AS FAMILIAS CONTAN: Familia de Ada e Teo

     Nunha nova sesión da actividade  As familias contan  tivemos no centro a  Antía López Maldonado, nai de Ada e Teo, acompañados pola pequena Sía.

   Antía fixo un contacontos dobre xa que contou primerio para xs compañeirxs de Ada e despois para xs de Teo.

   Ada e Antía leron para a clase de 3º e 4º de Primaria o libro Tragapalabras de Cristina Oleby que é a historia dunha nena á que lle encantan os alimentos: comelos, clasificalos, preparalos... pero o que máis comía ao longo do día eran palabras.

   Comía as palabras que pensaba que era mellor non dicir porque podían causarlle un problema a alguén, ata que un día xa non puido tragar máis palabras e empezou a dicir todo aquilo que non dixera.

    Un libro moi bonito que nos fala sobre a dificultade que poden ter os nenos e as nenas para expresar as súas emocións e xestionar os sentimentos.

   Despois Teo e Antía, leron para as aulas de Ed. Infantil o libro Color Carne de Desirée Bela-Lobedde que é un libro co que reflexionaremos sobre a tolerancia e o racismo derivado da cor da pel.

    O primeiro día de cole, todas as cores están moi contentas porque poderán saír da caixa para darlle cor aos debuxos dos nenos e das nenas: amarelo para o sol, azul para o mar e o ceo... e como a primeira tarefa que lles manda a profe e debuxar ás súas familias a cor carne, está contenta porque todos a utilizarán.

      Pero o tempo vai pasando e ninguén utiliza a cor carne. Pintan de marrón oscuro, marrón claro, amarelo... e por fin alguén colle tamén a cor carne.  

     Unha historia para aprender que existen moitos tonos de pel como existen moitos tonos de verde para as árbores; todos somos iguais aínda que todos sexamos diferentes!

    Para escoitar estes contos, podedes acceder aos podcasts que gravaron na radio antes de marchar!

 

MOITAS  GRAZAS  POR  ESTA  VISITA!!

ATA  A  PRÓXIMA!!

 

Galería de imaxes

 

 

PROXECTOS CIENCIAS SOCIAIS

Para traballar algúns dos contidos vistos en Ciencias Sociais o alumnado de 3º e 4º de Educación Primaria elaborou unha serie de maquetas sobre o Sistema solar, os movementos e fases da Lúa ou o mapa político de España. 

Desfrutaron moito mentres compoñían as súas creacións e, a nosa biblioteca, reloce aínda máis bonita con estas verdadeiras obras de arte. Algunhas son colgantes, outras teñen luz propia, outras móvense...

No seguinte vídeo podedes observar todo o que vos acabamos de relatar. Esperamos que vos guste moito!!!!

 

 

 

 Xa estamos listos para despegar rumbo ao espazo!!! Acompáñasnos?

PLATAFORMA ELBE.2

 Como vos dixemos anteriormente, estamos comezando a coñecer a plataforma ELBE.2 a través da cal o alumnado pode acceder ao préstamo de libros dixitais.

   Esta plataforma é un instrumento que nos axuda a dar un paso máis na educación e na competencia dixital así como na diversificación de soportes e formatos de lectura.

CLUB DE LECTURA - 15ª sesión

    Hoxe rematamos a lectura do libro A marabillos medicina de George, de Roald Dahl  con opinións moi diversas sobre o seu final. A algunhas persoas gustoulles e ata lles pareceu divertido pero a outras deulles moita mágoa que a avoa acabase así.

         Ademais do final, tamén falamos doutros aspectos destes últimos capítulos: Cal é o papel da avoa na familia? E cal é o papel dos nosos avós na nosa familia? Como te sentirías ti no caso de George? E no lugar da avoa?

    Cal é a intención do pai que ten tanto interese en que o filla volva a facer a medicina para vendela? É un agoiro que se quere facer rico ou quere solucionar a fame do resto das persoas con polos e vacas xigantes?

