OBRADOIRO DE COLLAGE E FOTOGRAFÍA

   O ano pasado os biblioaxudantes realizaron un taller de collage con Mark Ritchie (fotógrafo australiano que reside actualmente en Ourense) que consistiu na elaboración de imaxes mediante a técnica do collage con materiais variados: diferentes tipos de papel, transparencias, algodón, cartón, lá, fíos...

    Esta actividade lles gustou tanto que este ano decidimos repetila con outro alumnado: os nenos e nenas de 3º e 4º de Primaria.

  O proxecto era que o alumnado creara imaxes asociadas á paisaxe da nosa contorna para elaborar un libro titulado Val de Lemos e cremos que o fixeron moi ben porque recolleron os aspectos máis importantes do noso concello: os Canóns do Sil, igrexas da Ribeira Sacra, os viñedos...

      

     Cando os collages estiveron elaborados fotografiáronos nunha caixa de luz cunha cámara réflex para captar a imaxe.

   No seguinte documento pdf poderedes desfrutar de todas as súas creacións.

Para ver máis fotos do obradoiro: GALERÍA  DE  IMAXES

 

VIAXANDO POLAS LETRAS (13 / 2022 - 2023)

   Hoxe continuamos coas sesións dedicadas ao libro A proba de auga de Anémona De Río.

 

 

   Como este libro gañou o I Premio de Banda Deseñada O Garaxe Hermético, estivemos falando de O Garaxe Hermético que é unha escola de Banda Deseñada e Ilustración de Pontevedra dirixida por Kiko da Silva e estivemos vendo algúns dos seus libros como Fiz nos biosbardos e outros libros da autora como Tam.

   Como curiosidade, aprendemos que o nome desta escola procede dun libro de cómic de ciencia ficción titulado así e escrito por Moebius.

     En canto ao noso libro, podemos dicir que aos nenos e nenas do club lles encantou. Resaltaron as ilustracións (que lles lembran ao manga) e a propia historia aínda que no argumento da mesma había puntos de vista diferentes sobre o papel de Aqua no desenvolvemento da mesma.

      

     Tamén falamos sobre a importancia das vacinas e relacionamos o libro coa asignatura de Ciencias da Natureza: por que comparan o bazo cun lugar para despezar os vellos tranvías? E por que as neuronas son oficinistas con enchufes no cabelo? Que sabemos dos glóbulos brancos?

     

Sen dúbida foi unha lectura moi interesante e  atractiva para o noso alumnado!!

DÍA MUNDIAL DA SAÚDE

    A Organización Mundial da Saúde (OMS) declarou o 7 de abril como Día Mundial da Saúde para destacala como un dereito básico e universal e para fomentar o acceso á atención sanitaria de calidade en todas as rexións do mundo, especialmente na poboación con escasos recursos.

 

     Tamén a Axenda 2030 propón Saúde e Benestar como un dos seus obxectivos.

    Para sumarnos a esta conmemoración tivemos no centro ás doutoras Olalla Quintairos Veloso e Alba Rodríguez Gavino que impartiron un obradoiro para todo o noso alumnado.

    O obradoiro estivo repartido en dúas partes. A primeira parte estivo dedicada aos hábitos saudables relacionados coa alimentación e a hixiene personal.

    A segunda parte estivo dedicada a primeiros auxilios relacionados con situacións cotiás: 

sangrado de narices, feridas e curas, atragantamentos, 

RCP (reanimación cardiopulmonar), 

protocolo PAS (Protexer, Avisar e Socorrer), 

identificación das constantes vitais das persoas (VER se se move o peito, OÍR achegando a orella á súa cara e SENTIR o alento na cara), 

posición lateral de seguridade e simulacros con chamadas ao 112.

 

 

 

 

   Se queredes saber máis detalles sobre esta actividade podedes escoitar ás nosas convidadas no seguinte programa de Radiuvín.

MOITAS  GRAZAS  AS  DÚAS  POR  ESTA  ACTIVIDADE,

FOI  UN  PRACER  CONTAR  COA  VOSA  COLABORACIÓN!

 

E  LEMBRADE... ANTE CALQUERA EMERXENCIA...

 

 

 

GALERÍA  DE  IMAXES

OBRADOIRO DE PROGRAMACIÓN - Biblioteca Creativa

    Un ano máis a nosa biblioteca participa no Proxecto Biblioteca Creativa, polo que recibimos un orzamento específico para poder realizar obradoiros de formación para todo o noso alumnado de primaria. 

   Este ano quixemos retomar o traballo de programación coa aplicación Scratch para o que se achegaron ao centro varias monitores de Vermislab para ensinarlle os procedementos básicos aos nenos e nenas que nunca traballaron con esta aplicación e para mellorar os coñecementos de aqueles que xa a coñecían.

 

 

 

 

      

 

    

GALERÍA  DE  IMAXES

LEMOS, CREAMOS e EXPRESAMOS

   Durante o segundo trimestre os alumnos e alumnas de 1º de Primaria levaron a cabo coa axuda das familias, unha tarefa chamada "Lemos, creamos e expresamos" para desenvolver diversas competencias e habilidades relacionadas coa comprensión lectora, a expresión oral, o traballo manual e a cooperación.

   Esta tarefa realizouse nos seguintes pasos:

1) LEMOS: Elección e lectura dun conto na casa.

 2) CREAMOS: Realización dunha proposta orixinal relacionada coa lectura do conto (manualidade ou debuxo) na que se representan os aspectos principais ou a idea principal do conto.

 

 3) EXPRESAMOS: Exposición na clase do traballo realizado; cada alumno/a expuxo a manualidade ou debuxo realizado e respondeu ás preguntas relacionadas coa lectura do conto e coa proposta creada (Podedes acceder aos vídeos clickando nas imaxes)

    A verdade é que a actividade foi un éxito e os/as nenos/as quedaron moi contentos/as. 

     Ademais acadáronse os obxectivos propostos:

- Motivar ao alumnado cara á lectura e favorecer a creación dun hábito lector.

- Desenvolver a expresión oral dos nenos e das nenas traballando a perda do medo escénico ao falar en público, estratexias de comunicación, interiorización de vocabulario específico, etc.

- Involucrar ás familias cooperando en actividades que motivan aos seus fillos e fillas.

- Respectar e valorar o traballo dos outros.

NORABOA  A  TODXS!!!

FIXESTES  UN  GRAN  TRABALLO!!