sobre ela e a súa arte como podedes comprobar na exposición que temos no corredor principal do centro.

 

Nesta exposición podedes ver as versións que realizamos de varios dos seus cadros:

As crianzas de infantil recrearon "Máscaras"

O alumnado de 1º e 2º de primaria, "Naturaleza viva"

Os nenos e as nenas de 3º de Primaria, reproduciron "Canto de las espigas"

 En 4º de Primaria, traballaron a obra "Viajeros del Éter"

E para rematar, os rapaces e as rapazas de 5º e 6º de primaria, versionaron "Selvatro"

  Podedes ver un resumo do traballo realizado coa explicación e contextualización das obras no seguinte vídeo:

 

AS FAMILIAS CONTAN: Familia de Leonor

    Un ano máis recibimos na biblioteca a Cristina, nai de Leonor, para participar na actividade "As familias contan". Nesta ocasión compartiron con nós o libro "O alcume"  escrito por Gilles Baum. 

    Brais, o protagonista deste libro, está algo triste porque é o único neno do seu grupo de amigos que non ten alcume.

   A Croques chámanlle así porque sempre está levando golpes, Cacahuete ten unha cabeza pequena pero é moi listo, a Malfadada sempre lle pasan cousas... pero Brais... Brais non ten alcume e gustaríalle ter un.

    Na súa casa chámanlle rapazolo, michiño, cervato, meniño meu... máis eses non lle gustan!

   Comeza a pensar que pode facer para merecer un alcume: se masca chicle todo o día e fai moitos globos poderían chamalo Bubble Boy, se levase un pano atado na cabeza igual lle chamarían ninja, cun bigote de chocolate parecería un mexicano... e así pasa días e días... e ademais segue triste porque non se lle ocorre nada.

   Menos mal que ao final os seus amigos se decataron do que estaba pasando e propuxéronlle que o seu alcume fora "O gran xefe" porque era o que máis pensaba da cuadrilla e a el encantoulle así que... problema solucionado!!

    Se queredes escoitar esta historia, podedes facelo no seguinte podcast que Cristina e Leonor nos deixaron en Radiuvín.

   Grazas por contarnos este conto tan divertido pero lembrade que os alcumes ás veces poden facer dano; así que tede coidado con eles.

 MOITAS  GRAZAS  POLA  VOSA  PARTICIPACIÓN!!

GALERÍA  DE  IMAXES 

INAUGURACIÓN DA RÚA MARUJA MALLO

    Como sabedes por todas as actividades que levamos realizando estes días, a rúa do colexio non tiña nome; pero o Concello de Sober aprobou por unanimidade dedicarlla á pintora Maruja Mallo polas súas raíces no municipio, xa que o seu avó materno era de Sober, concretamente de Naz, na parroquia de San Martiño de Anllo. 

   Hoxe era o día da inauguración oficial e para o evento preparamos unha exposición coas obras que replicamos, a liña do tempo que reflicte a súa vida e unhas chapas como recordo fixemos unhas chapas coa ilustración de Carlos Taboada.

  Os actos comenzaron cunha na que participaron Luis Fernández Guitián (alcalde do Concello), Emilio Insua (autor do libro "Maruja Mallo: de prometedora pioneira a artista universal. Materiais para unha biografía exacta e completa da pintora viveirense entre 1902 e 1936") e Ángel Armaiz (xornalista de Monforte de Lemos).

  Durante a intervención, o alcalde explicounos o motivo polo que o Concello dediciu este nome para a rúa; Emilio Insua falounos da biografía de Maruja Mallo e da súa importancia como artista e Ángel Arnaiz fixo unha exposición sobre as súas raíces en Sober.

  Despois todos participamos no descubrimento da placa co nome Rúa Maruja Mallo.

   E antes de dar o acto por rematado, Luís, Emilio e Ángel estiveron nos estudos de Radiuvín onde Lara e Saúl lles fixeron unha entrevista  na que poderedes aprender moitas cousas sobre a protagonista deste día.

 

RESEÑAS  DE  PRENSA:

 

El Progreso, Ribeira Sacra (27/03/2025)

 

 

DÍA DO TEATRO

  O Instituto Internacional do Teatro (ITI) declarou o 27 de marzo como Día Mundial do Teatro para reforzar a importancia deste xénero literario ao que se lle dedica este ano o lema das bibliotecas escolares.

    Desde o centro quixemos sumarnos a esta conmemoración utilizando o xogo Puro teatro de Guridi baseado na técnica da improvisación. Un xogo que ten como obxectivo crear e representar unha pequena escena teatral traballando en equipo e respectando as premisas que nos dan as cartas (un lugar, un obxecto, unha frase que hai que utilizar e unha dificultade engadida)

 

   Decidímonos pola improvisación xa que é unha técnica teatral que ten moitos beneficios pois fomenta a creatividade, a busca de solucións a desafíos, a xeración de ideas, a toma de decisións...

 

    Esta actividade levaba implícita tamén unha escoita atenta e o respecto aos demais membros do grupo, sobre todo ao ser grupos interniveis coma os nosos.

   A verdad é que foi unha actividade moi divertida coa que pasamos un moi bo rato e na que os nenos e as nenas puideron mostrar os seus dotes interpretativos.

 FELIZ  DÍA  DO  TEATRO!!!

 GALERÍA  DE  IMAXES

MARUJA MALLO. POLO CORREO DO VENTO

  Ata agora a rúa do colexio non tiña nome, pero en febreiro o Concello decidiu poñerlle o nome da pintora Maruja Mallo xa que o seu avó era de Sober, concretamente de Naz.

   Por este motivo estamos investigando a súa vida e a súa obra e por iso no club de lectura lemos o libro Meiga nova, metade anxo, metade marisco. Pequena biografía de Maruja Mallo escrito por Enrique Mauricio e Carlos Taboada.

    Pareceunos tan interesante que nos puxemos en contacto cos autores e hoxe estiveron no centro Carlos Taboada e Marcelo para facer unha actividade con todo o alumnado do colexio. Na primeira parte da actividade, achegámonos aos principais datos da súa biografía e mentres Carlos facía unha ilustración da pintora e Marcelo poñíalle música.

    Na segunda parte fixemos de forma individual unha caricatura da pintora guiándonos polas directrices que nos ía dando Carlos.

   Estas caricaturas expuxéronse no Salón de Actos ao lado da ilustración de Carlos formando unha pequena homenaxe a Maruja Mallo.

   Para rematar, Carlos e Marcelo estiveron en Radiuvín onde Nayara e Ada lles fixeron unha pequena entrevista sobre o seu libro e sobre a propia Maruja Mallo.

 

 GALERÍA  DE  IMAXES

 

DÍA DA POESÍA 2025

     Desde 1999, o 21 de marzo celébrase o Día mundial da poesía coa finalidade de promover a súa ensinanza, crear unha imaxe atractiva dela e fomentar a expresión e tradición oral.

  No noso colexio foron os nenos e nenas de Ed. Infantil os encargados de recitar varios poemas sobre a chegada da primavera.

   Despois pasaron polos estudos de Radiuvín para que todos poidades disfrutar desta poesía primaveral.

 FELIZ  DÍA  DA  POESÍA!!