VISITA DO ALUMNADO DE 1º CURSO DO GRAO DE ED. INFANTIL

   Por segundo ano alumnos e alumnas de 1º curso do Grao de Educación Infantil da Facultade de Ourense acompañados por varios mestres e mestras viñeron a coñecer a realidade do noso centro educativo.

    Para un mellor desenvolvemento da actividade, xs universitarios dividíronse en 5 grupos para pasar por 5 puntos diferentes do noso colexio: a biblioteca, o espazo croma, a radio e as dúas aulas de Ed. Infantil.

    Nas aulas de Ed. Infantil puideron coñecer ás nosas crianzas e a diferente metodoloxía de traballo que se leva a cabo entre Infantil A que é unha aula mixta (3 e 4 anos) e Infantil B (aula de 5 anos).

   Na biblioteca biblioaxudantes de 5º e 6º de Primaria tiñan preparada unha intervención con información sobre a organización da mesma (Lectuvín, a CDU, espazo creativo...), as actividades que facemos, o seu labor como biblioaxudantes e todos os recursos e materiais que se poden atopar nela. 

    Nos estudos radiofónicos de Radiuvín, outro grupo de biblioaxudantes explicáronlles como se grava, como funciona o programa editor de audio e ata lles fixeron unha pequena entrevista.

 

      No espazo audiovisual do croma, tres biblioaxudantes recibían aos futuros mestres e mestras para explicarlles como se utiliza esta técnica e as súas aplicacións didácticas: pero non só de forma teórica xa que puideron facerse varias fotografías e gravar algúns vídeos.

 

MOITAS  GRAZAS  POR  VIR  A  COMPARTIR  CON  NÓS  ESTA  MAÑÁ,

ESPERAMOS  QUE  VOS  GUSTARA  A  VISITA!!

 GALERÍA  DE  IMAXES

 

 

CLUB DE LECTURA (2/ 2023 - 2024)

    Despois dunha primeira sesión na que os membros do club de lectura fixeran as enquisas iniciais, hoxe puxémolas en común e decatámonos de que temos gustos moi diferentes o que vai a implicar que uns libros nos gustarán máis e outros menos pero que teremos que ler de todo para intentar respectar os gustos de todos e cada un de nós.

     As moderadoras decidimos comezar a andaina deste curso co libro Mitos e Lendas da Ribeira Sacra, escrito por Dani Viéitez e Iria Iglesias.

     As lendas que compoñen este libro corresponden a diferentes lugares que forman parte dos concellos da Riberia Sacra e o que fixemos foi adxudicar a cada membro do club a lenda máis próxima ao seu domicilio ou aquela coa que tiveran algo de relación; para que preparasen unha pequena exposición para os seus compañeiros que escoitaremos na próxima sesión que xa estamos desexando que chegue!!

CLUB DE LECTURA (1 / 2023 - 2024)

 Comezamos as reunións do club de lectura VIAXANDO  POLAS  LETRAS do curso 2023 - 2024!

  Unha aventura lectora que empeza con moita forza xa que se apuntou todo o alumnado de 5º e 6º de Primaria.

    Nesta primeira reunión, os membros do club cubriron unhas enquisas iniciais para establecer o punto de partida: que esperan do club e das reunións, os seus gustos e hábitos lectores...

VÉMONOS  NA  SEGUINTE  SESIÓN!!

CARTAS DENDE A RÍA

   Queremos presentarvos un novo proxecto no que estamos inmersos este curso 

"CARTAS DENDE A RÍA".

    A principios de curso chegounos esta proposta desde o CEIP Seara (Moaña) para cartearnos e compartir información sobre as diferenzas e semellanzas entre a vida nunha vila de interior e unha vila de costa: paisaxe, profesións, clima... e, por suposto, aceptamos encantados!

   Esta semana xa nos chegaron as súas primeiras cartas e, como podedes ver, o noso alumnado está moi emocionado con elas e poñendo xa a mente a traballar para contestarlles canto antes!

 

GALERÍA  DE  IMAXES

MAGOSTO 2023

 Novembro é o mes dos magostos e das castañas e no cole fixemos o noso propio magosto!

  A xornada comezou na biblioteca onde os biblioaxundates Javier, Germán e Carlota leron varios poemas realacionados co outono e coas castañas do libro Os soños na gaiola de Manuel María.

 

  Pola tarde foi o momento de gozar das castañas asadas, comelas e pasar un rato divertido!

 

Podedes ver máis imaxes deste día no seguinte enlace:

GALERÍA  DE  IMAXES

SAMAÍN 2023

     A piques de rematar outubro, chegou a celebración de Samaín e Halloween e desde o centro fixemos diferentes actividades para conmemorar esta data

        - Exposición de cabazas ou outros obxectos terroríficos que o alumnado quixo traer das súas casas. 

   -   Exposición de lecturas de medo  no corredor principal á entrada da biblioteca.

     - Lecturas compartidas na biblioteca:  neste ratiño de lectura compartida, o alumnado de 1º agasallounos co recitado do poema El fantasma Nicolás de G. Espejo e tres biblioaxudantes, prepararon a lectura do libro Os Bolechas teñen medo.

 

    - Certame de creación literaria con dous retos. O primeiro reto era inventar unha apócema ou bebereaxe e o segundo escribir unha historia de terror a partir do comezo dun libro publicado. Este ano os libros que tiñan que continuar foron: Mortiña 5. Unha sorpresa marabillosa escrito por Barbara Cantini para o alumnado de 3º e 4º de primaria e Malvarina. Bruxa en prácticas escrito por Susanna Isern para 5º e 6º de Primaria.

 

  Pola tarde, os gañadores do certame leron as súas historias aos seus compañeiros na biblioteca nun ambiente terrorífico e despois recolleron os seus premios.

    Pero todos os participantes puideron recoller un premio pola súa participación xa que poñer a mente a traballar para escribir unha historia ou unha apócema ten que ter un recoñecemento. 

   - Disfraces: nunha festa coma esta non podían faltar os disfraces para divertirse e pasar un bo rato. Aquí tedes aos máis cativos do colexio pero podedes ver todos os grupos  na galería de imaxes.

 

 

GALERÍA  DE  IMAXES

DÍA DAS BIBLIOTECAS

   Hoxe celebramos o Día das Bibliotecas e, como non podía ser doutra forma, foi un día moi completo!

   Durante toda a semana estivemos facendo formación de usuarios para lembrar as normas da biblioteca, a CDU, organización dos andeis, o significado das etiquetas dos libros...

   Pero hoxe comezamos pola mañá entregando varios agasallos. Por unha banda, tivemos a entrega de premios aos nenos e nenas de 4º de Primaria que o ano pasado gañaron o Accésit da Categoría III do concurso Nós tamén creamos da TVG polo súa cortometraxe do libro A princesa do Caurel de Javier Solchaga e Patacrúa que é un conto acumulativo clásico arredor do roubo do anel desta princesa do Caurel.

    Podedes ver esta produción no seguinte enlace:

      Despois entregamos uns premios tamén aos participantes no reto lector do verán do curso 2023 que consistía en reescribir o final dun libro que leran na época estival

    A continuación fixemos a presentación do club de lectura deste ano para que o alumnado de 5º e 6º de Primaria vaia decidindo se quere participar e entregámoslle a ficha de inscrición.

 Para rematar esta sesión matutina, todo o alumnado de Primaria recibiu o marcapáxinas conmemorativo deste día escrito polos autores e ilustradores Dani Viéitez e Iria Iglesias como texto agasallo para o Colectivo LEMOS LE.