CIBERSEGURIDADE CON SOFÍA

   A AMTEGA (Axencia para a Modernización Tecnológica de Galicia) e o Colexio Profesional de Enxeñaría Informática de Galicia están realizando actividades de formación en Ciberseguridade para os nenos e nenas galegas.  Os nenos e as nenas de 4º, 5º e 6º de primaria puideron realizar esta actividade grazas a xestión da Biblioteca Pública Municipal.

 

   Durante esta sesión cos compoñentes de Polo Correo do Vento, falamos de internet segura, de Ciberseguridade, da importancia das contrasinais, de non regalar os nosos datos a calquera aplicación...   E todo mentres escoitabamos un conto acompañado pola música dun ukelele.

 

  Ao mesmo tempo que escoitabamos a historia, Pablo (ilustrador), foi debuxando esta infografía que quedará na biblioteca para que as ensinanzas de hoxe non se esquezan.

 

   A continuación compartimos o conto de Sofía para que todos poidades aprender con el.

 

 

DÍA DAS BIBLIOTECAS: Reto lector

Como recordaredes, antes de rematar o curso, Lectuvín presentou un reto lector para o verán:

  

   A conmemoración do Día da Biblioteca é a data que sempre aproveitamos para entregar os premios aos nenos e nenas que participan neste reto lector, por iso hoxe recibiron os seus agasallos.

 

MOITAS  GRAZAS  POR  PARTICIPAR!!

SAMAÍN CON-SUMO COIDADÍN

     SAMAÍN CON-SUMO COIDADÍN é unha campaña do Instituto Galego de Consumo e da Competencia que ten como obxectivos advertir sobre os principais riscos nos disfraces, complementos e artigos de Samaín e dar a coñecer as normas do etiquetado destes produtos.

 

   Para acadar estes obxectivos, o alumnado a través dunha pequena presentación puido descubrir o que son e o que non son xoguetes, a importancia da seguridade dos diferentes produtos, o símbolo de seguridade 0-3 e o marcado CE.

 

 

   Despois o grupo de infantil, 1º e 2º decorou unha máscara de cabazas e o grupo de 3º a 6º unha máscara de caveira, ambalas dúas cos símbolos 0-3 e o marcado CE.

GALERÍA  DE  IMAXES

CONCERTO DIDÁCTICO - Sociedade Filarmónica de Monforte de Lemos

      O alumnado de 5º e 6º de Primaria asistiu o venres, día 14, ao concerto didáctico organizado pola Sociedade Filarmónica de Monforte de Lemos: O violín na Arte dende o Barroco ata hoxe. Un concerto ao que fomos invitados pola filarmónica debido á colaboración entre esta sociedade e o Concello de Sober.

   Neste concerto, o violinista albanés Florian Vlashi, fixo un percorrido pola música dende o Barroco ata a actualidade interpretando obras de autores representativos destes 500 anos de historia como Bach, José Herrando ou Pablo Sarasate. 

    Ademais a música combinábase cunha proxección de cadros nos que aparecía o violín correspondentes á etapa histórica de cada obra: Rafael, Caravaggio, Monet, Picasso, Dalí...

    Durante o concerto o alumnado puido escoitar obras interpretadas a dúo (violín e violonchelo) e obras para violín solista nas que coñecemos tres tipos de violíns diferentes: o violín da época barroca con cordas de tripa, o violín que coñecemos na actualidade e o violín eléctrico.

   Dámoslle as grazas a Sociedade Filarmónica de Monforte por organizar este concerto que resultou unha experiencia moi enriquecedora para o noso alumnado.

GALERÍA  DE  IMAXES

ESCRIBIR A BIBLIOTECA ESCOLAR (Texto: Asesoría de Bibliotecas Escolares)

 

    A Consellería de Cultura, Educación, Formación Profesional  e Universidades publica o lema e o cartel para as bibliotecas escolares de Galicia de cara a este curso 2022/2023. O lema elixido, ESCRIBIR A BIBLIOTECA ESCOLAR, quere poñer o foco en todas as formas de escrita que cuida e ofrece a biblioteca escolar . A escrita como medio de comunicación, expresión, creación, información e coñecemento.

     A imaxe que interpreta este lema proposto para o curso 2022-2023 é obra da calígrafa, deseñadora gráfica e mestra de talleres de caligrafía e lettering Belén L. Méndez coñecida como nacu, que leva xa un tempo colaborando coas bibliotecas escolares en  obradoiros.

  

     A biblioteca escolar ofrece oportunidades e recursos para escribir e escribirnos:

 

- Escribir para saber, para aprender.

- Escribir para comunicar e comunicarnos.

- Escribir relatos, historias.

- Escribirnos, coñecernos a través da escrita: diarios, axendas,  biografía...

- Escribir xuntos en relatos colectivos, encadeados, libros viaxeiros, wikis…

- Escrita creativa: microrrelatos, haikus, collages, caligrafía…

- Escribir para deixar pegada e preservar a memoria individual e colectiva.

- Escribir para incluír e visibilizar.

- Traducir.

- Reescribir, versionar e adaptar.

- Escribir no audiovisual: guións, escaletas.

- Escribir para  estimular a creación. 

 

Texto: Asesoría de Bibliotecas Escolares

 

UN LIBRO de Herve Tullet

    Comezan as actividades creativas na nosa biblioteca!

    Nesta ocasión a partir da obra de Herve Tullet Un libro, o alumnado de eduación infantil puido deixar voar a súa creatividade e realizar verdadeiras obras de arte.

III VISITA DIDÁCTICA ÁS ESCAVACIÓNS DE PROENDOS

      O alumnado de 3º a 6º de Primaria fixo unha nova visita ás escavacións arqueolóxicas que se están realizando na parroquia soberina de Proendos (antiga Proentia) para ampliar a información de visitas anteriores.

 

   A escavación que visitamos é unha ampliación da zona do hórreo xa descuberto en anos anteriores. Alí, Francisco Alonso, o seu director técnico, fixo de guía para explicarnos os achados realizados nesta ampliación coa que conseguiron escavar a totalidade do hórreo.

    Según nos dixo, as escavacións confirman a importancia do xacemento de Proendos tanto polo hórreo en si mesmo que é único no noroeste peninsular como pola cantidade de vestixios que atoparon de épocas moi diferentes: mundo castrexo, romano, medieval... xa que en poucos sitios se pode atopar esta variedade nun mesmo lugar.

      Coas súas explicacións puidemos entender mellor os vestixios e aprendemos moitos termos relacionados con esta época e con técnicas de investigación: flotar a terra, terra sigilata, paleoambiente, fiada de sacrificio,  como se documentan as capas escavadas...  ademais tamén resolveu todas as dúbidas do noso alumnado que prestou moita atención ás súas explicacións.

   En definitiva, unha saída moi interesante e didáctica que nos axuda a pór en valor o noso e a coñecer as riquezas do noso concello. 

    Para rematar, completamos a visita coa presenza do director do proxecto nas instalacións de Radiuvín para gravar o primeiro programa deste curso. Nesta ocasión e Iria e Cristian foron os encargados de falar con el sobre todo o aprendido para compartir con toda a comunidade educativa as nosas aprendizaxes. 

MOITAS  GRAZAS  POR  ESTA  ACTIVIDADE  TAN  DIDÁCTICA

QUE  ESPERAMOS  VOLVER  A REPETIR  EN  NOVAS  FASES  DESTA  ESCAVACIÓN!!

GALERÍA  DE  IMAXES