A ARTE DAS EMOCIÓNS: A LEDICIA

    As emocións influen de maneira directa na aprendizaxe. Tanto as positivas como as negativas axudan a crear recordos deixando pegada no noso desenvolvemento. Polo tanto, para que o proceso de aprendizaxe sexa completo, temos que traballar a Educación Emocional desde idades temperás.

   Por este motivo, nas aulas de Educación Infantil comezamos este traballo empregando como guía o libro "Laberinto del Alma" da escritora Anna LLenas.

  

   A primeira emoción que traballamos foi a ledicia. Vimos o que poñia sobre ela o libro Laberinto del Alma e logo tamén contamos o conto "¿Qué nos hace felices?" da autora  Marie-Agnès Gaudrat con ilustracións de Carme Solé Vendrell    

   

    A partir destas lecturas as crianzas levaron a cabo varias actividades. Comezaron facendo un bote da Ledicia que encheron con debuxos daquelas cousas que lles producían máis ledicia e as colorearon de amarelo, que foi a cor escollida para representar dita emoción.

   

    Despois intentaron reproducir as caras alegres dos seus compañeiros e compañeiras. Houbo resultados moi sorprendentes e as crianzas pasárono xenial facéndoo.

                 

    Outra actividade foi formar cariñas alegres empregando diferentes materiais como botóns, pompóns, pasta, tapóns.... ou plastilina.

 

 

    Por último quixemos relacionar as emocións con obras de arte, o que da o nome ao noso proxecto. E como sempre, aproveitamos para traballar a lectoescritura buscando as letras, colocando e copiando.

   Para rematar relacionamos a ledicia cunha obra de Kandinsky chamada "Estudio de color con cuadrados" creando a nosa propia versión.

    

E así comezamos a formar o noso mural da Arte das Emocións!

CLUB DE LECTURA (11 / 2023 - 2024)

   No club de lectura seguimos coa lectura do cómic Policán de Dav Pilkey que foi o libro máis vendido no mundo en 2021. Para esta sesión tiñamos que ler os dous primeiros capítulos e a conclusión xeral é que lles encantou.

   Comezaron Itzae e Germán facéndonos un resumo do Capítulo 1: Nace un superhéroe, destacaron as viñetas que máis lle gustaran que foron sobre todo as que tiñan xogos de palabras divertidas e como a historia se ía entrelazando con detalles que non parecían importantes pero que ao final si que o eran; por exemplo, cando a aspiradora traga unha táboa de surf na praia e varias viñetas despois esa táboa é a que utiliza Policán para salvarse.

    A continuación pasamos ao Capítulo 2: Robo-jefe. Neste capítulo tamén lles chamaron a atención os xogos de palabras como os nomes dos negocios ilegais o que nos deu para falar de diferentes tipos de  fraudes: Estafas"R"Us, Imprenta de Billetes Falsos, Ganzúas Pérez... Que é un ladrón de "guante branco"?

  Tamén nos fixamos no poder das ilustracións xa que había páxinas nas que non había ningún bocadillo e só coas ilustracións podiamos saber o que estaba pasando.

   Xa estamos desexando chegar á seguinte sesión para rematar o libro!!

DÍA DO LIBRO INFANTIL

    O 2 de abril conmemórase o  Día do Libro Infantil  xa que é a data de nacemento de Hans Christian Andersen, autor de contos infantís coñecidos en todo o mundo como A Sereíña, O parrulo feo, O soldadiño de Chumbo... 

   Cada ano o IBBY (International board on books for young people) selecciona un escritor representativo e un ilustrador para que elaboren o cartel e a mensaxe dirixida a todos os nenos e nenas do mundo. Este ano a sección encargada foi Xapón e desde alí a escritora Eiko Kadono e a ilustradora Nana Furiva escolleron o lema  "Navega polos mares coas alas da túa imaxinación". 

  Daniela e Itzae foron os biblioaxudantes encargados de transmitir esta mensaxe na biblioteca e de gravala en Radiuvín para que todos poidades coñecela.

    Despois quixemos que o noso alumnado tamén navegara coas alas da súa imaxinación e por iso lles demos uns libros alados aos que lle tiñan que por título segundo a historia que quixeran contar e ilustrar a portada en consonancia. 

   Para rematar fixemos un mural cos libros alados ilustrados arredor do cartel oficial deste ano.

 

 

 

 

FELIZ  DÍA  DO  LIBRO  INFANTIL!! 

OXALÁ  NUNCA  DEIXEDES  DE  NAVEGAR  COAS  ALAS  DA  IMAXINACIÓN!!

GALERÍA  DE  IMAXES

RECIBINDO Á PRIMAVERA

   Coa chegada da Primavera  as crianzas de Ed. Infantil prepararon varias actividades nas que combinaron diversión e aprendizaxe.

   Xogaron libremente nas bandexas con diferentes materiais como millo, garabanzos, tapóns, area...

 

Tamén reproduciron un arco da vella con pintura de dedos

 

 

E levaron a cabo unhas actividades con flores naturais              

                 

Primeiro elaboraron pequenos xarróns con flores, para o que tiveron que empregar as tesoiras e cortar os talos á altura precisa.

 Logo descubriron que machacando algunhas destas flores podían pintar.

 

    

        

 

Así de bonita quedou a súa fermosa obra de arte! 

PROXECTO "OS PINGÜÍNS" (IV)

     Co fin do inverno e a chegada da primavera era o momento de poñerlle fin a este proxecto sobre os pingüíns.

 

    Isto tamén supuxo a volta de Marcelino á Antártida, cousa que os fixo sentir un pouquiño tristes, pero eles comprenderon que o calor non era bo para el e que tiña que volver coa súa familia. 

 

    Ademáis, para ter un recordo para sempre, fixeron unhas fotos de despedida con él.

Como actividade final as crianzas fixeron neve! 

 

Mesturaron bicarbonato con auga e como por cousa de maxia formouse neve.

Unha vez que tiveron a neve feita chegou a mellor parte, a de xogar! 

Disfrutaron moitísimo!

 

SOBERICIAS. O XORNAL QUE CONTA AS MELLORES NOTICIAS (ou non...)

     Por segundo ano, durante o mes de marzo (especialmente na semana da prensa), no centro desenvolvemos unha situación de aprendizaxe baseada nos medios de comunicación que ten como resultado o segundo número de Sobericias, o xornal que conta as mellores noticias (ou non...) no que poderedes ler noticiais reais pero tamén outras que non o son tanto (as chamadas fake news).

     Quixemos editar un novo número deste xornal porque seguimos pensando que a desinformación (noticias falsas, información sesgada, manipulación de titulares...) é un problema ao que o noso alumnado se deberá enfrontar pois, por desgraza, non todas as noticias que se publican son fiables.

     Deste xeito as crianzas poden entender a problemática actual das diferentes informacións falsas que se poden atopar en medios impresos, televisión, radio ou publicacións en rede (onde ademais poden acabar viralizándose) e comprobar de primeira man o doado que é xerar este tipo de noticias.

    Por todo isto, parécenos fundamental seguir compartindo co alumnado experiencias que inclúan a análise dos medios de comunicación que forman ou formarán parte da súa vida cotiá.

    Esperamos que saibades apreciar todo o traballo desenvolvido polo alumnado. Nós como docentes, estamos moi orgullosas deles.

XORNAL MARZO 2024 de biblioteca.virxedocarme