    Aínda que non chegamos a unha gran conclusión si que puidemos reflexionar e darlle voltas á nosa cabeciña para saber que fariamos nós cunha medicina así. E que fariades vós?

   Podedes escoiar máis cousas sobre este libro e o seu autor, recomendámosvos que escoitedes o podcasta gravado por Libertad, Yanira, Cristian e Gareth.

CIRCUÍTOS ELÉCTRICOS - A estrela sen nome (Manuel María)

    Seguindo algúns dos modelos que nos mostrou Paola Guimeráns cando estivo no colexio, hoxe estivemos dándolle luz á estrela sen nome do poema escrito por Manuel María que pertence ao libro Os soños na gaiola.

    Primeiro elaboramos o modelo de circuíto en papel utilizando libre office; neste modelo sinalamos o lugar da pila e do led coa colocación correspondente dos polos e o trazado que deberá facer o adhesivo de cobre que conducirá a electricidade.

 

       Despois pegamos o adhesivo de cobre seguindo o trazado.

     Unha vez que temos o adhesivo colocado, colocamos o led e a pila respectando sempre a polaridade para que funcione e suxeitamos con adhesivo transparente. Hai que ter coidado ao suxeitar a pila non cubrir toda a superficie con adhesivo porque se non, o fío de cobre non pode facer contacto.

    Agora que xa temos o circuíto funcionando, quédanos decorar a nosa creación para o que utilizamos adhesivos de estrela e purpurina dourada.

 Mirade que fermosos quedaron!!

  Para rematar podedes escoitar o poema que eles mesmos gravaron nos estudos de Radiuvín!

SESIÓN CONTACONTOS

      Os alumnos e alumnas do Ciclo Superior de Educación Infantil do IES Daviña Rey, acompañados polos seus mestres Lisa Dios e Xavier Viana, estiveron hoxe na biblioteca do centro desenvolvendo unha sesión de narración oral coordinada pola BPM de Sober e dirixida aos nenos e nenas de Educación Infantil do noso colexio.

      Así, o alumnado de infantil puido desfrutar de contos moi diversos:

Chibos, Chibóns de Olalla González

Corre, corre cabaciña de Eva Mejuto

    

Maruxa de Eva Mejuto

 

 

 

O coelliño branco de X. Ballesteros e O. Villán

 

Que mal cheira! de J. L. Campanari

 

   Unha sesión moi divertida e entretida da que os nosos nenos e nenas non perderon detalle xa que estiveron moi atentos a todos os libros que lles leron.

 

 

   Despois os nosos invitados tamén pasaron polos estudos de Radiuvín para respostar ás preguntas de Pau e Pilar sobre esta actividade e compartir con todos os que os queirades escoitar, un dos seus contos.

 

 

 

MOITAS  GRAZAS  POR  ESTA SESIÓN  DE CONTOS!!

 

ESPERAMOS  VOLVER  A  VERVOS  PRONTO!!

 

 GALERÍA  DE  IMAXES

LETRAS GALEGAS COLABORANDO CON OUTRAS BIBLIOTECAS

     Como sabedes, a nosa biblioteca e a BPM de Sober, formamos parte dunha agrupación de bibliotecas públicas e escolares da Comarca de Lemos: o Colectivo Lemos Le.

     Este ano quixemos homenaxear a Florencio Manuel Delgado Gurriarán ao que se lle dedica o Día das Letras Galegas, elaborando un vídeo no que poderedes descubrir varios datos sobre a súa biografía e ver os videopoemas elaborados por diferentes bibliotecas do colectivo.

A nosa aportación ao vídeo podedes vela nos minutos iniciais nos que o alumnado de 4º e 6º de Primaria fai a presentación e achéganos á vida do autor con pequenas pinceladas da súa biografía; e no poema Cantiga da vindima recitado polo alumnado de 3º e 4º de Primaria.